​តើកម្ពុជា អាចសម្រេចគោលដៅកែច្នៃគ្រាប់ស្វាយចន្ទីឱ្យបាន២៥% នៅត្រឹម​ឆ្នាំ២០២៧ បានដែរទេ?

លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា ទោះបីជាកម្ពុជា ផលិតគ្រាប់ស្វាយចន្ទីឆៅបានប្រមាណ១លានតោនក្នុង១ឆ្នាំៗក៏ដោយ ប៉ុន្តែមូលដ្ឋានកែច្នៃគ្រាប់ស្វាយចន្ទីក្នុងស្រុកហាក់មានកម្រិតទាបនៅឡើយមកទល់ពេលនេះ។ តែទោះជាយ៉ាងណា ប្រធានសមាគមរូបនេះ យល់ឃើញថា ប្រសិនបើសួនកសិ-ឧស្សាហកម្មស្វាយចន្ទីកំពង់ធំ អាចលេចចេញជារូបរាងបានលឿនក្នុងពេលដ៏ខ្លីខាងមុខនេះ នោះមហិច្ឆតារបស់រាជរដ្ឋាភិបាលក្នុងការកែច្នៃគ្រាប់ស្វាយចន្ទីក្នុងស្រុកឱ្យបាន២៥% នៅត្រឹមឆ្នាំ២០២៧ ទំនងជាអាចទៅរួច។ បើតាមអ្នកជំនាញរូបនេះ បច្ចុប្បន្នសួនកសិ-ឧស្សាហកម្មស្វាយចន្ទីកំពង់ធំ ត្រូវបានរាជរដ្ឋាភិបាលកំពុងគិតគូររៀបចំហេដ្ឋារចនាសម្ព័ន្ធជាបណ្តើរៗហើយ។

ដោយឡែក លោក សុខ សុថា ស្ថាបនិក និងជានាយកប្រតិបត្តិសមាគមសហព័ន្ធកសិករកម្ពុជា នៃអ្នកផលិតកសិកម្មយល់ឃើញថា ផ្អែកតាមស្ថានការណ៍ នៃភាពមិនច្បាស់លាស់ទាំងក្នុង និងខាងក្រៅនាពេលបច្ចុប្បន្ននេះ កម្ពុជា ទំនងជាមិនអាចឈានទៅសម្រេចគោលដៅកែច្នៃគ្រាប់ស្វាយចន្ទីឱ្យបាន២៥% នៅឆ្នាំ២០២៧ នោះទេ។ បើតាមអ្នកជំនាញរូបនេះ ក្រៅពីបញ្ហាតម្លៃអគ្គិសនី និងថ្លៃដើមផលិតកម្មខ្ពស់ សមត្ថភាពប្រមូលទិញគ្រាប់ស្វាយចន្ទីពីកសិករ និងសមត្ថភាពកែច្នៃនៅមានកម្រិត គួបផ្សំបញ្ហាការិយាធិបតេយ្យ ដែលបង្កនូវភាពស្មុគស្មាញ ក៏ជាបញ្ហាប្រឈមដែលធ្វើឱ្យសមត្ថភាពកែច្នៃគ្រាប់ស្វាយចន្ទីក្នុងស្រុកនៅមានកម្រិត និងមិនអាចប្រកួតប្រជែងបាននៅលើទីផ្សារទាំងក្នុងប្រទេស តំបន់ និងពិភពលោកផងដែរ។ បើតាមអ្នកជំនាញរូបនេះ រាជរដ្ឋាភិបាល គួរតែកែសម្រួល និងមានគោលនយោបាយជាតិ ជំនួយឧបត្ថម្ភធនច្បាស់លាស់បន្ថែម ដើម្បីឈានទៅសម្រេចគោលនយោបាយស្តីពីស្វាយចន្ទីឆ្នាំ២០២២-២០២៧។

គួរជម្រាបថា បច្ចុប្បន្នកម្ពុជា មានរោងចក្រសហគ្រាសកែច្នៃគ្រាប់ស្វាយចន្ទីប្រមាណជាង៥០ ក្នុងនោះចំនួន៦ ជារោងចក្រធុនមធ្យម ដែលមានសមត្ថភាពផលិតចន្លោះពី៧ពាន់តោនទៅ១ម៉ឺន៤ពាន់តោនក្នុង១ឆ្នាំ ខណៈជាង៤០សហគ្រាសជាសិប្បកម្មលក្ខណៈគ្រួសារតូចៗ។ បើយោងតាមទិន្នន័យពីសមាគមស្វាយចន្ទីកម្ពុជា គិតត្រឹមឆ្នាំ២០២៥ កម្ពុជា មានលទ្ធភាពកែច្នៃគ្រាប់ស្វាយចន្ទីឆៅបានត្រឹមតែប្រមាណ២ម៉ឺន៥ពាន់តោនប៉ុណ្ណោះក្នុងមួយឆ្នាំ ដែលជាតួលេខទាបមួយបើធៀបនឹងទិន្នផល១លានតោន ដែលកម្ពុជា ផលិតបានក្នុង១ឆ្នាំៗ។ យោងតាមទិន្នន័យក្រៅផ្លូវការរបស់សមាគមស្វាយចន្ទីកម្ពុជា នៅក្នុងរយៈពេល៦ខែដើមឆ្នាំ២០២៦ កម្ពុជា នាំចេញគ្រាប់ចន្ទីឆៅទៅវៀតណាម បានជាង១លានតោនជាមួយទឹកប្រាក់ជាង១ពាន់៧រយលានដុល្លា កើនឡើងជិត៣០% បើធៀបនឹងរយៈពេលដូចគ្នាកាលពីឆ្នាំមុន៕