តម្លៃជីថ្នាំកសិកម្មហក់ឡើង៣០% តាមអំណាចថ្លៃប្រេង ខណៈថ្លៃដើមផលិតខ្ពស់កំពុងក្លាយជាបន្ទុករបស់កសិករ

មន្ត្រីសហរដ្ឋអាម៉េរិកម្នាក់បានទម្លាយឱ្យដឹងថា តាមរយៈអ៊ីមែលផ្ទៃក្នុងរបស់មន្ទីរបញ្ចកោណបង្ហាញថា សហរដ្ឋអាម៉េរិក កំពុងពិចារណាដាក់ទណ្ឌកម្មលើប្រទេសជាសម្ពន្ធមិត្តមួយចំនួន ដែលជាសមាជិក នៃអង្គការបក្សសម្ពន្ធយោធា NATO ចំពោះការមិនគាំទ្រសង្គ្រាមរបស់ខ្លួនប្រឆាំងអ៊ីរ៉ង់ ដូចជាការព្យួរប្រទេសអេស្ប៉ាញពីសមាជិកអង្គការ NATO និងការពិនិត្យឡើងវិញនូវការជួយគាំទ្ររបស់សហរដ្ឋអាម៉េរិកសម្រាប់ការអះអាងសិទ្ធិកាន់កាប់របស់អង់គ្លេសលើកោះហ្វកលែនជាដើម។

ការព្រមានចាត់វិធានការក្តៅរបស់រដ្ឋបាលលោក ដូណាល់ ត្រាំ នេះកើតឡើងក្រោយសម្ពន្ធមិត្តនានាបានបដិសេធមិនអនុញ្ញាតឱ្យកងទ័ពសហរដ្ឋអាម៉េរិក ប្រើប្រាស់មូលដ្ឋានទ័ពអាកាស និងហោះហើរចូលដែនអាកាសរបស់ខ្លួនក្នុងអំឡុងប្រតិបត្តិការវាយប្រហារទៅលើអ៊ីរ៉ង់។

លោក ត្រាំ បានរិះគន់ចំៗទៅលើមេដឹកនាំអឺរ៉ុបថា អាត្មានិយម និងមិនព្រមចូលរួមក្នុងប្រតិបត្តិការបើកច្រកសមុទ្រ Hormuz ដែលជាសរសៃឈាមសេដ្ឋកិច្ចពិភពលោក។ លោកថែមទាំងបានព្រមានជាថ្មីថា ប្រសិនបើសម្ពន្ធមិត្តនៅតែបន្តធ្វើព្រងើយកន្តើយ នោះសហរដ្ឋអាម៉េរិកអាចនឹងសម្រេចចិត្តដកខ្លួនចេញពីអង្គការ NATO តែម្ដង។

ជាការឆ្លើយតបប្រទេសអង់គ្លេស និងបារាំង បានអះអាងថា ការចូលរួមក្នុងសកម្មភាពយោធារបស់អាម៉េរិក នៅពេលនេះ នឹងរុញច្រានពិភពលោកឱ្យធ្លាក់ចូលក្នុងសង្គ្រាមទ្រង់ទ្រាយធំ ដែលមិនអាចគ្រប់គ្រងបាន។ ភាពប្រេះឆានេះបានបង្ហាញឱ្យឃើញថា សាមគ្គីភាពរបស់ NATO ដែលមានអាយុកាលរាប់សិបឆ្នាំ កំពុងស្ថិតក្នុងហានិភ័យខ្ពស់បំផុត ខណៈដែលលោក ត្រាំ បានបញ្ជាក់យ៉ាងច្បាស់ថា NATO ត្រូវតែធ្វើការងារជាក្រុម មិនមែនទុកឱ្យអាម៉េរិកហែលឆ្លងសមុទ្រភ្លើងតែម្នាក់ឯងនោះទេ៕

ដោយ: តែម សុខុម