បទឈប់បាញ់នៅរ៉ង់ ស្ថិតក្នុងភាពមិនច្បាស់លាស់ ក្រោយអាម៉េរិកនិងអ៊ីរ៉ង់ ប៉ះទង្គិចគ្នានៅច្រកសមុទ្រហ័រម៉ូស

កាលពីថ្ងៃទី៤ ខែឧសភា ប្រធានាធិបតីអាម៉េរិក លោក ដូណាល់ ត្រាំ បានផ្ញើសារព្រមានធ្ងន់ៗថា កងទ័ពអាម៉េរិកនឹងវាយកម្ទេចអ៊ីរ៉ង់ ប្រសិនបើហ៊ានវាយប្រហារលើនាវាយោធាអាម៉េរិក ដែលកំពុងប្រតិបត្តិការបើកច្រកសមុទ្រ Hormuz ឡើងវិញ។ ប្រតិបត្តិការនេះត្រូវបានលោក ត្រាំហៅថា គម្រោងសេរីភាព ដើម្បីអមដំណើរការពារនាវាពាណិជ្ជកម្មដែលកំពុងជាប់គាំង។ យោងតាមទីភ្នាក់ងារព័ត៌មាន Reuters យោធាអាម៉េរិកបានអះអាងថា ខ្លួនបានបំផ្លាញនាវាតូច ៗរបស់អ៊ីរ៉ង់ ចំនួន៦គ្រឿង រួមទាំងមីស៊ីល និងយន្តហោះដ្រូនមួយចំនួនទៀត។ ជាការឆ្លើយតប អ៊ីរ៉ង់ បានអះអាងថា ខ្លួនបានបាញ់ព្រមានទៅលើនាវាចម្បាំងអាម៉េរិក១គ្រឿង បង្ខំឱ្យនាវានោះបត់ត្រឡប់ក្រោយវិញ។

ស្ថានការណ៍កាន់តែអាក្រក់ទៅៗ នៅពេលដែលភ្នាក់ងារសន្តិសុខសមុទ្រអង់គ្លេស បានរាយការណ៍ថា នាវាចំនួន២គ្រឿងត្រូវបានវាយប្រហារនៅឆ្នេរសមុទ្រអារ៉ាប់រួម។ ជាមួយគ្នានេះ ក្រុមហ៊ុនប្រេងជាតិ Adnoc របស់អារ៉ាប់រួម បានបញ្ជាក់ថា នាវាដឹកប្រេងទទេចំនួន១ គ្រឿងត្រូវបានវាយប្រហារដោយដ្រូនអ៊ីរ៉ង់ ហើយកំពង់ផែប្រេង និងមូលដ្ឋានទ័ពអាម៉េរិក នៅអារ៉ាប់រួមក៏រងការវាយប្រហារដោយមីស៊ីលផងដែរ។ បច្ចុប្បន្នកងឆ្មាំបដិវត្តន៍អ៊ីស្លាមអ៊ីរ៉ង់ បានបិទផ្លូវទឹកដ៏តូចចង្អៀតនេះស្ទើរតែទាំងស្រុង ដោយប្រើប្រាស់គ្រាប់មីន យន្តហោះដ្រូន និងមីស៊ីល ខណៈសហរដ្ឋអាម៉េរិកបានតបតវិញដោយការឡោមព័ទ្ធកំពង់ផែរបស់អ៊ីរ៉ង់។

លោក ម៉ូហាម៉េដ បាហ្គឺរ កាលីបាហ្វ (Mohammad Bagher Ghalibaf) ប្រធានសភាអ៊ីរ៉ង់ បានចោទប្រកាន់អាម៉េរិក និងសម្ពន្ធមិត្តថា ជាអ្នក រំលោភ បទ ឈប់ បាញ់ និងធ្វើឱ្យសន្តិសុខថាមពលសកលជួបគ្រោះថ្នាក់។ចំណែករដ្ឋមន្ត្រីការបរទេសអ៊ីរ៉ង់ លោក Abbas Araqchi បានព្រមានថាដំណោះស្រាយយោធាមិនអាចបញ្ចប់វិបត្តិបានឡើយ ហើយលោកបានជំរុញឱ្យអាម៉េរិកកុំធ្លាក់ចូលក្នុងអន្ទាក់សង្គ្រាម ខណៈប៉ាគីស្ថាន កំពុងដើរតួជាអ្នកសម្របសម្រួលសន្តិភាព៕
អត្ថបទៈ សួន ឡង់ទី