អង្គការសហប្រជាជាតិ

UN ប្រឈមហានិភ័យគ្មានមេដឹកនាំ ខណៈមហាអំណាចទាំង៥ នៅតែខ្វែងគំនិតគ្នាលើអ្នកស្នងតំណែង


តើអង្គការសហប្រជាជាតិ ហៅកាត់ថា UN ដែលជាស្ថាប័នអន្តរជាតិ ដ៏សំខាន់បំផុតមួយរបស់ពិភពលោកអាចនឹងគ្មានមេដឹកនាំនៅដើមឆ្នាំ២០២៧ ឬ យ៉ាងណា? ខណៈនៅសល់ពេលមិនដល់ពីរខែទៀត អគ្គលេខាធិការបច្ចុប្បន្ន លោក “អង់តូនីញ៉ូ ហ្គូតើរ៉េស” (Antonio Guterres) នឹងត្រូវចុះចេញពីតំណែង ប៉ុន្តែមហាអំណាចទាំង ៥ នៅតែមិនអាចឯកភាពគ្នាលើអ្នកស្នងតំណែងរបស់លោក។ ក្រោយការបោះឆ្នោតសាកល្បងសម្ងាត់ចំនួន ៨ ជុំ ក្រុមប្រឹក្សាសន្តិសុខ UN នៅតែគ្មានបេក្ខជនដែលទទួលបានការគាំទ្រគ្រប់គ្រាន់។
អង្គការសហប្រជាជាតិ
ដោយ

ស្ថានភាពនេះកំពុងបង្កការព្រួយបារម្ភកាន់តែខ្លាំងថា អង្គការពិភពលោកមួយនេះអាចប្រឈមនឹងវិបត្តិខ្វះអ្នកដឹកនាំជាលើកដំបូងក្នុងប្រវត្តិសាស្ត្រ។ នេះបើយោងតាមសារព័ត៌មាន Reuters ចុះផ្សាយនៅថ្ងៃទី១៩ ខែវិច្ឆិកា។

ក្រុមប្រឹក្សាសន្តិសុខ UN ត្រូវបានរំពឹងថានឹងរៀបចំការបោះឆ្នោតសាកល្បងសម្ងាត់មួយជុំទៀតនៅសប្តាហ៍នេះ។ ប៉ុន្តែសមាជិកអចិន្ត្រៃយ៍ទាំង ៥ រួមមានសហរដ្ឋអាម៉េរិក ចិន រុស្ស៊ី អង់គ្លេស និងបារាំង នៅមិនទាន់អាចឈានដល់កិច្ចព្រមព្រៀងលើបេក្ខជនណាមួយនៅឡើយ។

អាណត្តិរបស់លោក “អង់តូនីញ៉ូ ហ្គូតើរ៉េស” (Antonio Guterres) នឹងបញ្ចប់នៅថ្ងៃទី៣១ ខែធ្នូ ឆ្នាំ២០២៦។ ដោយសារតែការជ្រើសរើសអ្នកស្នងតំណែងនៅតែជាប់គាំង UN កំពុងពិចារណារៀបចំផែនការបន្ទាន់ក្នុងករណីមិនអាចជ្រើសរើសអគ្គលេខាធិការថ្មីបានទាន់ពេលវេលា។

ក្នុងចំណោមបេក្ខជនដែលកំពុងប្រកួតប្រជែងរួមមានទាំងលោកស្រី "រេបេកា ហ្គ្រីនស្ពែន" (Rebeca Grynspan) អតីតអនុប្រធានាធិបតីកូស្តារីកា និងលោកស្រី "ឡាណា នូសេបា" (Lana Nusseibeh) អ្នកការទូតជាន់ខ្ពស់នៃប្រទេសអេមីរ៉ាតអារ៉ាប់រួម UAE។ ប៉ុន្តែបេក្ខជននីមួយៗក៏ប្រឈមនឹងការជំទាស់ និងការខ្វែងគំនិតគ្នាពីសមាជិកមួយចំនួនផងដែរ។ ភាពជាប់គាំងនេះត្រូវបានគេមើលឃើញថា ជាសញ្ញាបង្ហាញពីការប្រកួតប្រជែងភូមិសាស្ត្រនយោបាយកាន់តែខ្លាំងរវាងមហាអំណាច ខណៈការចូលរួមរបស់សហរដ្ឋអាម៉េរិក ក្នុងកិច្ចការរបស់ UN ក៏កំពុងថយចុះ។

បើគ្មានអគ្គលេខាធិការថ្មីទាន់ពេលវេលា UN អាចជួបការលំបាកក្នុងការតែងតាំងមន្ត្រីជាន់ខ្ពស់ និងដឹកនាំការងារសំខាន់ៗមួយចំនួន។ ជម្រើសដែលកំពុងត្រូវបានពិចារណា រួមមានការបន្តអាណត្តិលោក “អង់តូនីញ៉ូ ហ្គូតើរ៉េស” (Antonio Guterres) ជាបណ្តោះអាសន្ន ឬតែងតាំងមន្ត្រីម្នាក់ឱ្យកាន់តំណែងជាបណ្តោះអាសន្ន។

គួរឱ្យកត់សម្គាល់ថា ក្នុងប្រវត្តិសាស្ត្រ UN មិនធ្លាប់មានអគ្គលេខាធិការណាម្នាក់បញ្ចប់អាណត្តិ ដោយគ្មានអ្នកស្នងតំណែងត្រូវបានជ្រើសរើសរួចរាល់នោះទេ។ ប្រសិនបើភាពជាប់គាំងនេះនៅតែបន្ត UN អាចនឹងចូលដល់ឆ្នាំ២០២៧ ដោយគ្មានមេដឹកនាំថ្មី ខណៈពិភពលោកកំពុងប្រឈមនឹងជម្លោះ និងវិបត្តិអន្តរជាតិជាច្រើន៕

ដោយ: តែម សុខុម




អត្ថបទបន្ទាប់


អឺរ៉ុប ​ព្រមានថា កិច្ចព្រមព្រៀងសន្តិភាពអ៊ុយក្រែននឹងបរាជ័យ បើគ្មានវត្តមានអឺរ៉ុប ចូលរួម

ភាពតានតឹងផ្នែកការទូតរវាងសហរដ្ឋអាម៉េរិក និងសម្ពន្ធមិត្តអឺរ៉ុប កំពុងកើនឡើងជាថ្មី ក្រោយបណ្តាមេដឹកនាំអឺរ៉ុប បានជួបប្រជុំគ្នានៅទីក្រុងប៊ែរឡា…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ