រលកកម្តៅដ៏គ្រោះថ្នាក់នៅទ្វីបអឺរ៉ុបបានឆក់យកជីវិតមនុស្សជាង១,៣០០នាក់

ទីភ្នាក់ងារព័ត៌មាន Euronews បានរាយការណ៍ដោយយោងតាមសេចក្ដីប្រកាសអាសន្នរបស់អង្គការសុខភាពពិភពលោក (WHO) កាលពីថ្ងៃអាទិត្យ ទី២៨ ខែមិថុនា ថា គិតចាប់តាំងពីថ្ងៃទី២១ ខែមិថុនា មកទល់ពេលនេះ ចំនួនអ្នកស្លាប់ដោយសារឥទ្ធិពលរលកកម្ដៅនៅអឺរ៉ុបបានកើនឡើងដល់ជាង១,៣០០នាក់ហើយ ស្របពេលដែលអាកាសធាតុក្តៅហួតហែងនៅតែបន្តវាយប្រហារពាសពេញនៅតំបន់នេះ។

លោក តេដ្រូស អាដហាណូម ហ្គេប្រ៊េយេស៊ុស (Tedros Adhanom Ghebreyesus) អគ្គនាយកអង្គការសុខភាពពិភពលោកបានបង្ហោះសារព្រមាននៅលើបណ្តាញសង្គមថា គេហដ្ឋាន កន្លែងធ្វើការ និងសាលារៀននៅក្នុងតំបន់អឺរ៉ុបនាពេលនេះ គឺមិនមានសមត្ថភាពគ្រប់គ្រាន់ក្នុងការទប់ទល់នឹងសីតុណ្ហភាពដ៏ក្តៅខ្លាំងក្លាបែបនេះឡើយ។ ស្ថានភាពនេះកំពុងស្តែងឱ្យឃើញយ៉ាងច្បាស់នៅក្នុងប្រទេសបារាំង ដោយក្រសួងសុខាភិបាលបារាំងបានប្រកាសថា គិតចាប់តាំងពីថ្ងៃទី២៤ ខែមិថុនា មក ចំនួនអ្នកស្លាប់ដោយសាររលកកម្តៅបានហក់ឡើងដល់ប្រមាណ១,០០០នាក់។ តំបន់ដែលរងគ្រោះធ្ងន់ធ្ងរជាងគេ ឬស្ថិតក្រោមការប្រកាសអាសន្នពណ៌ក្រហមមានជនរងគ្រោះដល់ទៅ៨៥% គឺជាក្រុមមនុស្សចាស់ដែលមានអាយុចាប់ពី៦៥ឆ្នាំឡើងទៅ។

ពេញមួយសប្ដាហ៍កន្លងទៅនេះ មនុស្សម្នារាប់ម៉ឺននាក់បាននាំគ្នាសម្រុកទៅកាន់សួនច្បារ អាងទឹក និងស្រះទឹកនានាក្នុងទីក្រុង ដើម្បីសម្រាលភាពក្តៅហប់។ ស្ថានភាពនេះបានបង្ខំឱ្យអាជ្ញាធរក្រុងប៉ារីស ត្រូវដាក់ចេញវិធានការបន្ទាន់ ដោយហាមឃាត់ការសេពគ្រឿងស្រវឹង និងព្រមានពីគ្រោះថ្នាក់ នៃការលោតលេងទឹក បន្ទាប់ពីមានបុរសម្នាក់បានលង់ទឹកស្លាប់កាលពីពេលថ្មីៗ។

ជាមួយគ្នានេះសីតុណ្ហភាពនៅចក្រភពអង់គ្លេសបានហក់ឡើងដល់ជាង៣៧អង្សាសេ ខណៈនៅប្រទេសអេស្ប៉ាញ និងអាល្លឺម៉ង់វិញ សីតុណ្ហភាពបានហក់ឡើងដល់៤០អង្សាសេដូចគ្នា។ យោងតាមប្រព័ន្ធត្រួតពិនិត្យអត្រាមរណភាពប្រចាំថ្ងៃរបស់អេស្ប៉ាញ គ្រាន់តែចន្លោះពីថ្ងៃពុធ ដល់ថ្ងៃសៅរ៍ សប្តាហ៍មុន មានមនុស្សរហូតដល់ជាង៤០០នាក់បានបាត់បង់ជីវិតដោយសាររលកកម្តៅនេះ៕

អត្ថបទៈ សួន ឡង់ទី. រូបភាពៈ ឯកសារបរទេស