អាម៉េរិក គ្រោងយកទ្រព្យសម្បត្តិបង្កករបស់អ៊ីរ៉ង់ ទៅជួយសម្ពន្ធមិត្ត ដែលរងការវាយប្រហារពីអ៊ីរ៉ង់

រដ្ឋមន្ត្រីហិរញ្ញវត្ថុអាម៉េរិក លោក ស្កុត បេសសេន (Scott Bessent) បានបញ្ជាឱ្យវាយតម្លៃអំពីការខូចខាតដែលបង្កឡើងចំពោះសម្ពន្ធមិត្តរបស់អាម៉េរិក នៅឈូងសមុទ្រពែក្ស រួមទាំងប្រទេសគុយវ៉ែត និងប្រទេសបារ៉ែន ផងដែរ។ ទីក្រុងវ៉ាស៊ីនតោន កំពុងសិក្សាស្វែងយល់ថា តើទ្រព្យសម្បត្តិបង្កកទុករបស់អ៊ីរ៉ង់ អាចបង្វែរយកទៅជួយចេញថ្លៃចំណាយទាំងនោះបានដែរ ឬយ៉ាងណា។ ចំណាត់ការនេះកើតមានឡើង បន្ទាប់ពីអ៊ីរ៉ង់ បានបើកការវាយប្រហារលើប្រទេសគុយវ៉ែត និងប្រទេសបារ៉ែន កាលពីថ្ងៃទី៥ ខែមិថុនា ខណៈការចរចាសន្តិភាពរវាងទីក្រុងវ៉ាស៊ីនតោន និងទីក្រុងតេអេរ៉ង់ នៅតែជាប់គាំង។ យ៉ាងណាមិញអ៊ីរ៉ង់ បានទាមទារឱ្យមានការដោះលែងទ្រព្យសម្បត្តិចំនួន២៤ពាន់លានដុល្លារ ដែលបង្កកជាផ្នែកមួយ នៃកិច្ចព្រមព្រៀងដែលគូភាគីអាសម្រេចបាននៅពេលអនាគត។
ទន្ទឹមនេះ ភាពតានតឹងនៅតែខ្ពស់ខ្លាំង ទោះបីជាមានកិច្ចខិតខំប្រឹងប្រែងដើម្បីឈានដល់បទឈប់បាញ់យ៉ាងណាក៏ដោយ។ សហរដ្ឋអាម៉េរិក បានអះអាងថា ខ្លួនបានវាយប្រហារទីតាំងរ៉ាដារបស់អ៊ីរ៉ង់ នៅជិតច្រកសមុទ្រ Hormuz បន្ទាប់ពីស្ទាក់ចាប់ដ្រូនអត្តឃាតរបស់អ៊ីរ៉ង់ ដែលរងការចោទប្រកាន់ថា បានគំរាមកំហែងដល់ចរាចរណ៍ផ្លូវសមុទ្រ។ ក្រោយមក អ៊ីរ៉ង់ឆ្លើយតបថា ខ្លួនបានបាញ់មីស៊ីលផ្លោងទៅកាន់មូលដ្ឋានទ័ពអាម៉េរិក នៅប្រទេសគុយវ៉ែត និងប្រទេសបារ៉ែន ទោះបីជាយោធាអាម៉េរិក និយាយថា ដ្រូនអត្តឃាតភាគច្រើនត្រូវបានស្ទាក់ចាប់ក៏ដោយ។
ប្រទេសប៉ាគីស្ថាន ក៏បានចូលអន្តរាគមន៍ផ្នែកការទូតផងដែរ ដោយបានបញ្ជូនរដ្ឋមន្ត្រីក្រសួងមហាផ្ទៃ លោក ម៉ូស៊ីន ណាកវី (Mohsin Naqvi) ទៅកាន់ទីក្រុងតេអេរ៉ង់ ជាមួយនឹងលិខិតមួយច្បាប់សម្រាប់មេដឹកនាំកំពូលរបស់អ៊ីរ៉ង់ ដែលជាផ្នែកមួយនៃកិច្ចខិតខំប្រឹងប្រែងសម្របសម្រួលជាបន្តបន្ទាប់។
ប្រធានាធិបតីអាម៉េរិក លោក ដូណាល់ ត្រាំ បានអះអាងថា អ៊ីរ៉ង់ នៅតែអាចរក្សាទុកអាវុធមីស៊ីលរបស់ខ្លួនរហូតដល់ទៅប្រមាណ២០% ទោះបីជាមានការវាយប្រហារយ៉ាងខ្លាំងក្លាបំផុតពីសំណាក់សហរដ្ឋអាម៉េរិក និងអ៊ីស្រាអែល ដែលផ្តោតលើហេដ្ឋារចនាសម្ព័ន្ធយោធាអ៊ីរ៉ង់យ៉ាងណាក៏ដោយ។ សរុបជារួម ស្ថានការណ៍នៅតែផុយស្រួយ ដោយការប្រយុទ្ធគ្នា និងការទូតនៅតែបន្តនៅទូទាំងតំបន់មជ្ឈិមបូព៌ា៕

ដោយ: តែម សុខុម