វិស័យធនាគាររបស់ប្រទេសថៃ កំពុងជួបវិបត្តិ ខណៈកម្ចីខូចកើនឡើងកាន់តែខ្ពស់នៅត្រីមាសទី១ ដើម

ក្រុមហ៊ុនមូលបត្រថៃដែលមានឈ្មោះថា ក្រុងស្រ៊ី សិកឃ្យូរីធី (Krungsri Securities) បានព្យាករថា កម្ចីខូចនៅក្នុងវិស័យធនាគាររបស់ប្រទេសថៃ នឹងកើនឡើងឈានដល់៣,១១%ក្នុងត្រីមាសទី១ ដើមឆ្នាំ២០២៤ នេះ។

ក្រុមហ៊ុនខាងលើនេះបានគូសបញ្ជាក់ថា កំណើននៃកម្ចីខូចនេះកើតមានឡើង ក្រោយពីវិធានការបន្ធូរបន្ថយបំណុលដាក់ចេញដោយធនាគារកណ្តាលថៃ បានផុតសុពលភាព ហើយវាគឺជាកត្តាដ៏សំខាន់មួយដែលបង្កើនសម្ពាធលើគុណភាពកម្ចីក្នុងវិស័យធនាគាររបស់ប្រទេសនេះ។ ធនាគារនានាក្នុងប្រទេសថៃ គ្រោងប្រកាសលទ្ធផលត្រីមាសទី១ ដើមឆ្នាំ២០២៤ ចន្លោះពីថ្ងៃទី១៧ ខែមេសា ដល់ថ្ងៃទី២២ ខែមេសា។

យោងតាមធនាគារកណ្តាលថៃ ធនាគារនានាបានអនុម័តផ្តល់ប្រាក់កម្ចីសរុបជាង៩,៤ពាន់លានដុល្លារអាម៉េរិកក្រោមកម្មវិធីជំនួយបន្ធួរបន្ថយបំណុលដោយគ្របដណ្ដប់រហូតដល់ទៅ៩៩,៤%នៃកម្មវិធីខាងលើនេះ។

សូមបញ្ជាក់ថា កម្មវិធីជំនួយបន្ធូរបន្ថយបំណុលដែលដាក់ចេញដោយធនាគារកណ្ដាលថៃ (BoT) បានចាប់ផ្តើមនៅខែមេសា ឆ្នាំ២០២១ ហើយទើបតែបានផុតកំណត់នៅថ្ងៃទី៩ ខែ

មេសា ឆ្នាំ២០២៤។ ថ្វីបើមានបញ្ហាប្រឈមទាំងនេះក្ដី ក៏ក្រុមហ៊ុនមូលបត្រថៃ ក្រុងស្រ៊ី សិកឃ្យូរីធី (Krungsri Securities) បានព្យាករថា វិស័យធនាគាររបស់ប្រទេសថៃ នឹងទទួលបានកំណើនប្រាក់ចំណេញដុលសរុប៨%ក្នុងត្រីមាសទី១ ដើមឆ្នាំនេះ៕

ដោយ: តែម សុខុម