នៅក្នុងដំណាក់កាលដំបូង សេវាកម្ម Starlink នឹងត្រូវបំពាក់លើយន្តហោះរបស់ក្រុមហ៊ុន Vietjet ចំនួន ១២០ គ្រឿង ដែលរួមមានយន្តហោះ Airbus A321/Boeing 737 ចំនួន ១០០ គ្រឿង និងយន្តហោះ Airbus A330 ចំនួន ២០ គ្រឿង។ លើសពីនេះ ក្រុមហ៊ុន Vietjet ក៏មានគម្រោងបំពាក់ប្រព័ន្ធអ៊ីនធឺណិតល្បឿនលឿននៅលើយន្តហោះទាំងអស់ដែលនឹងបញ្ជាទិញនៅពេលអនាគតផងដែរ ដើម្បីពង្រីកការតភ្ជាប់បណ្តាញអ៊ីនធឺណិតឱ្យគ្របដណ្តប់លើបណ្តាញហោះហើរទាំងក្នុងស្រុក និងអន្តរជាតិរបស់ខ្លួន។
ក្នុងពេលឆាប់ៗខាងមុខនេះ អ្នកដំណើររបស់ក្រុមហ៊ុនអាកាសចរណ៍ Vietjet នឹងអាចប្រើប្រាស់សេវាអ៊ីនធឺណិតល្បឿនលឿនដោយឥតគិតថ្លៃ នៅលើជើងហោះហើរទាំងក្នុងស្រុក (វៀតណាម) និងអន្តរជាតិ ដែលនេះជាការចាប់ផ្តើមនៃភាពជាដៃគូផ្នែកបច្ចេកវិទ្យារយៈពេលវែងជាមួយក្រុមហ៊ុន SpaceX។ សម្រាប់ប្រជាជនកម្ពុជាដែលប្រើប្រាស់សេវាកម្មហោះហើររបស់ Vietjet លើផ្លូវសៀមរាប-ហាណូយ ការបង្កើនសមត្ថភាពតភ្ជាប់អ៊ីនធឺណិតនៅលើជើងហោះហើរនេះ ក៏ជួយគាំទ្រដល់តួនាទីរបស់ទីក្រុងហាណូយ ក្នុងនាមជាច្រកតភ្ជាប់ដ៏សំខាន់ទៅកាន់បណ្តាញហោះហើរដ៏ទូលំទូលាយរបស់ Vietjet ដែលមានជើងហោះហើរបន្តទៅកាន់គោលដៅនានានៅទូទាំងទ្វីបអាស៊ី អូស្ត្រាលី និងអឺរ៉ុប។ ភាពងាយស្រួលនេះ ផ្តល់ជូនអ្នកដំណើរមកពីប្រទេសកម្ពុជានូវលទ្ធភាពកាន់តែប្រសើរក្នុងការរក្សាការតភ្ជាប់ទំនាក់ទំនង មិនត្រឹមតែក្នុងអំឡុងពេលធ្វើដំណើរដោយផ្ទាល់ទៅកាន់ប្រទេសវៀតណាមប៉ុណ្ណោះទេ ប៉ុន្តែថែមទាំងនៅពេលពួកគេបន្តដំណើរទៅកាន់គោលដៅផ្សេងៗទៀត បន្ទាប់ពីឆ្លងកាត់ទីក្រុងហាណូយផងដែរ។
ជាមួយនឹងការតភ្ជាប់អ៊ីនធឺណិតល្បឿនលឿនដែលមិនមានភាពយឺតយ៉ាវ ព្រមទាំងមានវិសាលភាពគ្របដណ្តប់លើមហាសមុទ្រ តំបន់ប៉ូល និងតំបន់ដាច់ស្រយាល Starlink នឹងអនុញ្ញាតឱ្យអ្នកដំណើរអាចធ្វើការងារ រក្សាការតភ្ជាប់ ទស្សនាកម្សាន្តតាមអនឡាញ និងប្រើប្រាស់មាតិកាផ្សេងៗនៅលើអ៊ីនធឺណិតបានយ៉ាងរីករាយក្នុងអំឡុងពេលធ្វើដំណើរ។ Vietjet មានគោលបំណងធ្វើឱ្យសេវាអ៊ីនធឺណិត Wi-Fi ល្បឿនលឿននៅលើជើងហោះហើរលែងជាសេវាកម្មពិសេសដែលមានតម្លៃថ្លៃទៀតហើយ ប៉ុន្តែជាសេវាកម្មឌីជីថលដ៏ចាំបាច់ និងអាចប្រើប្រាស់បានយ៉ាងទូលំទូលាយសម្រាប់ការធ្វើដំណើរតាមផ្លូវអាកាសប្រចាំថ្ងៃ។
កិច្ចព្រមព្រៀងនេះ ត្រូវបានធ្វើឡើងជាផ្លូវការនៅចំពោះវត្តមាន លោក To Lam អគ្គលេខាធិការបក្ស និងជាប្រធានរដ្ឋវៀតណាម ព្រមទាំងថ្នាក់ដឹកនាំជាន់ខ្ពស់ និងតំណាងធុរកិច្ចមកពីប្រទេសទាំងពីរ ដែលនេះជាការកត់សម្គាល់នូវព្រឹត្តិការណ៍ដ៏សំខាន់មួយទៀតនៅក្នុងកិច្ចសហប្រតិបត្តិការផ្នែកបច្ចេកវិទ្យាអាកាសចរណ៍រវាងវៀតណាម និងសហរដ្ឋអាមេរិក។
លោកស្រីបណ្ឌិត Nguyen Thi Phuong Thao ប្រធានក្រុមប្រឹក្សាភិបាលរបស់ Vietjet បានមានប្រសាសន៍ថា៖ «ជាមួយនឹង Starlink ពេលវេលានៅលើអាកាសលែងមានន័យថាជាពេលវេលាដែលគ្មានអ៊ីនធឺណិតទៀតហើយ។ អ្នកដំណើររបស់ Vietjet នឹងអាចរក្សាការតភ្ជាប់បានពេញមួយជើងហោះហើរ មិនថាការធ្វើការងារ ការកម្សាន្ត ឬការរក្សាទំនាក់ទំនងជាមួយក្រុមគ្រួសារ និងមិត្តភក្តិនោះទេ។ ការផ្តល់ជូនសេវានេះ ឆ្លុះបញ្ចាំងពីការប្តេជ្ញាចិត្តដ៏យូរអង្វែងរបស់ Vietjet ចំពោះការច្នៃប្រឌិតថ្មី និងមហិច្ឆតារបស់យើងក្នុងការនាំយកបច្ចេកវិទ្យាឈានមុខគេឱ្យកាន់តែជិតស្និទ្ធទៅនឹងអ្នកដំណើរកាន់តែច្រើន»។
លោក Tim Hughes អនុប្រធានជាន់ខ្ពស់ផ្នែកអាជីវកម្មសកល និងកិច្ចការរដ្ឋាភិបាលនៅក្រុមហ៊ុន SpaceX បានមានប្រសាសន៍ថា៖ «ការដាក់ឱ្យប្រើប្រាស់ Starlink នៅលើជើងហោះហើររបស់ Vietjet នឹងបន្តពង្រីកសេវាកម្មដ៏លឿន និងអាចទុកចិត្តបាន ដែលបច្ចុប្បន្នកំពុងតភ្ជាប់គេហដ្ឋាន និងអាជីវកម្មនានានៅលើដីគោកក្នុងប្រទេសវៀតណាម។ យើងពិតជារំភើបរីក្រាយណាស់ក្នុងការផ្តល់ជូននូវបទពិសោធន៍នៃការតភ្ជាប់ដ៏ល្អប្រសើរដល់ Vietjet និងអតិថិជនរបស់ខ្លួន ដែលនឹងធ្វើឱ្យរាល់ការធ្វើដំណើររបស់អ្នកដំណើរកាន់តែមានភាពល្អប្រសើរ រលូន និងសប្បាយរីករាយជាងមុន»។
