តាមប្រភពព័ត៌មាន The Straits Ttimes លោក បាហ៊ីល ឡាហាដាលីយ៉ា (Bahlil Lahadalia) រដ្ឋមន្ត្រីសម្របសម្រួលទទួលបន្ទុកវិស័យថាមពល និងការផ្លាស់ប្តូរថាមពលរបស់ឥណ្ឌូនេស៊ី បាននិយាយកាលពីថ្ងៃទី២៩ ខែតុលា ថា លោកជឿថា ឧស្ម័ន LNG មួយចំនួនក្នុងចំណោមការដឹកជញ្ជូនចំនួន ១៤៨ លើក ដែលឥណ្ឌូនេស៊ីបានផ្គត់ផ្គង់ទៅសិង្ហបុរី អាចត្រូវបានយកទៅជួញដូរ និងនាំចេញបន្តទៅប្រទេសដទៃ ជាជាងប្រើប្រាស់សម្រាប់តម្រូវការក្នុងស្រុករបស់សិង្ហបុរី។
ទោះជាយ៉ាងណា លោកមិនបានបង្ហាញភស្តុតាងគាំទ្រការចោទប្រកាន់នេះ ឬបញ្ជាក់ពីរយៈពេលដែលការដឹកជញ្ជូនទាំងនោះបានកើតឡើងនោះទេ។ ការជួញដូរ និងនាំចេញ LNG បន្តទៅប្រទេសផ្សេងមិនមែនជាទង្វើខុសច្បាប់ដោយស្វ័យប្រវត្តិនោះទេ ប៉ុន្តែត្រូវអនុវត្តតាមលក្ខខណ្ឌនៃកិច្ចព្រមព្រៀងផ្គត់ផ្គង់ដែលពាក់ព័ន្ធ។
ការលើកឡើងរបស់មន្ត្រីជាន់ខ្ពស់ឥណ្ឌូនេស៊ីនេះ កើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីឥណ្ឌូនេស៊ី ចាប់ផ្តើមកាត់បន្ថយការនាំចេញឧស្ម័នធម្មជាតិតាមបំពង់បង្ហូរឧស្ម័នទៅសិង្ហបុរី ចាប់ពីថ្ងៃទី២៤ ខែតុលា ដោយសារតម្រូវការប្រើប្រាស់ក្នុងស្រុកកើនឡើង ជាពិសេសសម្រាប់ការផលិតអគ្គិសនីនៅតំបន់បាតាម ប៊ីនតាន និងកោះស៊ូម៉ាត្រា។
ជុំវិញបញ្ហានេះ លោក បាហ៊ីល បានអះអាងថា ឥណ្ឌូនេស៊ីមិនបានរំលោភកិច្ចសន្យាផ្គត់ផ្គង់នោះទេ ព្រោះបរិមាណឧស្ម័នដែលនៅតែផ្គត់ផ្គង់ គឺស្ថិតក្នុងកម្រិតអប្បបរមាដែលកិច្ចព្រមព្រៀងតម្រូវឱ្យអនុវត្ត។ លោកក៏បានបញ្ជាក់ថា ឥណ្ឌូនេស៊ីមិនមានគម្រោងកាត់បន្ថយការនាំចេញ LNG ទៅសិង្ហបុរីបន្ថែមទៀតភ្លាមៗនោះទេ ប៉ុន្តែរដ្ឋាភិបាលនឹងបន្តផ្តល់អាទិភាពដល់តម្រូវការថាមពលក្នុងស្រុក។
ភាពតានតឹងរវាងឥណ្ឌូនេស៊ី និងសិង្ហបុរី បានកើនឡើង បន្ទាប់ពីនាយករដ្ឋមន្ត្រីសិង្ហបុរី លោក ឡូរ៉ង់ វ៉ុង (Lawrence Wong) បានលើកឡើងកាលពីថ្ងៃទី២៥ ខែតុលា ថា ភាគីទាំងអស់គួរតែគោរពតាមកាតព្វកិច្ចក្នុងកិច្ចសន្យាពាណិជ្ជកម្ម។ ការលើកឡើងនេះបានធ្វើឱ្យលោក បាហ៊ីល ឆ្លើយតបវិញថា ឥណ្ឌូនេស៊ីមិនគួរត្រូវបានបង្រៀនអំពីការគោរពកិច្ចសន្យានោះទេ ដោយលោកអះអាងថា ប្រទេសរបស់លោកបានបំពេញកាតព្វកិច្ចរបស់ខ្លួនរួចហើយ។
សិង្ហបុរីគឺជាប្រភពវិនិយោគផ្ទាល់ពីបរទេសដ៏ធំបំផុតរបស់ឥណ្ឌូនេស៊ីចាប់តាំងពីឆ្នាំ២០១៤ មក ដោយទំហំវិនិយោគបានឈានដល់ជាង ១៧ ពាន់លានដុល្លារអាម៉េរិកក្នុងឆ្នាំ២០២៥។ តួលេខនេះបង្ហាញពីសារៈសំខាន់នៃទំនាក់ទំនងសេដ្ឋកិច្ចរវាងប្រទេសទាំងពីរ ទោះបីជាបច្ចុប្បន្នកំពុងមានភាពតានតឹងលើបញ្ហាថាមពល និងបរិស្ថានក៏ដោយ។
ជាមួយគ្នានេះ ក្នុងដំណើរទស្សនកិច្ចរបស់រដ្ឋមន្ត្រីការបរទេសសិង្ហបុរី លោក វីវៀន បាឡាគ្រីស្នាន់ (Vivian Balakrishnan) ទៅកាន់ប្រទេសឥណ្ឌូនេស៊ី កាលពីថ្ងៃទី២៧ ដល់ថ្ងៃទី២៩ ខែតុលា ភាគីទាំងពីរបានបញ្ជាក់ជាថ្មីពីការប្តេជ្ញាចិត្តក្នុងការរក្សាទំនាក់ទំនងល្អ និងដោះស្រាយបញ្ហាតាមរយៈការសន្ទនាដោយស្មោះត្រង់។ ប្រទេសទាំងពីរក៏បានព្រមព្រៀងបង្កើតក្រុមការងាររួម ដើម្បីពង្រឹងការចែករំលែកព័ត៌មាន និងការអនុវត្តច្បាប់ប្រឆាំងនឹងភ្លើងឆេះព្រៃ និងដីដែលបង្កផ្សែងអ័ព្ទឆ្លងដែន។
