លោកជំទាវ កែវ មុំ ប្រធានសភាមុខរបរ និងមីក្រូសហគ្រាសកម្ពុជា បានគូសបញ្ជាក់ថា វត្តមានទំនិញនាំចូលតម្លៃទាបកំពុងបង្កើតគំនាបយ៉ាងធ្ងន់ធ្ងរលើសមត្ថភាពប្រកួតប្រជែងរបស់សហគ្រិនក្នុងស្រុក ព្រមទាំងចោទជាសញ្ញាសួរលើសុវត្ថិភាពអ្នកប្រើប្រាស់។ លោកជំទាវ បានអំពាវនាវឱ្យក្រសួង-ស្ថាប័នពាក់ព័ន្ធបង្កើនវិធានការត្រួតពិនិត្យឱ្យបានហ្មត់ចត់នៅគ្រប់ច្រកល្ហក ដើម្បីធានាថា ទំនិញនាំចូលទាំងនោះបានបង់ពន្ធត្រឹមត្រូវចូលថវិកាជាតិ និងមានលិខិតបញ្ជាក់ស្តង់ដារគុណភាពច្បាស់លាស់ ដោយសារការប្រកួតប្រជែងដោយស្មើភាព គឺជាចលករតែមួយគត់ ដែលជួយឱ្យសេដ្ឋកិច្ចជាតិរឹងមាំ។
ជុំវិញបញ្ហានេះដែរ ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបានលើកឡើងថា ខណៈដែលវិស័យ SME ក្នុងស្រុកកំពុងប្រឹងប្រែងបង្កើនផលិតភាពដើម្បីផ្គត់ផ្គង់តម្រូវការក្នុងស្រុក និងកំពុងជួបប្រទះការប្រកួតប្រជែងតម្លៃរវាងគ្នា និងគ្នាស្រាប់ផងនោះ ការហូរចូលបន្ថែម នៃទំនិញថោកៗពីក្រៅប្រទេស ជាពិសេសចិនប្រៀបដូចជាសង្គ្រាមតម្លៃ ដែលកំពុងកាត់ផ្តាច់ខ្សែច្រវាក់ផ្គត់ផ្គង់របស់សហគ្រាសក្នុងស្រុកបន្ថែមមួយតង់ទៀត។ លោកឧកញ៉ា បានសង្កត់ធ្ងន់ថា មានតែការធ្វើពាណិជ្ជកម្ម ដែលមានតម្លាភាព និងការគាំពារផ្នែកគោលនយោបាយប៉ុណ្ណោះ ទើបអាចជួយឱ្យអាជីវកម្មក្នុងស្រុកមានចីរភាព។
ជាមួយគ្នានេះ លោកបណ្ឌិត ឈត ប៊ុនថង អ្នកជំនាញទស្សនវិជ្ជា និងជាអ្នកតាមដានព្រឹត្តិការណ៍សង្គម បានកត់សម្គាល់ថា មិនត្រឹមតែទំនិញមកពីចិននោះទេ សូម្បីតែផលិតផលនាំចូលពីប្រទេសវៀតណាម ក៏កំពុងវាយលុកទីផ្សារក្នុងស្រុកក្នុងតម្លៃធូរថ្លៃផងដែរ។ អ្នកជំនាញរូបនេះ បានបង្ហាញការព្រួយបារម្ភយ៉ាងខ្លាំងថា នៅពីក្រោយតម្លៃថោករបស់ទំនិញទាំងនោះ អាចមានលាក់បំបាំងនូវសារធាតុគីមី ដែលអាចបង្កប៉ះពាល់ដោយផ្ទាល់ដល់សុខភាពអ្នកបរិភោគប្រចាំថ្ងៃ ហើយ លោក បានស្នើឱ្យអាជ្ញាធរពង្រឹងការធ្វើអធិការកិច្ចផ្នែកអនាម័យឱ្យកាន់តែសកម្មបន្ថែមទៀត។
គួរបញ្ជាក់ថា ទំហំពាណិជ្ជកម្មទ្វេភាគីរវាងកម្ពុជា និងចិននៅក្នុងរយៈពេល៦ខែឆ្នាំ២០២៦ សម្រេចបានក្នុងទំហំជាង១១,៦ពាន់លានដុល្លារអាម៉េរិកកើនឡើងជាង២៥% បើធៀបនឹងរយៈពេលដូចគ្នាកាលពីឆ្នាំមុន ដោយប្រទេសចិននៅតែបន្តរក្សាដំណែងជាដៃគូពាណិជ្ជកម្មធំជាងគេបង្អស់របស់កម្ពុជា។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
អត្ថបទ៖ ជា ម៉ារ៉ា
