តើភាពចលាចលនៅតំបន់អឺរ៉ុបបច្ចុប្បន្ន​អាចធ្វើឱ្យប៉ះដល់ការនាំចេញរបស់កម្ពុជាទៅកាន់តំបន់នេះទេ?

តាមរយៈភាពមិនច្បាស់លាស់ទាំងនេះ ក្រុមអ្នកជំនាញសេដ្ឋកិច្ចបានវាយតម្លៃថា វាកំពុងបង្កើតជាក្តីបារម្ភថ្មីមួយសម្រាប់វិស័យនាំចេញរបស់កម្ពុជាទៅកាន់តំបន់អឺរ៉ុប ដែលជាទីផ្សារនាំចេញដ៏សំខាន់មួយ នៃផលិតផលក្នុងវិស័យកាត់ដេររបស់កម្ពុជា។ តើភាពចលាចលនៅតំបន់អឺរ៉ុបបច្ចុប្បន្ន​អាចជះឥទ្ធិពលយ៉ាងណាដល់ការនាំចេញរបស់កម្ពុជាទៅកាន់តំបន់នោះនាពេលខាងមុខ?

លោកបណ្ឌិត ជ័យ តិច អ្នកសិក្សាស្រាវជា្រវសេដ្ឋកិច្ចសង្គមបានគូសបញ្ជាក់ថា តំបន់អឺរ៉ុបបច្ចុប្បន្នហាក់មានភាពចលាចលចលយ៉ាងខ្លាំង ក្រោយពីមានការផ្ទុះបាតុកម្មរបស់ពលរដ្ឋ រួមទាំងការជ្រៀតជ្រែកពីខាងក្រៅទាក់ទងនឹងការវាយប្រហារតាមប្រព័ន្ធអ៊ីនធឺណិត ដែលគំរាមកំហែងដល់សន្តិសុខសាធារណៈ និងសន្តិសុខស្បៀង។ បើតាមអ្នកជំនាញរូបនេះ ឬសគល់នៃបញ្ហាទាំងនេះ គឺបណ្តាលមកពីឥទ្ធិពលនៃបញ្ហាសង្គ្រាមនៅអឺរ៉ុបធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចក្នុងតំបន់នោះ តាមរយៈការឡើងថ្លៃប្រេងឥន្ធនៈ និងការចំណាយជីវភាពរស់នៅរបស់ពលរដ្ឋ ព្រមទាំងការខ្វះខាតថវិកាគាំពារសង្គមពីរដ្ឋ។ អ្នកជំនាញរូបនេះបានវាយតម្លៃថា ផលប៉ះពាល់ផ្នែកសេដ្ឋកិច្ចនេះអាចនឹងទាញទម្លាក់ការនាំចេញទំនិញក្នុងវិស័យកាត់ដេររបស់កម្ពុជាទៅកាន់ទីផ្សារអឺរ៉ុបនៅឆ្នាំក្រោយឱ្យធ្លាក់ចុះ ដ្បិតជីវភាពពលរដ្ឋនៅតំបន់នោះជួបការលំបាក ធ្វើឱ្យតម្រូវការប្រើប្រាស់មួយចំនួនត្រូវថមថយ។

ជាមួយគ្នានេះលោកបណ្ឌិត គី សេរីវឌ្ឍន៍ អ្នកសិក្សាស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជាយល់ឃើញថា ជុំវិញបញ្ហាសង្គ្រាមនៅតំបន់អឺរ៉ុប និងមជ្ឈិមបូព៌ានាពេល​នេះកំពុងធ្វើឱ្យប្រជាពលរដ្ឋក្នុងប្រទេសអ្នកប្រើប្រាស់រងគ្រោះធ្ងន់ធ្ងរ ដែលចង់ ឬមិនចង់ ស្ថានភាពនេះនឹងបង្កឱ្យមានការថយចុះកម្លាំងបញ្ជាទិញពីទីផ្សារកម្ពុជានាពេលខាងមុខ។ តែយ៉ាងណា អ្នកជំនាញរូបនេះយល់ថា កម្ពុជាចាំបាច់ត្រូវពង្រឹងការធ្វើពិពិធកម្មទីផ្សារ ដោយពង្រីកទីផ្សារនាំចេញរបស់ខ្លួនឱ្យកាន់តែទូលំទូលាយតាមរយៈការជំរុញទំនិញទៅកាន់ទីផ្សារសហរដ្ឋអាម៉េរិក និងបណ្តាប្រទេសផ្សេងៗទៀតដែលមិនមានជម្លោះឱ្យបានកាន់តែច្រើនថែមទៀត។

គួរបញ្ជាក់ថា តំបន់អឺរ៉ុប គឺជាទីផ្សារនាំចេញដ៏សំខាន់មួយរបស់កម្ពុជាដោយនៅក្នុងរយៈពេល៩ខែដើមឆ្នាំ២០២៦ កម្ពុជាបាននាំចេញទំនិញទៅកាន់តំបន់នេះក្នុងទំហំទឹកប្រាក់ជាង៤ពាន់លានដុល្លារកើនឡើងជាង១៤% បើធៀប​នឹងរយៈពេលដូចគ្នាកាលពីឆ្នាំមុន ខណៈកម្ពុជានាំចូលពីតំបន់អឺរ៉ុបវិញមានទំហំជាង៧រយលានដុល្លារកើនឡើងជាង១៣%។ នេះបើតាមរបាយការណ៍របស់ក្រសួងពាណិជ្ជកម្ម៕