ឥទ្ធិពលពហិការរបស់ពលរដ្ឋខ្មែរទាញទម្លាក់ការលក់របស់ក្រុមហ៊ុន PTT នៅកម្ពុជា ឱ្យដាំក្បាលចុះរហូតដល់៦០%

​​ក្រុមហ៊ុនប្រេងឥន្ធនៈដ៏ធំរបស់ថៃ PTT ​បាន​ត្អូញត្អែរ​ថា ការលក់របស់ខ្លួន​នៅក្នុងប្រទេសកម្ពុជា បានដាំក្បាលចុះ​យ៉ាងខ្លាំងចន្លោះពី ៥០% ទៅ ៦០% ដែលបង្ខំឱ្យ​អាជីវកម្មជាច្រើនរបស់ខ្លួន​ត្រូវបិទទ្វារ ឬប្តូរឈ្មោះហាង។ ជាក់ស្ដែងចំនួន​ស្ថានីយប្រេងឥន្ធនៈ PTT នៅកម្ពុជា បានធ្លាក់ចុះពីប្រមាណ២០០ ស្ថានីយ​មកត្រឹម៩១ស្ថានីយ គិត​​ត្រឹមចុងខែមីនា ឆ្នាំ២០២៦ ខណៈដែលចំនួន​សាខាហាងកាហ្វេ Amazon បានធ្លាក់ចុះពី១៥០សាខា មកត្រឹម១៣៦សាខា។ ទន្ទឹម​​នេះ ស្ថានីយប្រេងឥន្ធនៈ PTT ប្រមាណពី៤០ ទៅ៥០ស្ថានីយ បានប្តូរឈ្មោះទៅម៉ាក​យីហោផ្សេង បន្ទាប់ពីផ្ទុះសង្គ្រាមព្រំដែន​កម្ពុជា-ថៃ។

ទិន្នន័យបាន​បង្ហាញ​ថា នៅត្រីមាសទី១ឆ្នាំ២០២៦ ​ការលក់ប្រេងនៅក្រៅប្រទេសរបស់​ក្រុមហ៊ុន PTT បានធ្លាក់ចុះជាង១២% មកត្រឹម៥១៩លានលីត្រ ដែលភាគច្រើនដោយសារតែការបិទទ្វារនៅកម្ពុជា។ ប្រាក់ចំណូលនៅក្រៅប្រទេសរបស់​ក្រុម​ហ៊ុន​នេះ​បានធ្លាក់ចុះ៤% មកនៅត្រឹមជិត១៤ពាន់លានបាត ឬ ជាង៤២៦លានដុល្លារអាម៉េរិក ខណៈដែលប្រាក់ចំណូលសរុបរបស់ក្រុមហ៊ុន​នេះបានធ្លាក់ចុះជាង៣% មកត្រឹម៥,៤ពាន់​លានដុល្លារអាម៉េរិក។ ចំណែកឯប្រាក់ចំណេញសុទ្ធបានធ្លាក់ចុះ៤៤% មកនៅត្រឹម៧៤​លានដុល្លារអាម៉េរិក។

ទោះបីជាប្រទេសកម្ពុជា ​មាន​ចំណែក​គ្របដណ្ដប់ត្រឹមតែប្រមាណពី២% ទៅ ៣% នៃប្រាក់ចំណេញសរុបរបស់​ក្រុមហ៊ុន PTT យ៉ាងណាក្ដី ក៏ក្រុមហ៊ុនថៃ មួយ​នេះ ​បានទទួលស្គាល់ថា ជម្លោះព្រំដែន​កម្ពុជា-ថៃ បានធ្វើឱ្យប៉ះពាល់យ៉ាងខ្លាំងដល់ការលក់ផលិតផលថៃ និងប្រតិបត្តិការអាជីវកម្មនៅក្នុងប្រទេសកម្ពុជា។ ក្រុមហ៊ុន PTT បានអះអាងថា ខ្លួននឹងបន្តស្វែងរកឱកាសកំណើននៅទូទាំងអាស៊ី-ប៉ាស៊ីហ្វិក ជាពិសេសនៅក្នុងអាជីវកម្មសាកថ្មរថយន្ត​អគ្គិសនី EV និង​អាជីវកម្ម​មិនមែនប្រេង៕

ដោយ: តែម សុខុម