មន្ត្រីជំនាញសុខាភិបាលថៃ បានឲ្យដឹងថា ថ្នាំនេះ វាមានផ្ទុកសារធាតុគីមីហាមឃាត់ ស៊ីប៊ុយត្រាមីន (Sibutramine) ដែលជាថ្នាំពុលបំផ្លាញបេះដូង និងអាចសម្លាប់មនុស្សបានក្នុងមួយប៉ប្រិចភ្នែក។ នេះបើយោងតាមការចុះផ្សាយរបស់កាសែត Bangkok Post។
កងកម្លាំងចម្រុះ និង មន្ត្រីសុខាភិបាលថៃ បានឆ្មក់ចូលត្រួតពិនិត្យទីតាំងផលិត និងចែកចាយថ្នាំសម្រកទម្ងន់ខុសច្បាប់ចំនួន៤កន្លែងធំៗ នៅក្នុងខេត្តសាខុន ណាខន (Sakon Nakhon) និង ខេត្តនុនថៈប៊ូរី ដោយរឹបអូសបានថ្នាំសម្រកទម្ងន់សង្ស័យចំនួន ១៨កេសធំ។ ក្រុមភ្នាក់ងារស៊ើបអង្កេតបានតាមដានស្វែងរកប្រភពមេខ្លោង តាមរយៈគណនីអ្នកលក់តាមអនឡាញ រួមទាំងទីតាំងលក់នៅលើ TikTok ដែលជនរងគ្រោះបានកុម្ម៉ង់ទិញយកមកលេបធ្វើឲ្យបាត់បង់ជីវិត។
អាជ្ញាធរថៃ បានបញ្ជាក់ថា ថ្នាំគ្រាប់ស្តេចសម្រកទម្ងន់ បាស្គី នេះ មិនបានចុះបញ្ជី ឬទទួលស្គាល់ដោយរដ្ឋបាលគ្រប់គ្រងចំណីអាហារ និងឱសថថៃ នោះឡើយ។ ហើយតាមប្រវត្តិ នៃការពិនិត្យកន្លងមក ថ្នាំម៉ាកនេះតែងតែត្រូវបានរកឃើញថា មានលួចលាក់ផ្សំសារធាតុ ស៊ីប៊ុយត្រាមីន ដែលជាសារធាតុគីមីសម្រកទម្ងន់ខុសច្បាប់ និងត្រូវបានហាមឃាត់ជាដាច់ខាតនៅលើពិភពលោក។ ក្រោយការបង្ក្រាប វត្ថុតាងទាំងអស់ត្រូវបានបញ្ជូនទៅធ្វើតេស្តនៅមន្ទីរពិសោធន៍ ដែលអាចនឹងរុញច្រានឱ្យអ្នកផលិត អ្នកចែកចាយ និងអ្នកឡាយលក់តាមអនឡាញត្រូវប្រឈមមុខនឹងទោសព្រហ្មទណ្ឌយ៉ាងធ្ងន់ធ្ងរ។
រដ្ឋបាលគ្រប់គ្រងចំណីអាហារ និងឱសថថៃ បានចេញការព្រមានទៅកាន់អ្នកប្រើប្រាស់ឱ្យបញ្ឈប់ការទិញថ្នាំសុខភាព ឬថ្នាំសម្រកទម្ងន់តាមអនឡាញ ដែលគ្មានប្រភពច្បាស់លាស់។ អ្នកជំនាញសុខាភិបាលបានសង្កត់ធ្ងន់ថា សារធាតុ ស៊ីប៊ុយត្រាមីន នេះ នឹងចូលទៅវាយប្រហាររាងកាយ បង្កើនហានិភ័យនៃជំងឺលើសឈាម ធ្វើឱ្យបេះដូងលោតខុសចង្វាក់ គាំងបេះដូង និងបង្កផលវិបាកធ្ងន់ធ្ងររហូតដល់បាត់បង់ជីវិតភ្លាមៗដោយមិនដឹងខ្លួន ជាពិសេសចំពោះអ្នកដែលមានជំងឺបេះដូង ឬសរសៃឈាម។
តាមរយៈហេតុការដ៏រន្ធត់នេះ វាក៏ជាកញ្ចក់ឆ្លុះបញ្ចាំង និងជាសារដាស់តឿនសម្រាប់ប្រជាពលរដ្ឋខ្មែរទាំងអស់ទូទាំងប្រទេស ជាពិសេសអ្នកចូលចិត្តប្រើថ្នាំសម្រកទម្ងន់ដោយមិនឆ្លងកាត់ ការហាត់ប្រាណ និង គ្រប់គ្រងរបបអាហារឲ្យបានល្អ។ បច្ចុប្បន្នមានប្រជាពលរដ្ឋខ្មែរមិនតិចឡើយ ដែលកំពុងចាញ់បោកការផ្សាយពាណិជ្ជកម្មភូតភរ បំផ្លើសការពិតរឿងស្រកទម្ងន់លឿនក្នុងរយៈពេលប៉ុន្មានថ្ងៃ ដោយសុខចិត្តចំណាយលុយទិញថ្នាំ ដែលគ្មានច្បាប់អនុញ្ញាតយកមកលេបទាំងប្រថុយប្រថាន។ ករណីស្លាប់នៅប្រទេសថៃនេះ គឺជាសក្ខីកម្មបញ្ជាក់ថា ការសម្រកទម្ងន់ដោយការលេបថ្នាំគ្មានប្រភព និងគ្មានការត្រួតពិនិត្យច្បាស់លាស់ មិនមែនជាការទិញភាពស្រស់ស្អាតនោះទេ ប៉ុន្តែវាជាការដើរទៅរកសេចក្តីស្លាប់ដោយស្ម័គ្រចិត្ត៕
ដោយ: តែម សុខុម
