ថៃ គ្រោងដំឡើងពន្ធរហូតដល់៣០% លើទំនិញទិញនាំចូលតាមអនឡាញ ដើម្បីការពារអាជីវកម្មក្នុងស្រុក

គណៈរដ្ឋមន្ត្រីថៃ បានអនុម័តវិធានការពន្ធថ្មីនេះនៅថ្ងៃទី១១ ខែវិច្ឆិកា ​ដោយអនុវត្តចំពោះ​ទំនិញនាំចូលដែលដឹកជញ្ជូនតាមសេវាបញ្ញើរហ័ស ឬប្រៃសណីយ៍អន្តរជាតិ។ លោក អេកនីទិ នីទិថានប្រាផាស (Ekniti Nitithanprapas) រដ្ឋមន្ត្រីក្រសួងហិរញ្ញវត្ថុថៃ បានលើកឡើងថា ការរីកចម្រើនយ៉ាងឆាប់រហ័ស នៃការទិញទំនិញលក់តាមអនឡាញបានផ្តល់ភាពងាយស្រួលដល់អ្នកប្រើប្រាស់ក្នុងការទិញទំនិញពីបរទេសក្នុងតម្លៃថោក។ ប៉ុន្តែទន្ទឹម​នេះ អាជីវកម្មក្នុងស្រុកត្រូវចំណាយសព្វគ្រប់លើពន្ធប្រាក់ឈ្នួល និងការបំពេញតាមច្បាប់ព្រមទាំងស្តង់ដាផលិតផលនានា។ លោក​បាន​សង្កត់ធ្ងន់​ថា​ ភាពខុសគ្នានេះធ្វើឱ្យអាជីវកម្មក្នុងស្រុក ជាពិសេសអាជីវកម្មខ្នាតតូចប្រឈមនឹងការប្រកួតប្រជែងមិនស្មើភាព។

ជាមួយគ្នានេះ រដ្ឋាភិបាលថៃ ក៏បារម្ភដែរថា ទំនិញនាំចូលដែលមានតម្លៃថោកមួយចំនួនអាច​នឹង​​គ្មានសុវត្ថិភាព ឬមិនបំពេញតាមស្តង់ដាគុណភាព ខណៈគ្មានក្រុមហ៊ុនក្នុងស្រុក​ណាមួយទទួលខុសត្រូវលើការធានាស្តង់ដាផលិតផលទាំងនោះ។ ទោះជាយ៉ាងណាលោក អេកនីទិ បានបញ្ជាក់ថា វិធានការនេះមិនមែនដើម្បីរារាំងការទិញលក់តាមអនឡាញ ឬកាត់បន្ថយជម្រើសរបស់អ្នកប្រើប្រាស់នោះទេ ពោលគឺដើម្បីធ្វើបច្ចុប្បន្នភាពប្រព័ន្ធពន្ធ និងច្បាប់ពាណិជ្ជកម្មឱ្យស្របតាមការវិវត្ត នៃសេដ្ឋកិច្ចឌីជីថល៕

ដោយ: តែម សុខុម