ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ថា ការចុះហត្ថលេខាលើកិច្ចព្រមព្រៀងនេះ គឺជាបើកផ្លូវក្នុងការផ្សារភ្ជាប់ទំនាក់ទំនង និងដើម្បីបង្កភាពងាយស្រួលដល់ធុរកិច្ច និងប្រតិបត្តិករនានាឱ្យមានលទ្ធភាពធ្វើកិច្ចសហការជាមួយគ្នា។ បើតាមមន្រ្តីជាន់ខ្ពស់រូបនេះ កិច្ចព្រមព្រៀងនេះនឹងផ្ដល់លទ្ធភាពដល់វិស័យឯកជនឱ្យមានជម្រើសក្នុងការហោះហើរស្របតាមស្ថានភាពដែលមានការព្រមព្រៀងគ្នា។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានចាត់ទុកតម្រាយផ្លូវអាកាសថ្មីរវាងកម្ពុជា និងសហរដ្ឋអាម៉េរិកនឹងក្លាយជាការតភ្ជាប់ការធ្វើដំណើររវាងប្រជាជន និងប្រជាជន និងបង្កភាពងាយស្រួលក្នុងការដោះដូរទំនិញរវាងប្រទេសទាំងពីរ។ ការណ៍នេះ ត្រូវបានអ្នកជំនាញរូបនេះចាត់ទុកថា វាជាឱកាសរបស់កម្ពុជាក្នុងការជំរុញកំណើនសេដ្ឋកិច្ចតាមរយៈការដឹកជញ្ជូនបានលឿន កាត់បន្ថយថ្លៃដើម និងមានការប្រកួតប្រជែងជាងមុន។
ដោយឡែកលោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជាយល់ឃើញថា ប្រសិនបើកិច្ចសហប្រតិបត្តិការអាកាសចរណ៍រវាងកម្ពុជា និងសហរដ្ឋអាម៉េរិកមានដំណើរការល្អ នោះវានឹងផ្ដល់ផលប្រយោជន៍ដល់ការអភិវឌ្ឍសេដ្ឋកិច្ច និងទេសចរណ៍ ព្រមទាំងវិស័យផ្សេងៗទៀតរបស់ប្រទេសទាំងពីរ។
សូមបញ្ជាក់ថា កម្ពុជា-អាម៉េរិកបានចុះហត្ថលេខាលើកិច្ចព្រមព្រៀងជាផ្លូវការបើកចំហជើងមេឃដឹកជញ្ជូនតាមផ្លូវអាកាសកាលពីថ្ងៃទី៣០ ខែមិថុនា ក្រោមក្ដីរំពឹងថា នឹងនាំមកនូវការទំនាក់ទំនងដឹកជញ្ជូនតាមផ្លូវអាកាសរវាងប្រទេសទាំងពីរឈានទៅរកស្តង់ដាខ្ពស់៕
អត្ថបទ៖ បូ ដូឡា,រូបភាព ឯកសារ
