វិស័យការបរទេស

ថៃ ប្រញាប់ប្រញាល់ចេញមុខបដិសេធទាំងបំពាន ក្រោយកម្ពុជា ប្រើវេទិកាអន្តរជាតិ បកអាក្រាតទង្វើឈ្លានពានរបស់យោធាថៃ


តើកម្ពុជា បានទម្លាយការពិតអ្វីខ្លះនៅលើវេទិកាអន្តរជាតិ រហូតធ្វើឱ្យភាគីថៃ អង្គុយមិនសុខ និងប្រញាប់ប្រញាល់ចេញសេចក្តីថ្លែងការណ៍ច្រានចោល? ក្រោមគោលនយោបាយដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ និងកិច្ចព្រមព្រៀងដែលមានស្រាប់ កម្ពុជា បានបកអាក្រាតទង្វើឈ្លានពានរបស់ភាគីថៃ ទាំងនៅក្នុងកិច្ចប្រជុំកំពូលហ្វ្រង់កូហ្វូនី នៅរាជធានីភ្នំពេញ និងក្នុងកិច្ចប្រជុំអាស៊ាន និងកិច្ចប្រជុំពាក់ព័ន្ធ នៅទីក្រុងម៉ានីល ប្រទេសហ្វីលីពីន។
វិស័យការបរទេស
ដោយ

ក្រោយការទម្លាយការពិតដ៏ឈឺចាប់នេះ ក្រសួងការបរទេសថៃ បានប្រញាប់ប្រញាល់ចេញសេចក្តីថ្លែងការណ៍បដិសេធ ដើម្បីបិទបាំងទង្វើអាក្រក់របស់ខ្លួន។

ក្រសួងការបរទេសថៃ បានចេញសេចក្តីថ្លែងការណ៍បដិសេធទាំងបំពានការពិតចំពោះការបកអាក្រាតទង្វើឈ្លានពានរបស់យោធាថៃ មកលើអធិបតេយ្យភាពកម្ពុជា ពីសំណាក់ថ្នាក់ដឹកនាំកម្ពុជា នៅក្នុងកិច្ចប្រជុំកំពូល ហ្វ្រង់កូហ្វូនី លើកទី២០ នៅរាជធានីភ្នំពេញ និងកិច្ចប្រជុំកំពូលអាស៊ាន នៅទីក្រុងម៉ានីល។ ភាគីថៃ បានប្រឹងប្រែងច្រានចោលការពិត ដែលថា ខ្លួនកំពុងកាន់កាប់ទឹកដីកម្ពុជា ដោយខុសច្បាប់ ដែលជាហេតុធ្វើឱ្យពលរដ្ឋខ្មែរជាង២ម៉ឺននាក់មិនអាចវិលត្រឡប់ទៅកាន់លំនៅឋាន និងទឹកដីកំណើតវិញបាន។

លើសពីនេះ ក្រសួងការបរទេសថៃ ​ថែមទាំងបានចោទប្រកាន់ទាំងបំពានថា កម្ពុជា បានប្រើប្រាស់តួនាទីជាម្ចាស់ផ្ទះចោទប្រកាន់មកលើខ្លួនក្នុងគោលបំណងបម្រើនយោបាយក្នុងស្រុក ព្រមទាំងបានអំពាវនាវឱ្យដោះស្រាយតាមយន្តការទ្វេភាគី ក្នុងចេតនាមិនចង់ឱ្យសហគមន៍អន្តរជាតិដឹងពីទង្វើឈ្លានពានរបស់ខ្លួន។ ប៉ុន្តែការពិត គឺថា អ្វីដែលកម្ពុជា បានលើកយកមកបង្ហាញនៅលើវេទិកាទាំងពីរនេះ គឺសុទ្ធសឹងតែជាការពិត និងមានភស្តុតាងជាក់ស្តែង ដែលអន្តរជាតិ បានឃើញយ៉ាងច្បាស់។

ពាក់ព័ន្ធនឹងកិច្ចប្រជុំ ហ្វ្រង់កូហ្វូនី ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានគូសបញ្ជាក់នៅក្នុងសន្និសីទសារព័ត៌មានកាលពីថ្ងៃទី១៦ ខែវិច្ឆិកា ថា ព្រឹត្តិការណ៍ប្រវត្តិសាស្ត្រនេះ គឺជាឱកាសមាសសម្រាប់កម្ពុជាក្នុងការលើកកម្ពស់កិត្យានុភាពជាតិ ពង្រឹងទំនាក់ទំនងអន្តរជាតិ និងបញ្ជូនសារដ៏មានអត្ថន័យពីរាជធានីភ្នំពេញទៅកាន់ពិភពលោក។​ ឯកឧត្តម បានសង្កត់ធ្ងន់ថា សន្តិភាព ការគោរពច្បាប់អន្តរជាតិ និងកិច្ចសន្ទនា គឺជាគ្រឹះនៃវិបុលភាពរួម និងស្ថិរភាពយូរអង្វែងសម្រាប់ពិភពលោក។

ឯកឧត្តមបានគូសបញ្ជាក់បន្ថែមថា ក្នុងនាមជាប្រទេសធ្លាប់ឆ្លងកាត់ភ្លើងសង្គ្រាម និងការបែកបាក់យ៉ាងឈឺចាប់ កម្ពុជា យល់ច្បាស់ណាស់ថា សន្តិភាពមិនមែនត្រឹមតែជាពាក្យស្លោកនោះឡើយ ប៉ុន្តែវាគឺជាមូលដ្ឋានគ្រឹះ នៃជីវិត សេចក្តីថ្លៃថ្នូរ និងការអភិវឌ្ឍ។ ម្យ៉ាងវិញទៀត ការធ្វើជាម្ចាស់ផ្ទះនេះ ក៏ជាស្ពានបើកទ្វារពង្រីកពាណិជ្ជកម្ម ទាក់ទាញវិនិយោគិន ការផ្ទេរបច្ចេកវិទ្យា និងការអភិវឌ្ឍធនធានមនុស្ស ព្រមទាំងនាំយកបទពិសោធ​ នៃការកសាងសន្តិភាពដ៏ជោគជ័យរបស់ខ្លួនទៅចែករំលែកដល់សហគមន៍អន្តរជាតិ ផងដែរ។

ដោយឡែកសម្រាប់ការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅក្នុងកិច្ចប្រជុំកំពូលអាស៊ាន ត្រូវបានក្រុមអ្នកវិភាគមើលឃើញថា ជាអំណះអំណាងដ៏មុតស្រួច មានសក្ខីកម្ម និងភស្តុតាងជាក់ស្តែង ជុំវិញការឈ្លានពាន និងការបំផ្ទុះការប៉ះទង្គិចដោយភាគីថៃ កាលពីឆ្នាំ២០២៥ កន្លងទៅ ក្នុងគោលបំណងចូលកាន់កាប់ដែនអធិបតេយ្យភាពកម្ពុជា ដោយខុសច្បាប់ ដែលពិភពលោកត្រូវតែដឹង និងកាត់ក្តីឱ្យបានត្រឹមត្រូវ៕

ដោយៈ សរ សុជាតិ




អត្ថបទបន្ទាប់


អាស៊ាន ចិន ជប៉ុន និងកូរ៉េខាងត្បូង ជំរុញឱ្យពង្រឹងសាមគ្គីភាព និងការជឿទុកចិត្តគ្នា ស្របពេលពិភពលោកប្រឈមភាពមិនប្រាកដប្រជា

ខណៈភាពមិនប្រាកដប្រជាផ្នែកសេដ្ឋកិច្ច ភាពតានតឹងភូមិសាស្ត្រនយោបាយ និងហានិភ័យនៃការផ្គត់ផ្គង់ស្បៀងអាហារ និងថាមពលកំពុងបង្កសម្ពាធកាន់តែខ្លាំងលើត…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ