ទីភ្នាក់ងារព័ត៌មាន រ៉យទ័រ បានរាយការណ៍ កាលពីថ្ងៃទី១២ ខែវិច្ឆិកា ថា ជាទូទៅនិស្សិតអន្តរជាតិ ត្រូវបង់ថ្លៃសិក្សាខ្ពស់ជាងនិស្សិតក្នុងស្រុកឆ្ងាយណាស់ ដែលធ្វើឱ្យពួកគេក្លាយជាប្រភពចំណូលដ៏សំខាន់ជួយទ្រទ្រង់ការចំណាយលើការបង្រៀន និងការស្រាវជ្រាវរបស់ប្រទេសម្ចាស់ផ្ទះ។ ប៉ុន្តែបច្ចុប្បន្នគ្រឹះស្ថានឧត្តមសិក្សានៅសហរដ្ឋអាម៉េរិកកំពុងប្រឈមនឹងក្ដីបារម្ភយ៉ាងខ្លាំងចំពោះអនាគតរបស់ខ្លួន ដោយសារតែគ្រឹះស្ថានជាង១ភាគ៣ត្រូវបានព្យាករថា នឹងបន្តបាត់បង់ចំនួននិស្សិតបរទេសចុះឈ្មោះចូលរៀនបន្ថែមទៀតនៅប៉ុន្មានឆ្នាំខាងមុខ។
លទ្ធផលស្ទង់មតិរួមគ្នារវាងវេទិកាជ្រើសរើសនិស្សិតអន្តរជាតិរបស់ហូឡង់ និងអង្គការអប់រំ NAFSA របស់អាម៉េរិកបានរកឃើញថា ការរឹតបន្តឹងទិដ្ឋាការ និងគោលនយោបាយរបស់រដ្ឋាភិបាល គឺជារនាំងឧបសគ្គធំបំផុត ដែលរារាំងការទាក់ទាញនិស្សិតបរទេស។ ភាពយឺតយ៉ាវ នៃការផ្ដល់ទិដ្ឋាការ ការត្រួតពិនិត្យដ៏តឹងរ៉ឹង និងការរឹតត្បិតលើសិទ្ធិការងារក្រោយបញ្ចប់ការសិក្សា បានរុញច្រានឱ្យនិស្សិតជាច្រើនសម្រេចចិត្តពន្យារពេល ឬបោះបង់ចោលគម្រោងទៅសិក្សានៅប្រទេសទាំងនោះ។
ការធ្លាក់ចុះប្រជាប្រិយភាពរបស់សាកលវិទ្យាល័យអាម៉េរិក បានផ្ទុះឡើងបន្ទាប់ពីរដ្ឋបាលលោកប្រធានាធិបតី ដូណាល់ ត្រាំ បានដាក់ចេញវិធានការរឹតបន្តឹងយ៉ាងខ្លាំងលើនិស្សិតអន្តរជាតិ ដូចជាការពង្រីកការត្រួតពិនិត្យលើគណនីបណ្ដាញសង្គម ការលុបចោលទិដ្ឋាការរាប់ពាន់ករណី និងការកំណត់រយៈពេលស្នាក់នៅកាន់តែតឹងរ៉ឹងជាងមុន។ ទោះបីជាការស្ទង់មតិនេះត្រូវបានធ្វើឡើងមុនការបោះឆ្នោតពាក់កណ្តាលអាណត្តិកាលពីថ្ងៃទី៣ ខែវិច្ឆិកា ដែលគណបក្សប្រជាធិបតេយ្យដណ្ដើមបានការគ្រប់គ្រងសភាទាំងពីរវិញក៏ដោយ ក៏ប្រធានាធិបតី នៅតែកាន់អំណាចប្រតិបត្តិពេញលេញលើគោលនយោបាយទិដ្ឋាការ។
ងាកទៅចក្រភពអង់គ្លេសឯណោះវិញ រដ្ឋាភិបាលទីក្រុងឡុងដ៍ ក៏កំពុងរឹតបន្តឹងច្បាប់ទិដ្ឋាការនិស្សិតមិនចាញ់អាម៉េរិកនោះដែរ ដើម្បីកាត់បន្ថយលំហូរជនអន្តោប្រវេសន៍។ វិធានការទាំងនោះរួមមានការហាមឃាត់និស្សិតបរទេសមិនឱ្យនាំសាច់ញាតិ ឬអ្នកនៅក្នុងបន្ទុកមករស់នៅជាមួយ ព្រមទាំងគ្រោងកាត់បន្ថយរយៈពេលស្នាក់នៅស្វែងរកការងារធ្វើ បន្ទាប់ពីបញ្ចប់ការសិក្សាថែមទៀតផង។
ជុំវិញបញ្ហានេះលោកស្រី ហ្វានតា អាវ (Fanta Aw) នាយកប្រតិបត្តិ និងជាអគ្គនាយកអង្គការ NAFSA បានគូសបញ្ជាក់ថា លទ្ធផលស្ទង់មតិនេះបានឆ្លុះបញ្ចាំងយ៉ាងច្បាស់នូវអ្វីដែលអ្នកជំនាញបានមើលឃើញកន្លងមក ពោលគឺគោលនយោបាយជាតិ ដើរតួនាទីយ៉ាងសំខាន់ក្នុងការកំណត់ជោគវាសនា និងការសម្រេចចិត្តរបស់និស្សិតអន្តរជាតិ ថាតើពួកគេគួរជ្រើសរើសប្រទេសណាដើម្បីសិក្សា ស្រាវជ្រាវ និងចាប់ផ្ដើមអាជីពការងារទៅថ្ងៃអនាគត៕
អត្ថបទៈ សួន ឡង់ទី
