តើបញ្ហាអ្វីអាចក្លាយជាប្រធានបទក្តៅនៅក្នុងជំនួបរវាងមេដឹកនាំចិននិងអាម៉េរិក នៅពាក់កណ្តាលខែនេះ?

លោក ស្កុត បេសសេន (Scott Bessent) រដ្ឋមន្ត្រីក្រសួងហិរញ្ញវត្ថុអាម៉េរិក បានបញ្ជាក់ថា វិបត្តិសង្គ្រាមនៅអ៊ីរ៉ង់ នឹងក្លាយជាប្រធានបទសំខាន់ក្នុងកិច្ចប្រជុំ ដែលគ្រោងធ្វើឡើងពីថ្ងៃទី១៤ ដល់ថ្ងៃទី១៥ ខែឧសភា ខាងមុខ។ កាលពីដើមសប្តាហ៍នេះ ប្រទេសចិន បានទទួលស្វាគមន៍រដ្ឋមន្ត្រីការបរទេសអ៊ីរ៉ង់ជាលើកដំបូងចាប់តាំងពីសង្គ្រាមផ្ទុះឡើងកាលពីចុងខែកុម្ភៈ ដែលនេះបានផ្ដល់ក្ដីសង្ឃឹមដល់ការឈានទៅរកកិច្ចព្រមព្រៀងសន្តិភាព ដើម្បីទាញតម្លៃប្រេងឱ្យធ្លាក់ចុះ និងរុញច្រានទីផ្សារភាគហ៊ុនឱ្យកើនឡើងវិញ។

បើតាមប្រភពពីថ្នាក់ដឹកនាំអាជីវកម្មអាម៉េរិក គិតត្រឹមថ្ងៃអង្គារ ទី៥ ខែឧសភា សេតវិមានមិនទាន់បានអញ្ជើញក្រុមនាយកប្រតិបត្តិជាន់ខ្ពស់ឱ្យចូលរួមក្នុងដំណើរទស្សនកិច្ចនេះនៅឡើយទេ ហើយបញ្ជីឈ្មោះមេដឹកនាំអាជីវកម្ម ដែលបានស្នើឡើង២៤រូបអាចនឹងត្រូវកាត់បន្ថយមកត្រឹមពាក់កណ្ដាល។ ក្នុងចំណោមអ្នក ដែលត្រូវបានគេរំពឹងថា នឹងរួមដំណើរជាមួយលោក ត្រាំ រួមមាននាយកប្រតិបត្តិក្រុមហ៊ុន Boeing និងក្រុមហ៊ុន Citi group។ ក្រុមហ៊ុន Boeing ត្រូវបានគេរំពឹងថា អាចនឹងទទួលបានការបញ្ជាទិញយន្តហោះដ៏ធំពីប្រទេសចិនជាលើកដំបូងក្នុងរយៈពេលជិត១ទសវត្សរ៍ នៅក្នុងកិច្ចប្រជុំកំពូលនេះ។

លោក ម៉ៃឃើល ហាត (Michael Hart) ប្រធានសភាពាណិជ្ជកម្មអាម៉េរិកប្រចាំទីក្រុងប៉េកាំង បានលើកឡើងថា ទិដ្ឋភាព ដែលមេដឹកនាំមហាអំណាចទាំងពីរបង្ហាញវត្តមានជាមួយគ្នា នឹងបញ្ជូនសារពិសេសមួយដល់វិស័យឯកជនថា ការធ្វើអាជីវកម្មជាមួយសហរដ្ឋអាម៉េរិក អាចនឹងត្រូវបានបើកចំហរឡើងវិញសម្រាប់ប្រទេសចិន។

ដោយឡែក ក្រសួងការបរទេសចិន បានប្រាប់ CNBC ថា ទីក្រុងប៉េកាំងនៅតែស្វាគមន៍ចំពោះការពង្រីកអាជីវកម្មរបស់សហរដ្ឋអាម៉េរិក និងសង្ឃឹមថា ក្រុមហ៊ុននានានឹងបន្តអភិវឌ្ឍទំនាក់ទំនងសេដ្ឋកិច្ចទ្វេភាគីឱ្យកាន់តែប្រសើរឡើង ខណៈដែលក្រសួងពាណិជ្ជកម្មចិន មិនទាន់ផ្ដល់ការអត្ថាធិប្បាយណាមួយនៅឡើយទេ៕

 អត្ថបទៈ សួន ឡង់ទី