ក្រុមហ៊ុនផលិតម៉ាស៊ីនត្រជាក់នៅអាស៊ី កំពុងកាក់កបខ្លាំង ខណៈរលកកម្ដៅកំពុងបន្ដវាយប្រហារនៅទូទាំងតំបន់អឺរ៉ុប
ខណៈដែលទ្វីបអឺរ៉ុប កំពុងរងទុក្ខពីការវាយប្រហារដោយសីតុណ្ហភាពដ៏ខ្ពស់បំផុតមិនធ្លាប់មាននៅឆ្នាំនេះ ក្រុមហ៊ុនផលិតម៉ាស៊ីនត្រជាក់នៅអាស៊ី ដូចជាក្…
ចាប់ពីខែមករា ដល់ខែមិថុនា ឆ្នាំ២០២៦ នេះ លោក ស៊ី ជីនពីង ប្រធានាធិបតីចិន បានទទួលស្វាគមន៍មេដឹកនាំជាង ១០នាក់ហើយ ជាការឆ្លុះបញ្ចាំងឱ្យឃើញថា ប្រទេសមហាអំណាចសេដ្ឋកិច្ចទី២ក្នុងពិភពលោកមួយនេះ នៅតែមានឥទ្ធិពលការទូត នយោបាយ និងសេដ្ឋកិច្ចកាន់តែខ្លាំង និងជាជម្រើសពឹងផ្អែកសម្រាប់ប្រទេសជាច្រើន ក្នុងបរិបទ ដែលសហរដ្ឋអាម៉េរិកបានកំពុងតែបង្ហាញពីចេតនានៃការបោះបង់តួនាទី ដែលខ្លួនធ្លាប់តែទទួលខុសត្រូវពីមុនមក ។
ជាក់ស្ដែង មេដឹកនាំបក្សកាន់អំណាចនៅកម្ពុជា សម្តេចតេជោ ហ៊ុន សែន បានដឹកនាំគណៈប្រតិភូធ្វើដំណើរទស្សនកិច្ចនៅសប្ដាហ៍នេះ ព្រមទាំងបានជួបពិភាក្សាផ្ទាល់ជាមួយនឹងលោក ស៊ី ជីនពីងផងដែរ ។
តាមអត្ថបទវិភាគមួយដែលសរសេររួមគ្នាដោយ លោកស្រី អេមី ហកឃិន (Amy Hawkins) អ្នកសារព័ត៌មាន the Guadian នៅប៉េកាំង និង លោក អាឡាស្តែរ ម៉ាកក្រឌី (Alastair McCready) អ្នកសារព័ត៌មាននៅទីក្រុងតៃប៉ិ បានលើកឡើងថា ចិន គឺពិតជាបានកំពុងបង្ហាញនូវជម្រើសមួយរបស់ពិភពលោក ខណៈដែលសហរដ្ឋអាម៉េរិក កំពុងតែកាច់ចង្កូតដោយ លោក ដូណាល់ ត្រាំ ដែលជាមេដឹកនាំដែលមានចរិតឆេវឆាវ ។
ជិត៦ខែមកនេះ ចិន បានបើកទ្វារទទួលមេដឹកនាំកំពូលប្រទេសជាច្រើន រាប់តាំងពីបង់ក្លាដេស កាណាដា បារាំង សហរដ្ឋអាម៉េរិក រុស្ស៊ី ប្រ៊ុយណេ ស៊ែប៊ី តាជីគីស្ថាន អងគ្លេស ប៉ាគីស្ថាន បង់ក្លាដែស វៀតណាម មីយ៉ាន់ម៉ា និង កម្ពុជា ជាដើម ។
លោក វីលៀម យ៉ាង (William Yang) អ្នកវិភាគបញ្ហាអន្តរជាតិជាន់ខ្ពស់ម្នាក់ បាននិយាយថា បញ្ជីឈ្មោះមេដឹកនាំពិភពលោកដ៏វែងអន្លាយដែលធ្វើដំណើរមកកាន់ទីក្រុងប៉េកាំង ដើម្បីជួបជាមួយលោក ស៊ី ពិតជាសក្ខីកម្មដែលឆ្លុះបញ្ចាំងពីការទទួលស្គាល់កាន់តែខ្លាំងឡើងអំពីឥទ្ធិពលជាសកលរបស់ចិន ដែលកំពុងកើនឡើង។
លោក យ៉ាង បាននិយាយថា ចិនអាចប្រើប្រាស់រូបភាពនៃដំណើរទស្សនកិច្ចបែបនេះដើម្បី លើកកម្ពស់ជម្រើសសណ្តាប់ធ្នាប់ពិភពលោកពហុប៉ូល ដែលខ្លួនបានគាំទ្រ ខណៈពេលដែលទំនុកចិត្តរបស់ប្រទេសទាំងនេះ លើសហរដ្ឋអាម៉េរិកកំពុងអន់ថយ"។
ជាការពិតមកដល់ពេលនេះ មហាយក្សចិន កំពុងបង្ហាញខ្លួនឯងថា ជាប្រភពនៃស្ថិរភាព ហើយសម្រាប់ប្រទេសក្រីក្រ មហាយក្សចិន គឺជាប្រភពច្រកប្រាក់កម្ចី ដែលមិនសូវមានលក្ខខណ្ឌច្រើន ស្របពេលដែលសហរដ្ឋអាមេរិកហាក់ទុកឱ្យពួកគេកាន់នៅរងាឯកោ។
ពាក់ព័ន្ធនឹងតួនាទី ដែលពិភពលោកកំពុងតែសម្លឹងមកលើចិន កាសែត Global Times បានចុះផ្សាយអត្ថបទមួយដែលនិយាយថា ដំណើរទស្សនកិច្ចជាប់ៗគ្នារបស់មេដឹកនាំនានា ជាពិសេស គឺលោកត្រាំ និងពូទីន បានគូសបញ្ជាក់ពីឥទ្ធិពលការទូតរបស់ចិន ដែលកំពុងពង្រីករបស់ខ្លួននៅលើឆាកពិភពលោក”។
ស្របពេលដែលសហរដ្ឋអាម៉េរិក ត្រូវបានអ្នកវិភាគមួយចំនួនមើលឃើញថា កំពុងផ្តោតលើអាទិភាពក្នុងស្រុក និងបង្ហាញភាពមិនច្បាស់លាស់ចំពោះតួនាទីដឹកនាំសកល ប្រទេសជាច្រើនបានខិតខំបង្កើនទំនាក់ទំនងជាមួយចិន ដើម្បីធ្វើពិពិធកម្មដៃគូ និងការពារផលប្រយោជន៍ជាតិរបស់ខ្លួន។ ទោះជាយ៉ាងណា ការកើនឡើងនៃឥទ្ធិពលរបស់ចិន មិនមានន័យថា ប៉េកាំងបានជំនួសតួនាទីរបស់សហរដ្ឋអាម៉េរិកនៅក្នុងប្រព័ន្ធអន្តរជាតិរួចហើយនោះទេ ព្រោះចិន នៅតែប្រឈមនឹងការសង្ស័យ និងការរិះគន់ពីប្រទេសមួយចំនួនអំពីគោលនយោបាយពាណិជ្ជកម្ម សិទ្ធិមនុស្ស និងឥទ្ធិពលភូមិសាស្ត្រនយោបាយរបស់ខ្លួន។ ដូច្នេះ អ្វីដែលកំពុងកើតឡើងអាចត្រូវបានមើលឃើញថា ជាការប្រែប្រួលឆ្ពោះទៅរកពិភពលោកពហុប៉ូល ដែលចិន កំពុងក្លាយជាសសរស្តម្ភដ៏សំខាន់មួយ ប៉ុន្តែមិនទាន់ជាមហាអំណាចតែមួយ ដែលអាចកំណត់ទិសដៅរបស់ប្រព័ន្ធអន្តរជាតិបាននៅឡើយទេ៕
ដោយៈ សរ សុជាតិ
