ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេស កត់សម្គាល់ឃើញថា មកទល់ពេលនេះសកម្មភាពដឹកទំនិញចេញចូលកំពង់ផែស្វយ័តក្រុងព្រះសីហនុ ហាក់មានភាពប្រសើរជាងមុន ពោលគឺមិនមានអ្វីត្រូវរាំងស្ទះខ្លាំងគួរឱ្យបារម្ភនោះទេ។ បើតាមអ្នកជំនាញរូបនេះ ការកើនឡើងថ្លៃដឹកជញ្ជូន និងពេលវេលាក្នុងដឹកជញ្ជូនទំនិញចេញ-ចូល មិនមែនដោយសារភាគីកំពង់ផែនោះទេ តែវាបានកើតឡើងដោយកត្តាពីខាងក្រៅ ពិសេសការកើនឡើងថ្លៃប្រេងឥន្ធនៈ និងបញ្ហាប្រឈមក្នុងការដឹកជញ្ជូនតាមផ្លូវទឹកអន្តរជាតិ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ចាប់តាំងពីប្រទេសថៃ បានបិទព្រំដែនគោកជាឯតោភាគីរួចមកមានក្រុមហ៊ុនជប៉ុន ដែលមានមូលដ្ឋានក្នុងប្រទេសថៃ បានបង្វែរការដឹកជញ្ជូនវត្ថុធាតុដើមមកកម្ពុជា តាមផ្លូវទឹក។ ការណ៍នេះបានធ្វើឱ្យការដឹកជញ្ជូនត្រូវចំណាយពេលវេលាយូរជាងមុន និងមានការឡើងថ្លៃមួយកម្រិត ស្របពេលតម្លៃប្រេងឥន្ធនៈអន្តរជាតិ ក៏មានការឡើងថ្លៃផងដែរ។ យ៉ាងណាមិញ អ្នកឧកញ៉ា លឹម ហេង សង្កត់ធ្ងន់ថា ស្ថិតក្នុងស្ថានភាពនេះកំពង់ផែស្វយ័តក្រុងព្រះសីហនុ គួរពន្លឿននីតិវិធី ដើម្បីសម្រួលដល់ទំនិញនានាកុំឱ្យមានការកកស្ទះ បើពុំដូច្នោះទេវាអាចធ្វើឱ្យប៉ះពាល់ដល់ដំណើរខ្សែច្រវាក់ផលិតកម្មនៅកម្ពុជា។
បើយោងតាមរបាយការណ៍របស់កំពង់ផែស្វយ័តក្រុងព្រះសីហនុ នៅត្រីមាសទី១ ឆ្នាំ២០២៦ កំពង់ផែស្វយ័តក្រុងព្រះសីហនុ ទទួលបានបរិមាណទូកុងតឺន័រចេញចូលសរុបជាង៣៧ម៉ឺន TEUs កើនឡើងជាង៣៨% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះលំហូរទំនិញនាំចេញពីកម្ពុជា ទៅកាន់ប្រទេសថៃ បានកើនឡើងជាង៣៣% ខណៈការនាំចូលទំនិញពីថៃ មកវិញ មានការធ្លាក់ចុះជាង២០% បើធៀបនឹងរយៈពេលដូចគ្នាកាលពីត្រីមាសទី៤ឆ្នាំមុន៕
អត្ថបទ៖ បូ ដូឡា
