ក្រុមហ៊ុនផលិតរថយន្តអគ្គិសនីវៀតណាម VinFast បានចុះកិច្ចព្រមព្រៀងជាមួយរដ្ឋតាមីល ណាឌូ (Tamil Nadu) ភាគខាងត្បូងនៃប្រទេសឥណ្ឌា ដើម្បីបោះទុនវិនិយោគ២ពាន់លានដុល្លារសាងសង់រោងចក្រផលិតរថយន្តអគ្គិសនី ដោយសន្យាបោះទុនដំបូងក្នុងទំហំ៥០០លានដុល្លារក្នុងរយៈពេល៥ឆ្នាំដំបូងនៃគម្រោង។ នេះបើយោងតាមសេចក្តីថ្លែងការណ៍រួមធ្វើឡើងរវាងភាគីទាំងពីរ។
សេចក្តីថ្លែងការណ៍ដដែលបានបញ្ជាក់ថា ការសាងសង់រោងចក្រផលិតអគ្គិសនី EV និងអាគុយនៃគម្រោងវិនិយោគដ៏ធំសម្បើមនេះត្រូវបានរំពឹងថា នឹងចាប់ផ្តើមក្នុងឆ្នាំ២០២៤ នេះ ជាមួយការបង្កើតការងារបានចន្លោះពី៣ពាន់ទៅ៣ពាន់៥រយកន្លែង។
បង្កើតឡើងក្នុងឆ្នាំ២០១៧ និងចាប់ផ្ដើមផលិតរថយន្តអគ្គិសនី ចាប់ពីឆ្នាំ២០២១ ក្រុមហ៊ុន VinFast បានប្រកាសផែនការបង្កើនការវាយលុកទីផ្សាររថយន្តអគ្គិសនីយ៉ាងសម្បើមនៅបរទេស។ ក្រុមហ៊ុននេះបានហក់ចូលផ្សារហ៊ុនអាម៉េរិក ណាស្តាក់(Nasdaq) ក្នុងខែសីហា ឆ្នាំ២០២៣ ហើយបានប្រកាសផែនការពង្រីកចូលទីផ្សារឥណ្ឌានៅមួយខែក្រោយមក។
អត្ថបទគួរអាន
ក្រុមហ៊ុន VinFast បាននិយាយថា គម្រោងវិនិយោគនៅក្នុងរដ្ឋតាមីល ណាឌូ (Tamil Nadu) នេះត្រូវបានរំពឹងថា នឹងវិវឌ្ឍទៅជាមជ្ឈមណ្ឌលផលិតរថយន្តអគ្គិសនី (EV) លំដាប់ទី១ នៅក្នុងតំបន់ជាមួយនឹងសមត្ថភាពផលិតប្រចាំឆ្នាំរហូតដល់១៥ម៉ឺនគ្រឿង បើធៀបនឹងសមត្ថភាពផលិតប្រចាំឆ្នាំ២៥ម៉ឺនគ្រឿងនៅឯរោងចក្រធំរបស់ខ្លួនក្នុងប្រទេសវៀតណាម។ ទោះជាយ៉ាងណា សេចក្តីថ្លែងការណ៍រួមនេះ មិនបានបញ្ជាក់ពីសមត្ថភាពផលិតនៅរោងចក្រផលិតអាគុយរបស់ក្រុមហ៊ុននេះនៅក្នុងប្រទេសឥណ្ឌា នោះទេ។
រថយន្តអគ្គិសនីមានចំណែកគ្របដណ្ដប់ត្រឹមតែប្រមាណ២% ប៉ុណ្ណោះ នៃការលក់រថយន្តសរុបក្នុងទីផ្សារប្រទេសឥណ្ឌា កាលពីឆ្នាំមុន ប៉ុន្តែរដ្ឋាភិបាលឥណ្ឌា កំពុងកំណត់គោលដៅ៣០% នៅឆ្នាំ២០៣០ ហើយកំពុងដាក់ចេញកម្មវិធីមួយ ដើម្បីទាក់ទាញបណ្ដាក្រុមហ៊ុនផលិតរថយន្តអគ្គិសនី (EV)។ ជាមួយគ្នានេះក្រុមហ៊ុន VinFast ក៏មានគម្រោងពង្រីកបណ្តាញអ្នកចែកចាយរថយន្តទូទាំងប្រទេសឥណ្ឌាផងដែរ៕
ដោយ: តែម សុខុម
None
