រដ្ឋមន្ត្រីការបរទេសអាម៉េរិក លោក Marco Rubio បានប្រកាសពីការដាក់ទណ្ឌកម្មនេះ កាលពីថ្ងៃទី ១៨ ខែសីហា ឆ្នាំ២០២៦។
វិធានការនេះស្ថិតក្នុងយុទ្ធនាការរបស់រដ្ឋបាលលោក ដូណាល់ ត្រាំ ដែលមានគោលដៅដាក់សម្ពាធកាន់តែខ្លាំងទៅលើតុលាការ ICC។ តួយ៉ាង កាលពីឆ្នាំ ២០២៥ សហរដ្ឋអាម៉េរិកក៏បានដាក់ទណ្ឌកម្មលើចៅក្រម និងមន្ត្រីអយ្យការមួយចំនួនរបស់ ICC រួចហើយដែរ។
ការដាក់ទណ្ឌកម្មនេះមានន័យថា ទ្រព្យសម្បត្តិ ឬផលប្រយោជន៍ហិរញ្ញវត្ថុរបស់បុគ្គលទាំងនោះ ដែលស្ថិតនៅក្នុងសហរដ្ឋអាម៉េរិក ឬស្ថិតក្រោមប្រព័ន្ធហិរញ្ញវត្ថុអាម៉េរិកនឹងត្រូវបង្កក។ ជាមួយគ្នានេះ ការធ្វើប្រតិបត្តិការហិរញ្ញវត្ថុជាមួយពួកគេដោយបុគ្គល ឬស្ថាប័នដែលស្ថិតក្រោមច្បាប់អាម៉េរិក ក៏ត្រូវបានរឹតត្បិតផងដែរ។
តុលាការ ICC បានថ្កោលទោសចំពោះទង្វើនេះ ដោយនិយាយនៅក្នុងសេចក្តីថ្លែងការណ៍មួយថា វិធានការទាំងនេះធ្វើឱ្យប៉ះពាល់ដល់នីតិរដ្ឋ។ តុលាការ ICC បាននិយាយថា «នៅពេលដែលអ្នកអនុវត្តច្បាប់ត្រូវបានគំរាមកំហែងពីការអនុវត្តច្បាប់ នោះសណ្តាប់ធ្នាប់ផ្លូវច្បាប់អន្តរជាតិនឹងត្រូវស្ថិតក្នុងហានិភ័យ»។
ការដាក់ទណ្ឌកម្មជាបន្ដបន្ទាប់របស់អាម៉េរិក ទៅលើមន្ត្រីជាន់ខ្ពស់នៃតុលាការ ICC ក៏បានបង្កឱ្យមានការជំទាស់ពីសម្ព័ន្ធមិត្តអឺរ៉ុបមួយចំនួនផងដែរ។
គួររំឭកថា តុលាការ ICC កាលពីឆ្នាំ២០២៤ បានចេញដីការចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu ដែលជាសម្ព័ន្ធមិត្តយោធាដ៏ស្អិតល្មួតរបស់អាម៉េរិក ពាក់ព័ន្ធនឹងឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងសង្គ្រាមនៅតំបន់ហ្គាហ្សា ហើយតាំងពីពេលនោះមក សហរដ្ឋអាម៉េរិកបានដាក់សម្ពាធជាបន្ដបន្ទាប់ទៅលើតុលាការអន្តរជាតិមួយនេះ។
តុលាការ ICC មានមូលដ្ឋាននៅទីក្រុងឡាអេ ត្រូវបានបង្កើតឡើងក្នុងឆ្នាំ ២០០២ ដោយសហគមន៍អន្តរជាតិ ដើម្បីកាត់ទោសបទឧក្រិដ្ឋធ្ងន់ធ្ងរបំផុត រួមមាន អំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មឈ្លានពាន។ ទោះយ៉ាងណា សហរដ្ឋអាមេរិកមិនមែនជាសមាជិកនៃតុលាការនេះទេ៕
