លទ្ធផលសិក្សាមួយបង្ហាញថា កសិករថៃ ជាងពាក់កណ្ដាល គ្មានលទ្ធភាពដោះបំណុលរួច ទោះប្រឹងសងដល់ស្លាប់

ការសិក្សារបស់វិទ្យាស្ថាន អ៊ុងផាខន សម្រាប់ការស្រាវជ្រាវសេដ្ឋកិច្ច បានបង្ហាញថា រហូតដល់ទៅប្រមាណ៥២% នៃកូនបំណុលជាកសិករថៃជិត៤លាននាក់ នឹងគ្មានលទ្ធភាពសងបំណុលរបស់ពួកគេរួចនោះឡើយទោះជាសងមួយជីវិតក៏ដោយ។ វិទ្យាស្ថាននេះបានលើកឡើងថា កសិករថៃ ជាច្រើននឹងសងបំណុលរួចនៅក្រោយវ័យ៧០ឆ្នាំ ជាវ័យដែលសមត្ថភាពរកប្រាក់ចំណូលរបស់ពួកគេបានធ្លាក់ចុះខ្លាំង រីឯកម្លាំងក៏ចុះខ្សោយ និងហ៊ុមព័ទ្ធដោយជំងឺ។

ក្រុមអ្នកស្រាវជ្រាវបានគូសបញ្ជាក់ថា បញ្ហានេះរីកកាន់តែធំដោយសារសមត្ថភាពសងប្រាក់កម្ចីចុះខ្សោយ និងគំរូសងប្រាក់មិនល្អ។ ប្រាក់ចំណូលរបស់កសិករថៃ គឺអាចរកបានតាមរដូវ កាល ប៉ុន្តែការបង់ប្រាក់កម្ចីត្រូវបានកំណត់ឱ្យបង់ទៀងទាត់ជាប្រចាំ ដែលធ្វើឱ្យកសិក សងទាំងត្រដាបត្រដួស។

នៅប៉ុន្មានឆ្នាំចុងក្រោយនេះ និន្នាការនៃការបង់តែការប្រាក់ដោយមិនរំលស់ប្រាក់ដើមបានក្លាយជារឿងធម្មតាទៅហើយ។ ក្នុងរយៈពេល៨ឆ្នាំកន្លងមកនេះ កសិករថៃ ដែលបង់តែការប្រាក់បានកើនឡើងពី ២០% ដល់ជាងពាក់កណ្តាល ខណៈដែលមានតែផ្នែកតូចមួយប៉ុណ្ណោះ ដែលមានលទ្ធភាពបង់រំលស់ប្រាក់ដើម។

ការសិក្សាបានរកឃើញថា កម្រិតបំណុល ក៏បានកើនឡើងផងដែរ។ពេលនេះក្នុងកសិករថៃម្នាក់ ជាមធ្យមជំពាក់បំណុលប្រមាណជាង៧,៧០០ដុល្លារអាម៉េរិក ដោយកសិករជាច្រើនជំពាក់ច្រើនជាងនេះឆ្ងាយ ដែលធ្វើឱ្យមួយចំនួនធំជាប់បំណុលរយៈពេលវែង។

វិទ្យាស្ថានស្រាវជ្រាវសេដ្ឋកិច្ចខាងលើបានព្រមានថា វិធានការសង្គ្រោះរយៈពេលខ្លីមិនគ្រប់គ្រាន់ទេ ហើយអំពាវនាវឱ្យមានដំណោះស្រាយរយៈពេលវែង រួមទាំងការវិនិយោគកាន់តែប្រសើរ កិច្ចសហប្រតិបត្តិការកាន់តែរឹងមាំ និងការប្រើប្រាស់បច្ចេកវិទ្យា ដើម្បីជួយកសិករថៃគ្រប់គ្រងនិងសងបំណុលរបស់ពួកគេឱ្យបានល្អ៕

ដោយ: តែម សុខុម