ប្រធានមូលនិធិរូបិយវត្ថុអន្តរជាតិ លោកស្រី គ្រីស្តាលីណា ចងជីវ៉ា បានថ្លែងនៅទីស្នាក់ការកណ្តាលមូលនិធិរូបិយវត្ថុអន្តរជាតិថា ភាពមិនស្ថិតស្ថេរ និងការប្រែប្រួលឡើងចុះយ៉ាងខ្លាំង នៃទីផ្សារបច្ចេកវិទ្យានាពេលនេះទំនងជានឹងបន្តកើតមានក្នុងរយៈពេលវែង។ ភាពមិនប្រាកដប្រជានេះនឹងរុញច្រានឱ្យបេសកកម្មរបស់ធនាគារកណ្តាលនានាកាន់តែស្មុគស្មាញ និងជួបប្រឈមខ្លាំងក្នុងខណៈពេលដែលហានិភ័យប្រឆាំងនឹងស្ថិរភាពតម្លៃកំពុងកើនឡើងឥតឈប់ឈរ។
ការធ្លាក់ចុះយ៉ាងគំហុក នៃតម្លៃភាគហ៊ុនបច្ចេកវិទ្យា បានបង្កផលប៉ះពាល់យ៉ាងធ្ងន់ធ្ងរដល់ទីផ្សារសកលលោក ក្រោយមានក្តីបារម្ភថា ជ័យជម្នះរបស់គណបក្សប្រជាធិបតេយ្យនៅក្នុងការបោះឆ្នោតពាក់កណ្តាលអាណត្តិនៅសហរដ្ឋអាម៉េរិកអាចនឹងឈានទៅរកការរឹតបន្តឹងច្បាប់ និងការត្រួតពិនិត្យយ៉ាងតឹងរ៉ឹងលើវិស័យ AI ព្រមទាំងពន្យឺតការសាងសង់មជ្ឈមណ្ឌលទិន្នន័យ។ កត្តានេះបានរុញច្រានឱ្យក្រុមវិនិយោគិនដកថយពីភាគហ៊ុនបច្ចេកវិទ្យា ហើយងាកទៅវិនិយោគលើបណ្ណបំណុលជំនួសវិញ។
ភាពច្របូកច្របល់ផ្នែកនយោបាយនេះបានបន្ថែមសម្ពាធយ៉ាងធ្ងន់ធ្ងរលើទីផ្សារពាណិជ្ជកម្ម AI ដែលកំពុងរង្គោះរង្គើស្រាប់ទៅហើយ ដោយសារតែមហាជនចាប់ផ្តើមសង្ស័យលើផលចំណេញពិតប្រាកដ បើធៀបនឹងការចំណាយថវិកាដ៏មហាសាលលើហេដ្ឋារចនាសម្ព័ន្ធ AI។ ការដកថយរបស់វិនិយោគិននេះ បានបង្កើតឱ្យមានការទាមទារប្រាក់តម្កល់បន្ថែម និងបង្កក្តីបារម្ភខ្លាំងដល់ទាំងវិនិយោគិនទូទៅ ព្រមទាំងមូលនិធិការពារហានិភ័យ។
ប្រធានមូលនិធិរូបិយវត្ថុអន្តរជាតិ បានគូសបញ្ជាក់ថា ទោះបីជាកំណើន នៃការវិនិយោគលើ AI កំពុងជួយជំរុញសេដ្ឋកិច្ចក្នុងប្រទេសមួយចំនួន និងជួយទប់ទល់នឹងផលប៉ះពាល់អវិជ្ជមាន នៃវិបត្តិផ្គត់ផ្គង់ប្រេង ដែលបង្កឡើងដោយសង្គ្រាមនៅមជ្ឈិមបូព៌ាក៏ដោយ ប៉ុន្តែវាក៏បានបង្កើតជាសម្ពាធអតិផរណាថ្មី និងបង្កការគំរាមកំហែងដល់ស្ថិរភាពហិរញ្ញវត្ថុផងដែរ។
កាលពីខែមុន IMF បានចេញការព្រមានរួចមកហើយថា ប្រសិនបើរលកនៃការវិនិយោគលើ AI ត្រូវជួបការអាក់ខាន ឬឈានដល់ទីបញ្ចប់ភ្លាមៗ ផ្សំផ្គុំជាមួយសង្គ្រាមនៅមជ្ឈិមបូព៌ាដែលបន្តអូសបន្លាយ វានឹងរុញច្រានឱ្យតម្លៃទ្រព្យសកម្មធ្លាក់ចុះយ៉ាងគំហុក។
បើយោងតាមការចុះផ្សាយរបស់ទីភ្នាក់ងារសារព័ត៌មាន Reuters គណបក្សប្រជាធិបតេយ្យកំពុងរៀបចំផែនការដាក់ចេញនូវកញ្ចប់ច្បាប់ថ្មីៗជាច្រើន ដើម្បីគ្រប់គ្រង និងរឹតបន្តឹងលើប្រព័ន្ធ AI ព្រមទាំងការអភិវឌ្ឍមជ្ឈមណ្ឌលទិន្នន័យនៅពេលពួកគេឡើងកាន់កាប់អំណាចលើសភាអាម៉េរិក នាខែមករា ខាងមុខនេះ៕
អត្ថបទៈ សួន ឡង់ទី
