ប្រទេសអាស៊ាន២ កំពុងចាប់អារម្មណ៍ទិញសព្វាវុធពីជប៉ុន ក្រោយប្រទេសនេះបើកលក់ឡើងវិញ

សារព័ត៌មាន Nikkei Asia បានរាយការណ៍កាលពីថ្ងទី២២ ខែមេសា ថារដ្ឋមន្ត្រីក្រសួងការពារជាតិជប៉ុនលោក ស៊ិនជីរ៉ុ កូអ៊ីហ្ស៊ូមិ (ShinjiroKoizumi) បានលើកឡើងថា រដ្ឋាភិបាលជប៉ុននឹងធ្វើការជាមួយវិស័យការពារជាតិ ដើម្បីជំរុញការផលិតអាវុធក្នុងស្រុក បន្ទាប់ពីជប៉ុន បានលុបចោលការហាមឃាត់ការលក់អាវុធនៅក្រៅប្រទេស។ រដ្ឋមន្ត្រីរូបនេះបានចាត់ទុកចំណាត់ការនេះនឹងបង្កលក្ខណៈកាន់តែងាយស្រួលសម្រាប់បណ្ដាក្រុមហ៊ុនម៉ៅការផលិតអាវុធរបស់ក្រសួងការពារជាតិ និងការព្យាករប្រាក់ចំណូលនាពេលអនាគតនៅក្នុងការរៀបចំផែនការវិនិយោគ។

ឆ្លើយតបទៅនឹងសំណួរថា តើរដ្ឋាភិបាលនៃប្រទេសណាខ្លះ ដែលបានបង្ហាញចំណាប់អារម្មណ៍ចង់ទិញអាវុធរបស់ជប៉ុន រដ្ឋមន្ត្រីក្រសួងការពារជាតិជប៉ុនរូបនេះបានឆ្លើយថា ប្រទេសហ្វីលីពីន ឥណ្ឌូនេស៊ីនិងនូវែលសេឡង់ បានបង្ហាញចំណាប់អារម្មណ៍ ហើយជប៉ុននឹងសហការតាមមធ្យោបាយ ដែលអាចធ្វើបាន ប្រសិនបើវារួមចំណែកដល់សន្តិសុខសន្តិភាព និងស្ថិរភាព។

សូមបញ្ជាក់ថា ជាប្រវត្តិសាស្ត្រ ជប៉ុន ធ្លាប់បានហាមឃាត់ការនាំចេញអាវុធភាគច្រើនក្រោមរដ្ឋធម្មនុញ្ញសន្តិនិយមរបស់ខ្លួន ប៉ុន្តែដោយសារភាពតានតឹងជាមួយប្រទេសចិន កូរ៉េខាងជើង និងរុស្ស៊ី ជប៉ុន បានសម្រេចពង្រីកវិសាលភាពនាំចេញអាវុធធុនធ្ងន់ដូចជាយន្តហោះចម្បាំង មីស៊ីលនិងនាវាពិឃាតជាដើម។ ទោះជាយ៉ាងណា ការនាំចេញនេះនឹងត្រូវកំណត់ចំពោះតែ១៧ប្រទេស ដែលបានចុះហត្ថលេខាលើកិច្ចព្រមព្រៀងផ្ទេរបច្ចេកវិទ្យាការពារជាតិ ជាមួយជប៉ុនប៉ុណ្ណោះ ហើយជប៉ុន នៅតែរក្សាគោលការណ៍មិននាំចេញអាវុធទៅកាន់ប្រទេស ដែលកំពុងមានសង្គ្រាមផ្ទាល់នោះឡើយ។ នេះបើយោងតាមការចុះផ្សាយរបស់សារព័ត៌មាន AP៕

 ដោយ: តែម សុខុម