កិច្ចព្រមព្រៀងសន្តិភាព

អឺរ៉ុប ​ព្រមានថា កិច្ចព្រមព្រៀងសន្តិភាពអ៊ុយក្រែននឹងបរាជ័យ បើគ្មានវត្តមានអឺរ៉ុប ចូលរួម


ភាពតានតឹងផ្នែកការទូតរវាងសហរដ្ឋអាម៉េរិក និងសម្ពន្ធមិត្តអឺរ៉ុប កំពុងកើនឡើងជាថ្មី ក្រោយបណ្តាមេដឹកនាំអឺរ៉ុប បានជួបប្រជុំគ្នានៅទីក្រុងប៊ែរឡាំង ប្រទេសអាល្លឺម៉ង់ ដើម្បីបង្ហាញជំហររួមគ្នាក្នុងការគាំទ្រអ៊ុយក្រែន។ កិច្ចប្រជុំបន្ទាន់នេះធ្វើឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីកិច្ចប្រជុំកំពូលត្រីភាគីដ៏កម្រមួយនៅទីក្រុងស៊ិនជិន ប្រទេសចិន រវាងប្រធានាធិបតីអាម៉េរិក ដូណាល់ ត្រាំ ប្រធានាធិបតីចិន ស៊ី ជីនពីង និងប្រធានាធិបតីរុស្ស៊ី វ្ល៉ាឌីមៀ ពូទីន ដែលបានឯកភាពគ្នាលើសេចក្តីប្រកាសសន្តិភាពជានិមិត្តរូប។
កិច្ចព្រមព្រៀងសន្តិភាព
ដោយ

សារព័ត៌មាន Al Jazeera បានរាយការណ៍កាលពីថ្ងៃទី១៩ ខែវិច្ឆិកា ថា លោក ហ្វ្រេឌ្រិក មើស (Friedrich Merz) អធិការបតីអាល្លឺម៉ង់បានរិះគន់កិច្ចប្រជុំត្រីភាគីនៅទីក្រុងស៊ិនជិន ថា គ្រាន់តែជាការថតរូបយកមុខប៉ុណ្ណោះ និងបានព្រមានត្រង់ៗថា រាល់កិច្ចព្រមព្រៀងសន្តិភាពណាមួយ ដែលធ្វើឡើងដោយគ្មានអឺរ៉ុបចូលរួមនឹងទទួលបរាជ័យជាក់ជាមិនខាន។ លោក ហ្វ្រេឌ្រិក បានសង្កត់ធ្ងន់ថា ប្រសិនបើឈានដល់ការចរចាសន្តិភាព ដាច់ខាតត្រូវតែមានវត្តមានអឺរ៉ុបចូលរួម ហើយការចរចានោះអាចទទួលបានជោគជ័យ លុះត្រាតែមានការចូលរួមពីទាំងអ៊ុយក្រែន និងអឺរ៉ុប។ លោក ក៏បានបង្ហាញក្តីសង្ឃឹមថា នឹងមានការធ្វើការជាក្រុមរួមគ្នាជាមួយទីក្រុងកៀវ និងទីក្រុងវ៉ាស៊ីនតោន នៅពេលរៀបចំតុចរចាជាមួយរុស្ស៊ី។

ជាមួយគ្នានេះ លោក អ៊ែនឌី ប៊ើនហេម (Andy Burnham) នាយករដ្ឋមន្ត្រីអង់គ្លេសបានថ្លែងបញ្ជាក់ថា អឺរ៉ុប បានត្រៀមខ្លួនរួចជាស្រេចសម្រាប់ការចូលតុចរចា ដោយមានជំហរច្បាស់លាស់ស្របគ្នា និងរួបរួមគ្នា ហើយកិច្ចព្រមព្រៀងសន្តិភាពរវាងអ៊ុយក្រែន និងរុស្ស៊ីត្រូវតែជាអាទិភាពចម្បងគេ។

ការចេញមកប្រតិកម្មបង្ហាញការមិនពេញចិត្តរបស់បណ្តាប្រទេសអឺរ៉ុបបានផ្ទុះឡើងបន្ទាប់ពីសហភាពអឺរ៉ុបត្រូវបានផាត់ចេញពីដំណើរការចរចាកន្លងមករវាងសហរដ្ឋអាម៉េរិក រុស្ស៊ី និងអ៊ុយក្រែន។ លើសពីនេះ សេចក្តីប្រកាសសន្តិភាពជានិមិត្តរូបនៅទីក្រុងស៊ិនជិន កាលពីថ្ងៃព្រហស្បតិ៍ បានបង្កឱ្យមានសំណួរជាច្រើនក្នុងចំណោមសម្ពន្ធមិត្តអាម៉េរិកអំពីទំនាក់ទំនង ដែលកាន់តែជិតស្និទ្ធឡើងរវាងលោក ត្រាំ ជាមួយលោក ស៊ី និងលោក ពូទីន ទោះបីជាសេចក្តីប្រកាសនោះមិនបានលើកឡើងពីសង្គ្រាមនៅអ៊ុយក្រែន ឬជម្លោះជាមួយអ៊ីរ៉ង់ ក៏ដោយ។

គួរកត់សម្គាល់ថា សហរដ្ឋអាម៉េរិក និងអឺរ៉ុប ដែលធ្លាប់ជាសម្ពន្ធមិត្តជិតស្និទ្ធអស់ជាច្រើនទសវត្សរ៍ចាប់តាំងពីក្រោយសង្គ្រាមលោកលើកទី២ បានចាប់ផ្តើមមានគម្លាតពីគ្នាជាបន្តបន្ទាប់ បន្ទាប់ពីរដ្ឋបាលលោក ត្រាំ បានកាត់បន្ថយការគាំទ្រដល់អ៊ុយក្រែន និងទទូចឱ្យបណ្តាប្រទេសសមាជិកអង្គការណាតូ បង្កើនការចំណាយថវិកាដោយខ្លួនឯងសម្រាប់វិស័យការពារជាតិ៕

អត្ថបទៈ សួន ឡង់ទី




អត្ថបទបន្ទាប់


​ អតីតរដ្ឋមន្ត្រីក្រសួងសេដ្ឋកិច្ចថៃ បានរិះគន់សេដ្ឋកិច្ចថៃ ថា នឹងប្រែពីខ្លាទៅជាឆ្មាមានជំងឺ

ពីខ្លាសេដ្ឋកិច្ចដ៏មានអំណាចទៅជាឆ្មាឈឺដែលគ្មានកម្លាំង ដែលនេះគឺជាពាក្យប្រៀបធៀបដ៏ចាក់ដោតរបស់អតីតមន្ត្រីជាន់ខ្ពស់ថៃ ដែលចេញមុខវាយប្រហារដោយត្រង់…

UN ប្រឈមហានិភ័យគ្មានមេដឹកនាំ ខណៈមហាអំណាចទាំង៥ នៅតែខ្វែងគំនិតគ្នាលើអ្នកស្នងតំណែង

តើអង្គការសហប្រជាជាតិ ហៅកាត់ថា UN ដែលជាស្ថាប័នអន្តរជាតិ ដ៏សំខាន់បំផុតមួយរបស់ពិភពលោកអាចនឹងគ្មានមេដឹកនាំនៅដើមឆ្នាំ២០២៧ ឬ យ៉ាងណា? ខណៈន…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ