សហគ្រិនខ្មែរ រៀបចំកម្មវិធីជំនួបសហគ្រិនជាលើកទី២ ដើម្បីពង្រឹងលទ្ធភាពចូល ទីផ្សារ និងទទួលបានហិរញ្ញប្បទាន

ជំនួបនាឆ្នាំនេះ មិនត្រឹមតែផ្តោតលើបទបង្ហាញពីអ្នកជំនាញប៉ុណ្ណោះទេ ប៉ុន្តែត្រូវបានរៀបចំឱ្យមានវគ្គចែក រំលែកបទពិសោធន៍រវាងសហគ្រិន និងសហគ្រិន ព្រមទាំងការពិភាក្សាតាមក្រុមតូចៗជាមួយធនាគារ វិនិយោគិន និងប្រតិបត្តិករទីផ្សារ។ ការរៀបចំនេះផ្តល់ឱកាសឱ្យសហគ្រិនសិក្សាដោយផ្ទាល់ពីបទ ពិសោធន៍កៀរគរហិរញ្ញប្បទាន និងការចូលទីផ្សារទៅវិញទៅមក ព្រមទាំងបង្កើតទំនាក់ទំនងជាមួយ គ្រឹះស្ថាននានាដែលអាចជួយពួកគាត់ក្នុងការបោះជំហានទៅមុខ។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល និងជានាយកប្រតិបត្តិ នៃសហគ្រិនខ្មែរបានមានប្រសាសន៍ថា៖ “រាជរដ្ឋាភិបាលកម្ពុជា តាមរយៈសហគ្រិនខ្មែរ នៅតែបន្តពង្រឹង ឱកាសសម្រាប់សហគ្រាសធុនតូច និងមធ្យម ក្នុងការទទួលបានទាំងទីផ្សារ និងហិរញ្ញវត្ថុ។ កិច្ចការនេះ ទាមទារឲ្យមានអ្នកសម្របសម្រួលរវាងធនាគារ, វិនិយោគិន និងប្រតិបត្ដិករទីផ្សារ ដើម្បីឲ្យអាជីវករទទួល បានភាពជោគជ័យ តាមរយៈផលិតផល និងសេវាកម្ម ព្រមទាំងបង្កើតការងារ ដែលមានតម្លៃបន្ថែម ខ្ពស់។”

តាមរយៈវគ្គចែករំលែកចំណេះដឹង, កិច្ចពិភាក្សាដេញដោល និងសកម្មភាពបង្កើតបណ្តាញទំនាក់ទំនង សហគ្រិន ដែលបានចូលរួម ទទួលបានការយល់ដឹងជាក់ស្តែងអំពីភាពត្រៀមខ្លួនសម្រាប់ការនាំចេញ ឱកាសហិរញ្ញប្បទាន និងយុទ្ធសាស្ត្រអភិវឌ្ឍន៍ម៉ាកសញ្ញាអាជីវកម្ម និងអាជីព ដើម្បីពង្រឹងសមត្ថភាព និង បង្ហាញពីសក្ដានុពលរបស់ខ្លួនប្រកបដោយប្រសិទ្ធភាពទៅកាន់ដៃគូអាជីវកម្ម, ធនាគារ និងវិនិយោគិន។

ជំនួបឆ្នាំនេះបានប្រមូលផ្តុំអ្នកចូលរួមជាសហគ្រាសធុនតូច និងមធ្យម រួមជាមួយតួអង្គសំខាន់ៗ មកពី ទាំងវិស័យសាធារណៈ និងឯកជន រួមមានដៃគូកម្មវិធីបញ្ជូនកម្ចី (Loan Referral Program) ដូចជា Maybank Cambodia, Canadia Bank, និង ADB Frontier ព្រមទាំងតំណាងផ្សារទំនើប អ្នកចែកចាយ វិនិយោគិន និងម្ចាស់សហគ្រាស​ ដែលមកពីទូទាំងប្រទេស។

កម្មវិធីជំនួបសហគ្រិនសម្រាប់ទីផ្សារ និងហិរញ្ញប្បទាន គឺជាផ្នែកមួយនៃយុទ្ធនាការផ្សព្វផ្សាយប្រព័ន្ធ អេកូឡូស៊ីសហគ្រិនភាព ឆ្នាំ២០២៦ ដែលផ្តួចផ្តើមឡើងដោយ សហគ្រិនខ្មែរ។ យុទ្ធនាការនេះ គឺជាស៊េរីនៃកម្មវិធីស្នូលប្រចាំឆ្នាំសំខាន់ៗរបស់សហគ្រិនខ្មែរ ដែលនឹងធ្វើការប្រព្រឹត្តទៅបណ្តាក់គ្នា — ចាប់ពីការប្រកួតប្រជែងគំនិតអាជីវកម្ម, ការប្រកួត គំរូអាជីវកម្មធុរកិច្ចថ្មី និងសហគ្រាសធុនតូច និង មធ្យម រហូតដល់កិច្ចប្រជុំ, សិក្ខាសាលា និងពិធីប្រគល់ពានរង្វាន់សហគ្រិនខ្មែរ។

សូមអរគុណដល់ ADB Frontier និងក្រុមហ៊ុន Manulife ដែលបានចូលរួមជាអ្នកឧបត្ថម្ភ និងគាំទ្រដល់ យុទ្ធនាការផ្សព្វផ្សាយប្រព័ន្ធអេកូឡូស៊ីសហគ្រិនភាព ឆ្នាំ២០២៦។