ក្រុមអ្នកជំនាញបានសង្កត់ធ្ងន់ថា រដ្ឋាភិបាលគួរតែប្រើធម៌ក្តៅវះកាត់ដកតំណែងមន្ត្រីអសមត្ថភាព ឬមន្ត្រីទុរេនទាំងនោះចេញ ដើម្បីស្តារទំនុកចិត្តរបស់ប្រជាពលរដ្ឋឡើងវិញ។
លោកបណ្ឌិត ញិល រដ្ឋា អ្នកជំនាញភូមិសាស្ត្រនយោបាយ និងសេដ្ឋកិច្ចអន្តរជាតិ បានលើកឡើងថា វត្តមាននៃទំនិញថៃ ខុសច្បាប់ ដែលនៅតែបន្តចរាចរលើទីផ្សារកំពុងឆ្លុះបញ្ចាំងពីរបាំងការពារព្រំដែនដែលមានភាពធូររលុងខ្លាំង និងការឃុបឃិតគ្នាគិតតែពីផលប្រយោជន៍ផ្ទាល់ខ្លួន ជាជាងប្រយោជន៍ជាតិ។ ដោយឡែកងាកមកមើលប្រព័ន្ធត្រួតពិនិត្យ និងខ្សែការពារសុវត្ថិភាពទំនិញនៅក្នុងស្រុកវិញ ក៏ហាក់បីដូចជាមិនទាន់មានប្រសិទ្ធភាពខ្ពស់នោះដែរ ដែលកត្តានេះបានជះឥទ្ធិពលអវិជ្ជមានយ៉ាងធ្ងន់ធ្ងរដល់ទំនុកចិត្តរបស់ពលរដ្ឋ ព្រមទាំងកំពុងរុញច្រានឱ្យអាជីវកម្ម និងសហគ្រាសក្នុងស្រុកប្រឈមនឹងការដួលរលំ ដោយសារមិនអាចប្រកួតប្រជែងជាមួយទំនិញលបលួចនាំចូលដែលគ្មានពន្ធទាំងនោះបាន។
សម្រាប់អ្នកជំនាញរូបនេះ មន្ត្រីថ្នាក់ក្រោមមួយចំនួនហាក់បីដូចជាកំពុងមើលស្រាល និងមើលរំលងបទបញ្ជាដ៏ម៉ឺងម៉ាត់របស់ថ្នាក់ដឹកនាំកំពូល។ ហេតុដូច្នេះ លោកយល់ឃើញថា រាជរដ្ឋាភិបាលត្រូវតែអនុវត្តវិធានការក្តៅភ្លាមៗ ដោយបញ្ចប់តំណែងមន្ត្រីប្រចាំការនៅច្រកព្រំដែនណាដែលអសមត្ថភាព រួមទាំងបង្កកទ្រព្យសម្បត្តិដែលបានមកពីអំពើខុសច្បាប់ទាំងនោះដាក់ជាសម្បត្តិរដ្ឋ។
ជាមួយគ្នានេះ លោកបណ្ឌិត គិន ភា អ្នកជំនាញវិទ្យាសាស្ត្រនយោបាយក៏បានសង្កេតឃើញដែរថា ការដែលទំនិញថៃខុសច្បាប់នៅតែអាចចរាចរណ៍លក់ដូរយ៉ាងរលូននៅលើទីផ្សារកម្ពុជា វាអាចបណ្តាលមកពីការប្រព្រឹត្តអំពើពុករលួយ និងការបើកដៃពីអាជ្ញាធរពាក់ព័ន្ធនៅតាមច្រកព្រំដែន ដែលទង្វើនេះ គឺជាឱសថពុលធ្វើឱ្យពលរដ្ឋបាត់បង់ទំនុកចិត្តលើការដឹកនាំរបស់រដ្ឋាភិបាល។
អត្ថបទគួរអាន
លោកបណ្ឌិត បានផ្តល់ជាយោបល់ថា រាជរដ្ឋាភិបាលគួរតែប្រញាប់ប្រញាល់ដាក់ទោសទណ្ឌជាទម្ងន់ដល់មន្ត្រីអនាធិបតេយ្យទាំងឡាយណាដែលហ៊ានជាន់ឈ្លីវិធានការរបស់ថ្នាក់ដឹកនាំ ដើម្បីស្តារកិត្តិយស និងទំនុកចិត្តរបស់សាធារណៈជនឡើងវិញ ដោយគ្មានការលើកលែង ឬយោគយល់ឡើយ។
គួរបញ្ជាក់ថា នៅប៉ុន្មានថ្ងៃចុងក្រោយនេះ ពោលគឺបន្ទាប់ពីមានការបញ្ជាយ៉ាងម៉ឺងម៉ាត់ពីសម្តេតេជោ ហ៊ុន សែន ប្រមុខរដ្ឋស្តីទី កម្លាំងសមត្ថកិច្ចនៅតាមរាជធានីខេត្តជាច្រើន បានបើកយុទ្ធនាការទ្រង់ទ្រាយធំចុះត្រួតពិនិត្យទីតាំងឃ្លាំងស្តុកទំនិញតូចធំជាច្រើន ដែលសង្ស័យថា មានការនាំចូលស្តុកទុក និងចែកចាយផលិតផលបង្កកខុសច្បាប់មានប្រភពមកពីប្រទេសថៃ។ នៅក្នុងប្រតិបត្តិការនោះ សមត្ថកិច្ចបានរកឃើញឃ្លាំងជាច្រើនទីតាំងបានលបលួចស្តុកទុកសាច់បង្កក គ្រឿងទេស ភេសជ្ជៈ និងសម្ភារប្រើប្រាស់ជាច្រើនប្រភេទនាំចូលពីប្រទេសថៃ ដោយទំនិញខ្លះបានផុតសុពលភាពប្រើប្រាស់ ឬខូចគុណភាព ហើយទំនិញថៃខ្លះបានពាក់អាវវៀតណាម។
ពាក់ព័ន្ធការនាំចូលសាច់បង្កកពីប្រទេសថៃនេះដែរសម្តេចតេជោ ហ៊ុន សែន បានបញ្ជាឱ្យអាជ្ញាធរស៊ើបអង្កេតឱ្យដល់ឬសគល់ ក្នុងគោលដៅបោសសម្អាតអ្នកនាំចូល និងមន្ត្រីគប់គិតពាក់ព័ន្ធក្នុងអំពើរត់ពន្ធទំនិញថៃចូលមកទីផ្សារកម្ពុជាតាមច្រកព្រំដែនគោក ដែលកំពុងបិទមិនឱ្យមានការចរាចរចេញចូល។ ជាមួយគ្នានេះ សម្តេចតេជោ ព្រមានចាត់វិធានការមន្ត្រីពាក់ព័ន្ធទាំងនោះមិនឱ្យមានអ្នកណាម្នាក់រួចខ្លួននោះឡើយ៕
អត្ថបទ៖ ជា ម៉ារ៉ា
