បើយោងតាមការចុះផ្សាយរបស់សារព័ត៌មាន The Guardian ជាទូទៅដីគោកស្រូប និងទ្រាំទ្រកម្ដៅបានតិចជាងផ្ទៃមហាសមុទ្រដ៏ជ្រៅ ហេតុនេះហើយទើបដីគោកឡើងកម្ដៅលឿនជាងសមុទ្រ។ ប៉ុន្តែទ្វីបអឺរ៉ុបបានក្លាយជាចំណុចក្តៅបំផុតលើភពផែនដី ដោយសារកត្តាយុទ្ធសាស្ត្រធម្មជាតិចំនួន៤រួមមានការប្រែប្រួលលំនាំនៃចរន្តបរិយាកាស, ទីតាំងជិតតំបន់អាក់ទិក ដែលជាតំបន់ឡើងកម្ដៅលឿនបំផុតលើផែនដី, ការថយចុះនៃគម្របព្រិល និងផលប៉ះពាល់ពីខ្យល់ស្អាត។
ជាលទ្ធផលសីតុណ្ហភាពនៅអឺរ៉ុបបានកើនឡើងរហូតដល់២,៥អង្សាសេ ធៀបនឹងសម័យមុនបដិវត្តន៍ឧស្សាហកម្ម ដែលខ្ពស់ជាងកំណើនមធ្យមភាគសាកល (ប្រមាណ១,Global warming៤អង្សាសេ) ជិតទ្វេជាពីរ។ ចាប់តាំងពីពាក់កណ្តាលទសវត្សរ៍ឆ្នាំ១៩៩០ មក សីតុណ្ហភាពនៅអឺរ៉ុបបានកើន០,៥អង្សាសេក្នុងមួយទសវត្សរ៍ ខណៈអាម៉េរិកខាងជើងកើន០,៤អង្សាសេ, អាហ្វ្រិក០,៣អង្សាសេ និងអាម៉េរិកខាងត្បូងកើន០,២អង្សាសេ។
វិបត្តិដែលមិនធ្លាប់មាននេះកំពុងបង្កើតឱ្យមានគ្រោះរាំងស្ងួត ភ្លើងឆេះព្រៃ និងទឹកជំនន់បំផ្លិចបំផ្លាញកាន់តែសាហាវ។ ប្រសិនបើសហគមន៍អឺរ៉ុបមិនកាត់បន្ថយការបំភាយឧស្ម័នកាបូនឱ្យដល់កម្រិតសូន្យ និងដាក់ចេញវិធានការការពារប្រជាពលរដ្ឋឱ្យបានឆាប់រហ័សទេនោះ មហន្តរាយនេះនឹងកាន់តែអាក្រក់ទៅៗឥតឈប់ឈរ៕
