ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ថា ទោះបីការធ្វើពហិការរបស់ពលរដ្ឋបានហុចឱកាសមាសដល់សហគ្រាសក្នុងការពង្រីកចំណែកទីផ្សារក៏ដោយ តែការពង្រីកផលិតកម្មថ្មីៗដោយគ្មានការត្រៀមខ្លួនច្បាស់លាស់អំពីការកំណត់ស្តង់ដា និងគុណភាពផលិតផលនៅតែជាក្តីកង្វល់សម្រាប់ពលរដ្ឋ និងរដ្ឋាភិបាល។
ថ្នាក់ដឹកនាំរូបនេះបានបញ្ជាក់នៅក្នុងកម្មវិធីយុទ្ធនាការ«អភិវឌ្ឍន៍សហគ្រាស និងអនុលោមភាពផលិតផល»កាលពីថ្ងៃទី២៩ ខែមិថុនា ថា ការត្រៀមចាកចេញពីប្រទេសមានការអភិវឌ្ឍតិចតួចនៅឆ្នាំ២០២៩ គឺចាំបាច់ណាស់តម្រូវឱ្យសហគ្រាសក្នុងស្រុកមានសមត្ថភាពប្រកួតប្រជែងខ្ពស់ទាំងស្តង់ដាគុណភាព ផលិតភាព និងនវានុវត្តន៍។ ថ្នាក់ដឹកនាំរូបនេះបានសង្កត់ធ្ងន់ថា ការផលិតផលិតដោយអនុលោមតាមស្តង់ដា គឺជាការវិនិយោគលើទំនុកចិត្តរបស់អតិថិជន និងការពង្រីកទីផ្សារឱ្យកាន់តែរឹងមាំ ពោលគឺមិនមែនជាបន្ទុកចំណាយបន្ថែម នៃថ្លៃដើមអាជីវកម្មឡើយ។
ជាមួយគ្នានេះ លោកបណ្ឌិត ឡី សុភាព ប្រធានសមាគមសហព័ន្ធវិនិយោគិនកម្ពុជា កត់សម្គាល់ឃើញថា កិច្ចសហការរវាងក្រសួងស្ថាប័នពាក់ព័ន្ធជាមួយវិស័យឯកជនក្នុងការអភិវឌ្ឍសហគ្រាស ដើម្បីជំរុញការផលិតផលិតផលប្រកបដោយគុណភាពហាក់នៅមានកម្រិតនៅឡើយ ខណៈការអភិវឌ្ឍន៍សហគ្រាស និងអនុលោមភាពផលិតផលចាំបាច់ត្រូវការការជួយគាំទ្រផ្នែកហិរញ្ញវត្ថុ។ អ្នកជំនាញរូបនេះសង្កេតឃើញដែរថា បច្ចុប្បន្នពលរដ្ឋមួយចំនួននៅតែខ្វះទំនុកចិត្តលើផលិតផលក្នុងស្រុក ដោយសារការប្រកួតប្រជែងមិនស្មោះត្រង់ និងការកែច្នៃ និងក្លែងបន្លំបាកូដផលិតផលនៅលើទីផ្សារកើតមានជាបន្តបន្ទាប់ ខណៈការយល់ដឹងពីផលិតផលខុសច្បាប់នៅមានកម្រិតនៅឡើយ។
ដើម្បីឆ្លើយតបនឹងបញ្ហានេះ ឯកឧត្តមរដ្ឋមន្ត្រីក្រសួងឧស្សាហកម្ម បានអះអាងថា ក្រសួងឧស្សាហកម្ម នឹងបន្តធ្វើការកែទម្រង់យ៉ាងស៊ីជម្រៅតាមរយៈការធ្វើទំនើបកម្ម និងផ្តល់សេវាសាធារណៈតាមប្រព័ន្ធឌីជីថល ដើម្បីជួយសម្រួលឱ្យការធ្វើអនុលោមភាពរបស់សហគ្រាសកាន់តែមានភាពងាយស្រួល ចំណាយតិច និងមានប្រសិទ្ធភាពខ្ពស់ក្នុងការត្រៀមខ្លួនក្តោបក្តាប់ទីផ្សារក្នុងស្រុក តំបន់ និងឈានទៅប្រកួតប្រជែងលើឆាកអន្តរជាតិ៕
