ការសម្រេចបាននូវកិច្ចព្រមព្រៀងសន្តិភាពបណ្តោះអាសន្នរវាងសហរដ្ឋអាម៉េរិក និងអ៊ីរ៉ង់បានក្លាយជាឱសថទិព្វជួយដាស់ទីផ្សារពាណិជ្ជកម្ម និងហិរញ្ញវត្ថុពិភពលោកឱ្យមានដង្ហើមឡើងវិញ។ ជាក់ស្តែងទីផ្សារភាគហ៊ុនសកលបានស្ទុះងើបឡើងយ៉ាងខ្លាំង ខណៈតម្លៃប្រេងឥន្ធនៈបានធ្លាក់ចុះ ដែលជាសញ្ញាដ៏ល្អសម្រាប់កាត់បន្ថយសម្ពាធអតិផរណា។
ទីផ្សារភាគហ៊ុននៅតំបន់អឺរ៉ុបបានកើនឡើង១,៧% ខណៈនៅសហរដ្ឋអាម៉េរិកបានស្ទុះឡើង១,៨%។ ដោយឡែកនៅតំបន់អាស៊ី ទីផ្សារភាគហ៊ុនជប៉ុនបានហក់ឡើងខ្ពស់រហូតដល់៥,៤% ហើយកូរ៉េខាងត្បូងហក់ឡើងដល់៥,៦%។ ស្ថិតក្នុងស្ថានភាពនេះ ធនាគារកណ្តាលរបស់ប្រទេសធំៗរួមមានសហរដ្ឋអាម៉េរិក ចក្រភពអង់គ្លេស ជប៉ុន អូស្ត្រាលី ស្វីស ស៊ុយអែត និងន័រវែស កំពុងដុតដៃដុតជើងសិក្សា និងពិចារណាឡើងវិញនូវគោលនយោបាយហិរញ្ញវត្ថុរបស់ខ្លួន ដើម្បីជំរុញកំណើនសេដ្ឋកិច្ច។
ដោយឡែកសម្រាប់ធនាគារកណ្តាលសហរដ្ឋអាម៉េរិកត្រូវបានគេរំពឹងថា នឹងនៅតែរក្សាអត្រាការប្រាក់ក្នុងរង្វង់៣,៥% ទៅ ៣,៧៥% ដដែលសិន ដោយលោក ខេវិន វាស់ (Kevin Warsh) ប្រធានធនាគារកណ្តាលអាម៉េរិក ដែលទើបតែត្រូវបានតែងតាំងដោយប្រធានាធិបតីលោក ដូណាល់ ត្រាំ កំពុងស្ថិតក្នុងដំណាក់កាលស្ទាបស្ទង់ និងវាយតម្លៃពីស្ថានភាពសេដ្ឋកិច្ចរបស់អាម៉េរិក។
ងាកមកមើលទីផ្សារថាមពលវិញតម្លៃប្រេងឆៅប្រភេទ Brent នៅក្នុងទីផ្សារអន្តរជាតិ បានធ្លាក់ចុះមកនៅត្រឹមជាង៨៣ដុល្លារក្នុងមួយបារ៉ែល មានការធ្លាក់ចុះ៤,៧% ខណៈប្រេងឆៅនៅលើទីផ្សារអាម៉េរិកបានធ្លាក់ចុះមកនៅត្រឹម៨០ដុល្លារក្នុងមួយបារ៉ែលមានការធ្លាក់ចុះ៥,៥% ដែលនេះជាដំណឹងដ៏រីករាយសម្រាប់អ្នកប្រើប្រាស់ជុំវិញពិភពលោក។ ជាមួយគ្នានេះ តម្លៃមាសដែលជាទ្រព្យសម្បត្តិសុវត្ថិភាពបានកើនឡើងប្រមាណ២,៥% ដោយហក់ឡើងដល់៥,១៨៦ដុល្លារក្នុង១តម្លឹង៕
ដោយៈ សរ សុជាតិ
