ទីផ្សាររថយន្ត

រថយន្តចិន អាចនឹងបាត់ពីទីផ្សារអាម៉េរិក ប្រសិនបើច្បាប់ហាមឃាត់រថយន្តចិន ត្រូវបានអនុម័ត


ទីផ្សាររថយន្តអាម៉េរិក អាចនឹងបិទទ្វារទាំងស្រុងចំពោះរថយន្តចិន នៅពេលដ៏ខ្លីខាងមុខនេះ ក្រោយសមាជិកសភាអាម៉េរិក​មកពីគណបក្សប្រជាធិបតេយ្យ និងគណបក្សសាធារណរដ្ឋ កំពុងឈានជិតដល់កិច្ចព្រមព្រៀងជាប្រវត្តិសាស្ត្រ ដើម្បីអនុម័តច្បាប់ហាមឃាត់រថយន្តចិន មិនឱ្យចូលមកក្នុងទឹកដីសហរដ្ឋអាម៉េរិក។ ប៉ុន្តែអ្វីដែលគួរឱ្យចាប់អារម្មណ៍នោះ គឺក្រុមហ៊ុនយក្សអាល្លឺម៉ង់ Mercedes-Benz អាចនឹងត្រូវបានលើកលែងពីបម្រាមនេះ ទោះបីជាមានភាគហ៊ុនចិន ជិត២០% ក៏ដោយ។ នេះបើយោងតាមការចុះផ្សាយរបស់សារព័ត៌មាន Bloomberg។
ទីផ្សាររថយន្ត
ដោយ

ប្រភពស្និទ្ធនឹងសភាអាម៉េរិក បានបង្ហើបឱ្យដឹងថា ក្រុមសមាជិកសភាមកពីបណ្តារដ្ឋ ដែលជាមូលដ្ឋានផលិតរថយន្តធំៗរបស់អាម៉េរិក របស់គណបក្សសាធារណរដ្ឋ និងគណបក្សប្រជាធិបតេយ្យ បានរួមដៃគ្នាផ្តួចផ្តើមសេចក្តីព្រាងច្បាប់ហាមឃាត់ការនាំចូលរថយន្តចិន ដោយគ្រោងបញ្ជូនទៅប្រធានាធិបតី ដូណាល់ ត្រាំ (Donald Trump) ដើម្បីចុះហត្ថលេខាឱ្យបានមុនដំណាច់ឆ្នាំ២០២៦ នេះ។ ប្រសិនបើសេចក្តីព្រាងច្បាប់នេះត្រូវបានអនុម័តជាផ្លូវការ ទីផ្សាររថយន្តដ៏ធំសម្បើមរបស់អាម៉េរិក នឹងត្រូវបិទជិតឈឹងចំពោះក្រុមហ៊ុនផលិតរថយន្តយក្សរបស់ចិន ដូចជា BYD និង Geely ជាដើម។ វិធានការក្តៅនេះធ្វើឡើងចំពេលដែលក្រុមហ៊ុនរថយន្តអគ្គិសនីចិន កំពុងវាយលុកដណ្តើមចំណែកទីផ្សារយ៉ាងឆាប់រហ័សនៅតំបន់អឺរ៉ុប និងអាម៉េរិកខាងត្បូង តាមរយៈយុទ្ធសាស្ត្រលក់ក្នុងតម្លៃសមរម្យ ប៉ុន្តែបំពាក់ដោយបច្ចេកវិទ្យាទំនើបចុងក្រោយ។
កន្លងមករថយន្តចិន ស្ទើរតែមិនអាចជ្រៀតចូលទីផ្សារអាម៉េរិក បានទៅហើយ ដោយសារតែរបាំងពន្ធគយដ៏ខ្ពស់កប់ពពក និងការរឹតបន្តឹងផ្នែកបច្ចេកវិទ្យាពីក្រសួងពាណិជ្ជកម្មអាម៉េរិក។ ដូច្នេះការចងក្រងការហាមឃាត់នេះទៅជាច្បាប់នឹងក្លាយជាខែលការពារដ៏រឹងមាំមួយកម្រិតទៀត ដើម្បីទប់ស្កាត់ហានិភ័យផ្នែកសន្តិសុខជាតិ និងការពារឧស្សាហកម្មរថយន្តក្នុងស្រុក ពីមហិច្ឆតាគ្រប់គ្រងទីផ្សាររថយន្តពិភពលោករបស់ទីក្រុងប៉េកាំង។
យ៉ាងណាមិញ បើទោះបីជាចិន បានពង្រីកឥទ្ធិពល និងកាន់កាប់ភាគហ៊ុនជិត២០% នៅក្នុងក្រុមហ៊ុន Mercedes-Benz ក៏ដោយ ក៏ប្រភពដដែលបានបង្ហើបថា ក្រុមហ៊ុនរថយន្តប្រណីតរបស់អាល្លឺម៉ង់មួយនេះ អាចនឹងរួចផុតពីសំណាញ់ច្បាប់ហាមឃាត់របស់អាម៉េរិក។ យ៉ាងណាក៏ដោយ រហូតមកដល់ពេលនេះ នៅមិនទាន់មានការបញ្ជាក់ជាផ្លូវការណាមួយនៅឡើយទេ ខណៈដែលមន្ត្រីសេតវិមាន ក៏នៅរក្សាភាពស្ងៀមស្ងាត់មិនទាន់ធ្វើអត្ថាធិប្បាយជុំវិញរឿងនេះដែរ៕

ដោយៈ សរ សុជាតិ




អត្ថបទបន្ទាប់


តម្លៃក្រុមហ៊ុន Anthropic ហក់ឡើងដល់១,៣ទ្រីលានដុល្លារ ក្រោយប្រមូលទុនបានជាង៨១ពាន់លានដុល្លារពីការបោះផ្សាយ IPO

ក្រុមហ៊ុនបច្ចេកវិទ្យាបញ្ញាសិប្បនិម្មិត (AI) ខ្នាតយក្សរបស់អាម៉េរិក Anthropic បានបើកទំព័រប្រវត្តិសាស្ត្រថ្មីនៅទីផ្សារហិរញ្ញវត្ថុ Wall Street ដ…

​ អតីតរដ្ឋមន្ត្រីក្រសួងសេដ្ឋកិច្ចថៃ បានរិះគន់សេដ្ឋកិច្ចថៃ ថា នឹងប្រែពីខ្លាទៅជាឆ្មាមានជំងឺ

ពីខ្លាសេដ្ឋកិច្ចដ៏មានអំណាចទៅជាឆ្មាឈឺដែលគ្មានកម្លាំង ដែលនេះគឺជាពាក្យប្រៀបធៀបដ៏ចាក់ដោតរបស់អតីតមន្ត្រីជាន់ខ្ពស់ថៃ ដែលចេញមុខវាយប្រហារដោយត្រង់…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ