អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរ៉េស បានគូសបញ្ជាក់ដោយក្តីបារម្ភថា ការបែកបាក់ផ្នែកភូមិសាស្ត្រនយោបាយរវាងប្រទេសមហាអំណាចកំពុងរារាំងក្រុមប្រឹក្សាសន្តិសុខអង្គការសហប្រជាជាតិ មិនឱ្យសម្រេចបាននូវដំណោះស្រាយសមស្របណាមួយឡើយ ដែលជាហេតុធ្វើឱ្យស្ថាប័នការពារសន្តិសុខពិភពលោកមួយនេះជាប់គាំង និងមិនអាចចាត់វិធានការទប់ស្កាត់វិបត្តិសកល ដែលកំពុងឆាបឆេះនាពេលបច្ចុប្បន្នបាន។ លោកបានសង្កត់ធ្ងន់ថា អាកប្បកិរិយា និងមហិច្ឆតារបស់ប្រទេសមហាអំណាចមួយចំនួន គឺជាដើមចមនៃការជាប់គាំងរបស់ស្ថាប័នកំពូលមួយនេះ។
ឆ្លើយតបនឹងសំណួរដែលសួរថា ហេតុអ្វីការអំពាវនាវរបស់ UN ឱ្យគោរពច្បាប់អន្តរជាតិ ត្រូវបានគេមើលរំលង លោក អង់តូនីញ៉ូ បានលើកឡើងដោយចំៗពីគម្លាត និងជម្លោះផលប្រយោជន៍ក្នុងចំណោមប្រទេសមហាអំណាច។ លោកបានព្រមានថា ពិភពលោកកំពុងរងការរង្គោះរង្គើដោយសារការបែកបាក់ភូមិសាស្ត្រនយោបាយ ហើយអ្វីដែលគួរឱ្យសោកស្តាយនោះ គឺប្រទេសមហាអំណាចមួយចំនួន ដែលអង្គុយលើកៅអីអចិន្ត្រៃយ៍ នៃក្រុមប្រឹក្សាសន្តិសុខ និងមានកាតព្វកិច្ចការពារសណ្តាប់ធ្នាប់អន្តរជាតិបែរជាក្លាយជាអ្នករំលោភបំពានច្បាប់អន្តរជាតិដោយខ្លួនឯងទៅវិញ។
ប្រមុខអង្គការសហប្រជាជាតិរូបនេះ បានគូសបញ្ជាក់បន្ថែមថា ស្ថានភាពនេះហើយ ដែលធ្វើឱ្យការកែទម្រង់ក្រុមប្រឹក្សាសន្តិសុខក្លាយជាអាទិភាពបន្ទាន់បំផុត។ ទន្ទឹមនឹងនេះ លោក បានអំពាវនាវឱ្យមានការបែងចែក និងរៀបចំជញ្ជីងអំណាចឡើងវិញ ដោយសារតែផលធៀបអំណាចនៅក្នុងក្រុមប្រឹក្សាសន្តិសុខនាពេលបច្ចុប្បន្នមានលក្ខណៈហួសសម័យ និងលែងឆ្លុះបញ្ចាំងពីតថភាពជាក់ស្តែង នៃនយោបាយពិភពលោកក្នុងសម័យកាលនេះទៀតហើយ៕
ដោយៈ សរ សុជាតិ
