ក្រុមយុវជនជំនាន់ Gen Z

ក្រុមយុវជនជំនាន់ Gen Z នៅថៃប្រមូលផ្តុំគ្នាធ្វើបាតុកម្ម ដើម្បីទម្លាក់លោក អានុទីន ចេញពីតំណែង


ភ្លើងបាតុកម្មនៅកណ្តាលទីក្រុងបាងកកបាននកម្រើកឡើងជាថ្មី ដោយក្រុមសកម្មជនយុវជនថៃជំនាន់ Gen Z កំពុងបំផុសចលនា«លើកម្រាមដៃ៣» ដែលជានិមិត្តរូបតស៊ូដ៏ល្បីល្បាញឱ្យរស់ឡើងវិញនៅតាមដងផ្លូវ ក្នុងយុទ្ធនាការទម្លាក់នាយករដ្ឋមន្ត្រីលោក អានុទីន ឆានវីរៈគុល (Anutin Charnvirakul) ចេញពីតំណែង។ ក្រៅពីទាមទារឱ្យរដ្ឋាភិបាលចុះចេញ ក្រុមយុវជនទាំងនេះ ក៏ទទូចឱ្យមានកំណែទម្រង់នយោបាយ និងលើកលែងទោសដល់អ្នកជាប់ចោទក្រោមច្បាប់ប្រមាថព្រះមហាក្សត្រ មាត្រា១១២ដ៏រសើបផងដែរ។
ក្រុមយុវជនជំនាន់ Gen Z
ដោយ

បើតាមការចុះផ្សាយរបស់កាសែត The Nation នៅថ្ងៃទី២០ ខែវិច្ឆិកា នេះ ការប្រមូលផ្តុំតវ៉ាដ៏ក្តៅគគុកត្រូវបានធ្វើឡើងនៅរង្វង់មូលអនុស្សាវរីយ៍ប្រជាធិបតេយ្យកណ្តាលទីក្រុងបាងកក ចាប់ពីម៉ោង៣រសៀលតទៅ ក្រោមការរៀបចំរបស់បណ្តាញយុវជនដើម្បីលទ្ធិប្រជាធិបតេយ្យ និងក្រុមយុវជនថៃសេរី។ ទន្ទឹមនេះ សកម្មជនជើងចាស់ដែលធ្លាប់ដឹកនាំចលនាគាំទ្រលទ្ធិប្រជាធិបតេយ្យកាលពីឆ្នាំ២០២០ ក៏បានចេញមុខគាំទ្រយ៉ាងពេញទំហឹងនៅលើបណ្តាញសង្គមផងដែរ។ យុទ្ធនាការប្រឆាំងរដ្ឋាភិបាលលោក អានុទីន លើកនេះ ត្រូវបានបំផុសឡើងក្រោមពាក្យស្លោកថា «ចេញពីសាលាហើយទៅជួបជុំគ្នានៅរង្វង់មូលអនុស្សាវរីយ៍ប្រជាធិបតេយ្យ» ក្នុងគោលបំណងដាស់ស្មារតីយុវជនជំនាន់ Gen Z ឱ្យក្រោកឈរប្រឆាំងនឹងរដ្ឋាភិបាលថ្មី និងតភ្ជាប់ចរន្តតស៊ូរបស់និស្សិតកាលពីអតីតកាលឡើងវិញ។
អ្វីដែលកាន់តែចាប់អារម្មណ៍ ក្រុមអ្នករៀបចំបានដាក់ឈ្មោះយុទ្ធនាការថ្ងៃទី២០ ខែវិច្ឆិកា នេះថា «ថ្ងៃដែលឆ្មាត្រូវចេញដេញចាប់កណ្តុរ»។ ពាក្យថា កណ្តុរគឺសំដៅចំៗទៅលើឈ្មោះហៅក្រៅរបស់នាយករដ្ឋមន្ត្រី អានុទីន ដែលភាសាថៃហៅថា «នូ (Nu)» ប្រែថា «កណ្តុរ»។ ដើម្បីបង្ហាញនិមិត្តរូបប្រឆាំង ក្រុមអ្នករៀបចំបានអំពាវនាវឱ្យអ្នកចូលរួមពាក់ស្រោមមុខ ឬពាក់ត្រចៀកសត្វឆ្មាមកជួបជុំគ្នា។
នៅក្នុងសេចក្តីថ្លែងការណ៍ដ៏មុតស្រួចតាមបណ្តាញសង្គម បណ្តាញយុវជនដើម្បីលទ្ធិប្រជាធិបតេយ្យបានសង្កត់ធ្ងន់ថា ប្រទេសនេះមិនមែនជាទីលានលេងល្បែងកម្សាន្តសម្រាប់មេដឹកនាំនយោបាយណាម្នាក់ឡើយ ហើយពលរដ្ឋថៃ ក៏មិនគួរអត់ឱនចំពោះនាយករដ្ឋមន្ត្រីណា ដែលបិទត្រចៀកមិនព្រមស្តាប់សំឡេងរបស់ប្រជាពលរដ្ឋនោះដែរ។
ក្រៅពីការទាមទារទម្លាក់មេដឹកនាំ បាតុកម្មនេះ ក៏នឹងលើកយកបញ្ហាវិសមភាពក្នុងវិស័យអប់រំ សិទ្ធិសេរីភាពនយោបាយ និងក្តីបារម្ភជុំវិញគោលនយោបាយដឹកនាំរបស់រដ្ឋាភិបាលលោក អានុទីន មកវែកញែកជាសាធារណៈផងដែរ៕

អត្ថបទៈ សួន ឡង់ទី. រូបភាពៈ ឯកសារបរទេស




អត្ថបទបន្ទាប់


LOLC KHQR ផ្តល់ជូននូវភាពងាយស្រួល និងឱកាសឈ្នះរង្វាន់ទឹកប្រាក់ 168,000 រៀល ដល់អាជីវករ ក្នុងឱកាសពិធីបុណ្យអុំទូកខាងមុខ!

ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក កាន់តែខិតជិតមកដល់ហើយ ដែលជាពេលវេលាដ៏មមាញឹកសម្រាប់អាជីវករនៅតាមតំបន់ដែលមានអ្នកធ្វើដ…

សន្និសីទប្រចាំឆ្នាំស្តីពី ការពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា ២០២៦ CAMESCO26 ការគាំទ្រសហគ្រាស និងជំរុញលំហូរទុន ដើម្បីភាពរីកចម្រើននៃប្រព័ន្ធអេកូឡូស៊ីសហគ្រិនភាព ប្រទេសកម្ពុជា

រាជធានីភ្នំពេញ ថ្ងៃទី១៩ ខែវិច្ឆិកា ឆ្នាំ២០២៦៖ សន្និសីទប្រចាំឆ្នាំស្តីពី ការពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា២០២៦ (CAMESCO26) បាន…

ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ