ហុងកុង និងសិង្ហបុរីកំពុងប្រជែងគ្នាដណ្តើមតំណែងជាមជ្ឈមណ្ឌលជួញដូរមាសនៅតំបន់អាស៊ី
រវាងទីក្រុងហុងកុង និងសិង្ហបុរី តើទីក្រុងមួយណានឹងក្លាយជាមជ្ឈមណ្ឌលជួញដូរមាសសកលដ៏មានឥទ្ធិពលបំផុតរបស់អាស៊ីនាពេលអនាគត? យោងតាមការចុះផ្សាយរ…
ដើម្បីសម្រេចមហិច្ឆតាបច្ចេកវិទ្យា AI និងបន្ទះឈីប ម៉ាឡេស៊ីដែលជាសមាជិកមួយរបស់អាស៊ានកំពុងសម្រុកចាក់ដីលុបសមុទ្រសាងសង់កោះ Silicon Island ដើម្បីបង្កើតមជ្ឈមណ្ឌលបច្ចេកវិទ្យាថ្មីដ៏ធំសម្បើមនៅភាគខាងត្បូងរដ្ឋប៉េណាងលើផ្ទៃដីប្រមាណ៩៣០ហិកតា។ នៅពេលសាងសង់បញ្ចប់ជាស្ថាពរ គម្រោងនេះត្រូវបានរំពឹងថា នឹងទាក់ទាញការវិនិយោគប្រមាណ១៧ពាន់លានដុល្លារអាម៉េរិក បង្កើតការងារប្រមាណ២២០,០០០កន្លែងនៅត្រឹមឆ្នាំ២០៥០ និងអាចរួមចំណែកប្រមាណ២៧០ពាន់លានដុល្លារដល់សេដ្ឋកិច្ចម៉ាឡេស៊ី។
ហេតុអ្វីម៉ាឡេស៊ីត្រូវសាងសង់កោះថ្មីបែបនេះ? ព្រោះរដ្ឋប៉េណាងបានក្លាយជាមជ្ឈមណ្ឌលផលិតបន្ទះឈីបដ៏សំខាន់មួយនៅអាស៊ីអាគ្នេយ៍ ប៉ុន្តែបញ្ហាធំ គឺកំពុងខ្វះដីសម្រាប់ពង្រីកឧស្សាហកម្ម។ ក្រុមហ៊ុនធំៗដូចជា Intel, AMD និង ASE Technology ជាដើមបានពង្រីកប្រតិបត្តិការនៅទីនោះរួចហើយ។
ពេលនេះ ម៉ាឡេស៊ីចង់ឈានពីការផ្គុំ និងធ្វើតេស្តបន្ទះឈីបទៅកាន់វិស័យដែលមានតម្លៃខ្ពស់ជាងនេះ ដូចជាការរចនាបន្ទះឈីប ការវេចខ្ចប់បន្ទះឈីបបែបទំនើប និងបច្ចេកវិទ្យាដែលពាក់ព័ន្ធនឹង AI។
គម្រោងសាងសង់កោះ Silicon Island ក៏នឹងមានឧទ្យានបច្ចេកវិទ្យាបៃតងដ៏ធំមួយទំហំប្រមាណ២៨០
ហិកតាផងដែរ ដោយដំណាក់កាលដំបូងគ្រោងនឹងប្រើថាមពលកកើតឡើងវិញរួមជាមួយលំនៅឋាន សណ្ឋាគារ ការិយាល័យ ឧទ្យាន និងប្រព័ន្ធរថភ្លើងធុនស្រាល។ ការចាក់ដីលុបសមុទ្របង្កើតកោះនេះបានចាប់ផ្តើមតាំងពីខែកញ្ញា ឆ្នាំ២០២៣ ហើយគិតត្រឹមថ្ងៃទី៣១ ខែកក្កដា ឆ្នាំ២០២៦ បានចាក់ដីរួចប្រមាណ១៦៨ហិកតា។ ចំណាយលើការចាក់ដី និងហេដ្ឋារចនាសម្ព័ន្ធសរុបត្រូវបានប៉ាន់ប្រមាណថាមានទំហំ៣,៥ពាន់លានដុល្លារ។
ប្រតិបត្តិការឧស្សាហកម្មដំបូងត្រូវបានគ្រោងចាប់ផ្តើមនៅឆ្នាំ២០២៩។ ម៉ាឡេស៊ី កំពុងដាក់ការរំពឹងខ្ពស់ថា ការរីកចម្រើនយ៉ាងឆាប់រហ័សនៃ AI នឹងជំរុញតម្រូវការបន្ទះឈីបកាន់តែខ្លាំង ហើយកោះ Silicon Island អាចក្លាយជាក្បាលម៉ាស៊ីនថ្មីសម្រាប់ជំរុញសេដ្ឋកិច្ចបច្ចេកវិទ្យារបស់រដ្ឋប៉េណាង៕
ដោយ: តែម សុខុម
