កម្ពុជាទទួលបានគម្រោងវិនិយោគចំនួន១៤៦ ជាមួយទុនសរុបប្រមាណ២,៥ពាន់លានដុល្លារនៅ៣ខែឆ្នាំ២០២៦
នៅក្នុងរយៈពេល៣ខែដំបូងដើមឆ្នាំ២០២៦នេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចុះបញ្ជីគម្រោងវិនិយោគសរុបចំនួន១៤៦គម្រោង ដែលមានទុនវិនិ…
ការចរចាសន្តិភាពរវាងសហរដ្ឋអាម៉េរិក និងអ៊ីរ៉ង់ អាចនឹងចាប់ផ្តើមឡើងវិញឆាប់ៗនេះ ទោះជាអាម៉េរិក បិទខ្ទប់កំពង់ផែអ៊ីរ៉ងថ់ យ៉ាងណាក្ដី។ ប្រធានាធិបតីអាម៉េរិក លោក ដូណាល់ ត្រាំ និយាយថា វឌ្ឍនភាពនៃការចរចាសន្តិភាពជាមួយអ៊ីរ៉ង់ អាចកើតឡើងក្នុងរយៈពេលប៉ុន្មានថ្ងៃខាងមុខ ខណៈដែលអនុប្រធានាធិបតីអាម៉េរិក លោក JD Vance ព្រមានថា ការមិនទុកចិត្តគ្នាយ៉ាងខ្លាំងរវាងភាគីទាំងពីរពិបាកនឹងសម្រេចបានកិច្ចព្រមព្រៀងឆាប់រហ័ស។
ទោះបីជាអ៊ីរ៉ង់ បានរិះគន់សហរដ្ឋអាម៉េរិក យ៉ាងខ្លាំងចំពោះការបិទខ្ទប់ផ្លូវចេញចូលទៅកាន់កំពង់ផែនានារបស់ខ្លួនយ៉ាងណាក្ដី ក៏សញ្ញានៃការចរចាការទូតឡើងវិញបានជួយធ្វើឱ្យប្រេងធ្លាក់ថ្លៃ។
ចាប់តាំងពីសង្គ្រាមអ៊ីរ៉ង់ បានចាប់ផ្តើមផ្ទុះឡើងនៅថ្ងៃសៅរ៍ ទី២៨ ខែកុម្ភៈ ឆ្នាំ២០២៦ មក មនុស្សរហូតដល់ទៅប្រមាណ ៥,០០០ នាក់បានបាត់បង់ជីវិត ហើយអ៊ីរ៉ង់ បានបិទច្រកសមុទ្រ Hormuz ដែលរហូតដល់ទៅប្រមាណ ២០% នៃការផ្គត់ផ្គង់ប្រេងពិភពលោកត្រូវដឹកឆ្លងកាត់ទីនេះ បណ្ដាលឱ្យផ្ទុះវិបត្តិថាមពលទូទាំងពិភពលោក។
បញ្ហាធំបំផុតនៅក្នុងការចរចា គឺកម្មវិធីអាវុធនុយក្លេអ៊ែររបស់អ៊ីរ៉ង់ ដោយសហរដ្ឋអាម៉េរិក ចង់ឱ្យអ៊ីរ៉ង់ បោះបង់ទាំងស្រុងនូវកម្មវិធីអាវុធនុយក្លេអ៊ែរដែលអ៊ីរ៉ង់ ខំកសាងរយៈពេល ២០ ឆ្នាំមកនេះ និងដកហូតអ៊ុយរ៉ាញ៉ូមដែលចម្រាញ់បានទាំងអស់ ខណៈដែលអ៊ីរ៉ង់ មានឆន្ទៈផ្អាកកម្មវិធីនុយក្លេអ៊ែរត្រឹមតែ ៣ ទៅ ៥ ឆ្នាំប៉ុណ្ណោះ ហើយចង់ឱ្យសហរដ្ឋអាម៉េរិក ដកទណ្ឌកម្ម។
ប្រភពព័ត៌មាននានាបានទម្លាយឱ្យដឹងថា ការចរចានៅពីក្រោយឆាកថ្មីៗនេះបានបង្រួមគម្លាតដែលនាំឱ្យភាគីទាំងពីរខិតជិតឈានទៅសម្រេចបានកិច្ចព្រមព្រៀង ប៉ុន្តែមិនទាន់មានការបញ្ជាក់ពីកាលបរិច្ឆេទ ឬ កិច្ចព្រមព្រៀងសម្រេចចុងក្រោយនៅឡើយទេ៕
