បោះផ្សាយ IPO ថ្ងៃដំបូង តម្លៃភាគហ៊ុនរបស់ក្រុមហ៊ុនផលិតមនុស្សយន្ដរបស់ចិនមួយនេះ កើនឡើងដល់ទៅ ៦២៩% ប្រមូលបានមូលនិធិជាង ៩០០លានដុល្លារ

ការកើនឡើងថ្លៃខ្ពស់កប់ពពកនេះ បានធ្វើឱ្យក្រុមហ៊ុនបច្ចេកវិទ្យាចិនមួយនេះ ប្រមូលមូលនិធិពីទីផ្សារភាគហ៊ុនបានដល់ទៅជាង ៩០០លានដុល្លារអាម៉េរិក។
ការបោះផ្សាយលក់ភាគហ៊ុនរបស់ Unitree បានធ្វើឡើងនៅចំពេលដែលមហាអំណាចសេដ្ឋកិច្ច ចិន និងសហរដ្ឋអាម៉េរិកកំពុងប្រកួតប្រជែងគ្នាយ៉ាងស្វិតស្វាញ ដើម្បីក្លាយជាមហាអំណាចឈានមុខក្នុងទីផ្សារមនុស្សយន្ត និងបញ្ញាសិប្បនិម្មិត (AI)។
បច្ចុប្បន្ន មនុស្សយន្តត្រូវបានប្រើប្រាស់យ៉ាងទូលំទូលាយក្នុងរោងចក្រ ឃ្លាំង និងគេហដ្ឋាន ខណៈក្រុមហ៊ុនធំៗដូចជា Tesla, BYD និង Amazon កំពុងវិនិយោគលើមនុស្សយន្តមានជើងពីរ ដែលអាចបំពេញការងារដែលមនុស្សធ្លាប់ធ្វើ។

សូមបញ្ជាក់ថា Unitree ត្រូវបានបង្កើតឡើងក្នុងឆ្នាំ ២០១៦ ហើយបានក្លាយជាក្រុមហ៊ុនឈានមុខក្នុងវិស័យមនុស្សយន្ត ដោយផលិតឧបករណ៍ជាច្រើនប្រភេទ ចាប់ពីឧបករណ៍ចាប់សញ្ញា ដៃមនុស្សយន្ត មនុស្សយន្តមានជើងបួន រហូតដល់មនុស្សយន្តមានរាងរៅដូចមនុស្សជាដើម។
ជាច្រើនឆ្នាំមកហើយ ក្រុមហ៊ុនផលិតមនុស្សយន្ដរបស់ចិនមួយ Unitree បានក្លាយជាដៃគូប្រជែងដ៏ធំមួយនេះ របស់សហរដ្ឋអាម៉េរិក ដោយសារតែសមត្ថភាពផលិតមនុស្សយន្ដ ដែលមានមុខងារស្រដៀងគ្នានឹងមនុស្សយន្ដដែលផលិតដោយក្រុមហ៊ុនអាម៉េរិក ប៉ុន្ដែ មានតម្លៃទាបជាង។

ក្រុមហ៊ុន ដែលមានមូលដ្ឋាននៅទីក្រុងហាំងចូវ ភាគខាងកើតប្រទេសចិន មួយនេះ កំពុងដើរតួនាទីយ៉ាងសំខាន់នៅក្នុងមហិច្ឆតារបស់រដ្ឋាភិបាលចិន ក្នុងការក្លាយជាអ្នកឈានមុខគេលើពិភពលោកក្នុងបច្ចេកវិទ្យាទំនើបៗ ខណៈដែលទីក្រុងប៉េកាំងក៏បាននិងកំពុងវិនិយោគគាំទ្រជាច្រើនទៅលើឧស្សាហកម្មនេះផងដែរ៕