ស្ថានការណ៍នយោបាយនៅហ្វីលីពីនធ្លាក់ក្នុងភាពវឹកវរ ក្រោយកងកម្លាំងឡោមព័ទ្ធចាប់សមាជិកព្រឹទ្ធសភាបង្កឱ្យមានការផ្ទុះអាវុធ

ការប៉ុនប៉ងចាប់ខ្លួនសមាជិកព្រឹទ្ធសភាលោក រ៉ូណាល់ ដេឡា រូសា (Ronald dela Rosa) អតីតមេប៉ូលិសជាតិហ្វីលីពីន និងជាមេបញ្ជាការអនុវត្តសង្គ្រាមប្រឆាំងគ្រឿងញៀនដ៏ចម្រូងចម្រាសបានក្លាយជាផ្កាភ្លើង ដែលដុតកម្ដៅនយោបាយនៅហ្វីលីពីនឱ្យឆេះឡើងវិញ។ លោក ដេឡា រូសា គឺជាមនុស្សជំនិតរបស់លោក រ៉ូឌ្រីហ្គោ ឌូទែតេ ដែលបច្ចុប្បន្នកំពុងប្រឈមមុខនឹងតុលាការព្រហ្មទណ្ឌអន្តរជាតិ (ICC) ពីបទឧក្រិដ្ឋកម្មប្រឆាំងមនុស្សជាតិ។

ភាពវឹកវរបានឈានដល់ចំណុចកំពូលនៅយប់ថ្ងៃពុធ ទី១៣ ខែឧសភា នៅពេលដែលមានសំឡេងកាំភ្លើងលាន់ឮឡើងនៅក្នុងអគារព្រឹទ្ធសភា បង្កឱ្យមានការរត់គេចខ្លួនយ៉ាងភ័យខ្លាច។ ហេតុការណ៍នេះបានកើតឡើងតែប៉ុន្មានម៉ោងប៉ុណ្ណោះបន្ទាប់ពីលោក ដេឡា រូសា បានបង្ហោះសារតាមបណ្តាញសង្គមអំពាវនាវឱ្យអ្នកគាំទ្រមកជួយរូបលោក ដោយអះអាងថា កម្លាំងអនុវត្តច្បាប់កំពុងឡោមព័ទ្ធចាប់ខ្លួនលោកដល់ក្នុងអគារព្រឹទ្ធសភា ដែលជាទីកន្លែងស្នាក់នៅបណ្ដោះអាសន្ន។

ភាពចលាចលនេះបានឆ្លុះបញ្ចាំងពីការប្រេះឆាយ៉ាងធ្ងន់ធ្ងររវាងសម្ព័ន្ធភាពម៉ាកូស និង ឌូទែតេ។ ទោះបីជាធ្លាប់បានចាប់ដៃគ្នាឈ្នះឆ្នោតកាលពីឆ្នាំ២០២២ ក្តី ប៉ុន្តែទំនាក់ទំនងនេះបានប្រែជាល្អក់កកររហូតដល់មានការបញ្ជូនលោក ឌូទែតេ ទៅកាន់តុលាការអន្តរជាតិនៅទីក្រុងឡាអេ។

លោកស្រី សារ៉ា ឌូទែតេ អនុប្រធានាធិបតីហ្វីលីពីន ដែលទើបតែវិលត្រឡប់ពីសួរសុខទុក្ខលោកឪពុកនៅទីក្រុងឡាអេ បានរិះគន់រដ្ឋបាលលោក ម៉ាកូស យ៉ាងចាស់ដៃថា កំពុងប្រើប្រាស់ធនធានរដ្ឋ ដើម្បីកម្ទេចសត្រូវនយោបាយ។ លោកស្រី បានបញ្ជាក់ថា អ្វីដែលកំពុងកើតឡើងចំពោះសមាជិកព្រឹទ្ធសភា ដែលមានអភ័យឯកសិទ្ធិការពារដោយច្បាប់ គឺជាសញ្ញា នៃការរំលោភអំណាច ដើម្បីបំបិទមាត់ក្រុមអ្នក ដែលមិនយល់ស្របនឹងរដ្ឋាភិបាល។

បច្ចុប្បន្នប៉ូលិស និងឆ្មាំប្រដាប់អាវុធបានឡោមព័ទ្ធវិមានព្រឹទ្ធសភា ខណៈដែលក្រុមបាតុករបានចាប់ផ្តើមប្រមូលផ្តុំគ្នានៅខាងក្រៅ ដែលធ្វើឱ្យគេបារម្ភថា ហ្វីលីពីនអាចនឹងធ្លាក់ចូលទៅក្នុងវិបត្តិនយោបាយដ៏ជ្រៅមួយទៀត មុនការបោះឆ្នោតឆ្នាំ២០២៨ ឈានចូលមកដល់៕

ដោយៈ សរ សុជាតិ