អាល្លឺម៉ង់ និងជប៉ុន ងាកមកចាប់ដៃគ្នាពង្រឹងសាច់ដុំយោធាឡើងវិញ បង្កការភ្ញាក់ផ្អើលដល់ពិភពលោក

រលកនៃការព្រួយបារម្ភជុំវិញការហក់ឡើង នៃឥទ្ធិពលយោធារបស់ចិន, សកម្មភាពប្រដាប់អាវុធរបស់រុស្ស៊ី, ការគំរាមកំហែងពីកូរ៉េខាងជើង និងភាពមិនប្រាកដប្រជាលើការប្តេជ្ញាចិត្តរបស់សហរដ្ឋអាម៉េរិកបានក្លាយជាកាតាលីករជំរុញឱ្យអតីតមហាអំណាចទាំងពីរនេះ សម្រេចចិត្តបង្កើនកញ្ចប់ថវិកាការពារជាតិ និងចែករំលែកបច្ចេកវិទ្យាយោធាទំនើបៗរវាងគ្នា និងគ្នា។ មេដឹកនាំនៃប្រទេសទាំងពីរ ក៏ត្រូវបានគេរំពឹងថា នឹងលើកយករបៀបវារៈនេះទៅពិភាក្សាកាន់តែស៊ីជម្រៅនៅក្នុងកិច្ចប្រជុំកំពូល G7 នៅក្នុងប្រទេសបារាំងនាសប្តាហ៍នេះផងដែរ។

គួររំឭកថា ចាប់តាំងពីបរាជ័យក្នុងសង្គ្រាមលោកលើកទី២មក អាល្លឺម៉ង់ និងជប៉ុនបានកាត់បន្ថយកម្លាំងយោធារបស់ខ្លួនស្ទើរតែទាំងស្រុង ដោយផ្ញើដង្ហើមសន្តិសុខទៅលើសហរដ្ឋអាម៉េរិក។ ប៉ុន្តែព្រឹត្តិការណ៍ឈ្លានពានរបស់រុស្ស៊ីលើអ៊ុយក្រែន ភ្លើងសង្គ្រាមនៅមជ្ឈិមបូព៌ា និងកម្ដៅនយោបាយនៅអាស៊ីបានបង្ខំឱ្យទីក្រុងប៊ែឡាំង និងទីក្រុងតូក្យូត្រូវតែភ្ញាក់រលឹក និងគិតគូរពីវាសនាការពារជាតិដោយខ្លួនឯង។

ជាក់ស្តែងអធិការបតីអាល្លឺម៉ង់លោក ហ្វ្រីដ្រិច មើស (Friedrich Merz) បានទម្លាក់កញ្ចប់ថវិកាយោធាយ៉ាងសម្បើម ខណៈដែលនាយករដ្ឋមន្ត្រីជប៉ុនលោកស្រី សាណាអិ តាកាអ៊ិឈិ (Sanae Takaichi) ក៏បានពង្រីកវិសាលភាពការពារជាតិ រួមទាំងការដាក់ពង្រាយមីស៊ីលរយៈចម្ងាយឆ្ងាយ និងការបន្ធូរបន្ថយច្បាប់នាំចេញអាវុធទៅក្រៅប្រទេស។

ទោះជាយ៉ាងណារបត់ងាករកអាវុធឡើងវិញនេះ បានបង្កឱ្យមានការជជែកដេញដោលគ្នាយ៉ាងក្តៅគគុកនៅក្នុងផ្ទៃក្នុង។ ពលរដ្ឋអាល្លឺម៉ង់ភាគច្រើនបានបង្ហាញការគាំទ្រ ខណៈដែលពលរដ្ឋជប៉ុនមួយចំនួនបានចេញមកធ្វើបាតុកម្មតវ៉ា ដោយបារម្ភថា ប្រទេសរបស់ខ្លួនអាចនឹងងាកចេញពីគោលការណ៍សន្តិភាពនិយម ដែលបានថែរក្សាអស់ជាង៨០ឆ្នាំ។

បច្ចុប្បន្នទាំងអាល្លឺម៉ង់ និងជប៉ុន កំពុងតែពង្រីកក្រសែភ្នែកមើលទៅហួសពីការពឹងផ្អែកលើសហរដ្ឋអាម៉េរិក ដោយកំពុងកសាងសម្ព័ន្ធភាពយុទ្ធសាស្ត្រថ្មីៗជាមួយបណ្តាប្រទេសជាច្រើនទៀតដូចជាអូស្ត្រាលី បារាំង ហ្វីលីភីន ឥណ្ឌូនេស៊ី និងអ៊ុយក្រែន ដើម្បីសម្របខ្លួនទៅនឹងបរិយាកាសសន្តិសុខពិភពលោក ដែលកំពុងប្រែប្រួលលឿនដូចព្យុះសង្ឃរា៕

ដោយ: តែម សុខុម