សម្ពាធតម្រូវឱ្យមានផ្ទះ មានឡានមុនរៀបការកំពុងរុញច្រានយុវជនវៀតណាមឱ្យធ្លាក់ក្នុងវិបត្តិសុខភាពផ្លូវចិត្ត
ស្របពេលសេដ្ឋកិច្ចវៀតណាមមានសម្ទុះយ៉ាងលឿន ប៉ុន្តែយុវជនវៀតណាមរាប់លាននាក់បែរជាកំពុងប្រឈមមុខនឹងសម្ពាធជីវិតយ៉ាងធ្ងន់ធ្ងរ ដោយសារតែតម្លៃអចលនទ្រ…
អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុន វើលដ៏ប្រ៊ីដ គ្រុប បានកត់សម្គាល់ថា កន្លងមកកម្ពុជា បានចំណាយថវិកាយ៉ាងច្រើនលើការនាំចូលទំនិញពីប្រទេសផ្សេងៗ ជាពិសេសប្រទេសថៃ ដោយពុំបានផ្ដល់ផលចំណេញដល់សេដ្ឋកិច្ចជាតិ។ ប៉ុន្តែបច្ចុប្បន្នដោយសារស្មារតីជាតិនិយម និងការឈឺចាប់ជុំវិញវិបត្តិព្រំដែន បានជំរុញឱ្យអ្នកប្រើប្រាស់ខ្មែរបដិសេធទំនិញថៃ ហើយបង្វែរមកជួយលើកស្ទួយផលិតផលក្នុងស្រុកវិញ។ អ្នកឧកញ៉ា បានសង្កត់ធ្ងន់ថា ការផ្លាស់ប្តូរឥរិយាបថអ្នកប្រើប្រាស់នេះ បានប្រែក្លាយជាឱកាសមាសសម្រាប់វិនិយោគិន សូម្បីតែអ្នកវិនិយោគក្នុងវិស័យអចលនទ្រព្យ ក៏បានចាប់ផ្តើមបង្វែរទុនមកបោះទុនលើវិស័យ SME ផងដែរ។
តែយ៉ាងណាអ្នកជំនួញរូបនេះសង្កេត់ឃើញថា វិស័យនេះនៅតែជួបបញ្ហាប្រឈមមួយចំនួនរួមមានខ្សែច្រវាក់ផលិតកម្មនៅបន្តរាយប៉ាយ និងថ្លៃដើមដឹកជញ្ជូនខ្ពស់។ ទន្ទឹមនឹងនេះ អ្នកឧកញ៉ា ស្នើឱ្យម្ចាស់សហគ្រាស SME ត្រូវសិក្សាឱ្យច្បាស់ពីតម្រូវការទីផ្សារ, ចាប់យកការផលិតនៅក្នុងតំបន់សេដ្ឋកិច្ចពិសេស ដើម្បីកាត់បន្ថយថ្លៃដើមខ្សែច្រវាក់ផលិតកម្ម និងត្រូវប្រកាន់ភ្ជាប់នូវស្តង់ដាគុណភាព និងអនាម័យ ដើម្បីបន្តឈរជើង និងទាក់ទាញការគាំទ្រ។
ជាមួយគ្នានេះ ឧកញ៉ា ស៊ិន ចន្ធី អនុប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា កត់សម្គាល់ឃើញថា មកទល់ពេលនេះផលិតផលរបស់ SME ក្នុងស្រុកកំពុងទទួលបានការគាំទ្រ និងកើនឡើងយ៉ាងខ្លាំងបន្ទាប់ពីពលរដ្ឋខ្មែរនាំគ្នាធ្វើពហិការផលិតផលថៃ។ ការរីកចម្រើនរបស់សហគ្រាសធុនតូច និងមធ្យមនាពេលនេះ ត្រូវបានអ្នកជំនាញរូបនេះរំពឹងថា នឹងឈានដល់ការនាំចេញផលិតកម្ពុជាទៅទីផ្សារអន្តរជាតិ កាន់តែច្រើននាពេលខាងមុខផងដែរ។
ជុំវិញបញ្ហានេះដែរ ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានអះអាងថា ផលិតផលកែច្នៃក្នុងស្រុកបច្ចុប្បន្នមានការរីកចម្រើនគួរឱ្យកត់សម្គាល់ និងទទួលបានការគាំទ្រយ៉ាងទូលំទូលាយពីប្រជាពលរដ្ឋរហូតអាចដណ្តើមទីផ្សារ និងជំនួសទំនិញនាំចូលមួយចំនួនបានជាបណ្តើរៗហើយ។ មន្ត្រីជាន់ខ្ពស់រូបនេះ បានគូសបញ្ជាក់ថា ក្រសួងពាណិជ្ជកម្មកំពុងខិតខំជំរុញ និងលើកកម្ពស់គុណភាពផលិតផលក្នុងស្រុកឱ្យមានស្តង់ដាខ្ពស់ទាំងលើផ្នែកគុណភាព និងតម្លៃ ដើម្បីអាចប្រកួតប្រជែងបានយ៉ាងរឹងមាំទាំងក្នុងទីផ្សារផ្ទៃប្រទេស និងនៅលើឆាកអន្តរជាតិ៕
អត្ថបទ៖ បូ ដូឡា
