អ្នកវិទ្យាសាស្ត្រចិន អាចបង្កើតពេជ្រ ដែលមានភាពធន់ និងស្វិតជាងពេជ្រធម្មជាតិ៦ដង

សារព័ត៌មាន VN Express បានរាយការណ៍ថា អ្នកវិទ្យាសាស្ត្រចិន បានអភិវឌ្ឍសមត្ថភាពបន្ថែមដោយអាចបង្កើតសមាសធាតុពេជ្រកែច្នៃរឹងដូចពេជ្រធម្មជាតិ ហើយថែមទាំងស្វិតជាងពេជ្រធម្មជាតិ រហូតដល់៦ដង ដែលធ្វើឱ្យវាធន់នឹងការប៉ះទង្គិច និងកាត់បន្ថយការប្រេះស្រាំយ៉ាងមានប្រសិទ្ធភាព។ ពេជ្រថ្មីនេះត្រូវបានអភិវឌ្ឍន៍ និងបង្កើតឡើងដោយក្រុមអ្នកស្រាវជ្រាវមកពីវិទ្យាស្ថានរូបវិទ្យា នៃបណ្ឌិត្យសភាវិទ្យាសាស្ត្រចិន សហការជាមួយសាកលវិទ្យាល័យ បីហាង។
ជាទូទៅពេជ្រ គឺជាសមាសធាតុដើម ដែលកើតឡើងដោយធម្មជាតិ និងរឹងបំផុតនៅលើផែនដី ហើយត្រូវបានគេប្រើយ៉ាងទូលំទូលាយក្នុងឧស្សាហកម្មសំខាន់ៗរួមមាន ការកាត់ ខួង និងប៉ូលាឧបករណ៍ផ្សេងៗ។ ប៉ុន្តែទោះជាយ៉ាងណាក៏ដោយ ពេជ្រធម្មជាតិនៅតែងាយរងការប៉ះទង្គិច សឹក និងបែកបាក់ ដូច្នេះហើយទើបក្រុមអ្នកវិទ្យាសាស្ត្រចិន បានបើកការស្រាវជ្រាវរហូតរកឃើញវិធីសាស្ត្របង្កើតពេជ្រប្រភេទថ្មី ដែលមានទាំងភាពរឹង និងភាពស្វិតខ្ពស់នេះឡើង។
បន្ទាប់ពីបង្កើតបានផលិតផលពេជ្រថ្មីនេះ ត្រូវបានគេយកទៅពិសោធន៍យ៉ាងហ្មត់ចត់ជាច្រើនដំណាក់កាលមុនពេលប្រកាសបញ្ជាក់ថា វាធន់ និងស្វិតជាងពេជ្រធម្មជាតិដល់ទៅ៦ដង។ មកដល់ពេលនេះ ប្រទេសចិន ត្រូវបានគេដឹងថា គឺជាប្រភពផលិតកម្មពេជ្រចេញពីមន្ទីរពិសោធន៍ដ៏ធំ និងចែកចាយទៅកាន់ទីផ្សារពេញពិភពលោក។ ពីមុនពេជ្រជារតនវត្ថុដ៏មានតម្លៃកប់នៅក្នុងដី ហើយក្រៅពីមានតួនាទីសំខាន់ក្នុងវិស័យឧស្សាហកម្ម និងសេវាកម្ម វាក៏ជាវត្ថុមានតម្លៃក្នុងឧស្សាហកម្មគ្រឿងអលង្ការផងដែរ ប៉ុន្តែនៅពេលនេះ ប្រជាប្រិយភាព និងតម្លៃរបស់វាហាក់មានការប្រែប្រួល បន្ទាប់ពីអ្នកវិទ្យាសាស្ត្រអាចផលិតពេជ្រដែលមានគុណភាពខ្ពស់នៅក្នុងមន្ទីរពិសោធន៍បានយ៉ាងជោគជ័យ៕

ដោយៈ សរ សុជាតិ