ការស្នើនេះធ្វើឡើងបន្ទាប់ពីអង្គការឧតុនិយមពិភពលោក (WMO) បានគូសបញ្ជាក់ថា ស្ថានភាពបាតុភូតអែលនីណូ អាចនឹងចាប់ផ្តើមលេចឡើងមុនខែសីហា និងអូសបន្លាយរហូតដល់ខែវិច្ឆិកា ចំណែកឯក្រសួងធនធានទឹកកម្ពុជា ក៏បានព្យាករដែរថា ស្ថានភាពកូនរដូវប្រាំងនឹងវាយលុកនៅក្នុងសប្តាហ៍ទី១ នៃខែសីហា ឆ្នាំ២០២៦ ខាងមុខនេះ ដែលមានសភាពលឿនជាងកាលពីឆ្នាំ២០២៥។
លោកបណ្ឌិត ជ័យ តិច អ្នកសិក្សាស្រាវជ្រាវសេដ្ឋកិច្ចសង្គម យល់ឃើញថា កម្ពុជា គួរតែបង្កើនការយកចិត្តទុកដាក់ក្នុងការរៀបចំយន្តការ និងតាមដានឱ្យបានហ្មត់ចត់ចំពោះបម្រែបម្រួលអាកាសធាតុ ដែលបង្កឡើងដោយបាតុភូតអែលនីណូ ដើម្បីផ្តល់ព័ត៌មានព្រមានជាមុនដល់កសិករក្នុងការរៀបចំផែនការដាំដុះឱ្យបានត្រឹមត្រូវ។ លោកបណ្ឌិត បានសង្កត់ធ្ងន់ថា កសិករផ្ទាល់ត្រូវតែតាមដាននូវរាល់ការជូនដំណឹងរបស់ក្រសួងធនធានទឹក និងឧតុនិយម ឱ្យបានជាប់លាប់ ខណៈក្រសួងកសិកម្ម រុក្ខាប្រមាញ់ និងនេសាទ គួរតែត្រៀមបម្រុងពូជដំណាំផ្សេងៗឱ្យបានរួចរាល់ ដើម្បីជួយអន្តរាគមន៍ និងគាំទ្រដល់កសិករក្នុងការស្តារការដាំដុះឡើងវិញក្នុងករណីមានការខូចខាតជាយថាហេតុ។
ដោយឡែក លោក អួន ស៊ីឡុត ប្រធានសមាគមស្វាយចន្ទីកម្ពុជា បានកត់សម្គាល់ថា បច្ចុប្បន្នក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ កំពុងតាមដាន និងមានវិធានការនានាក្នុងការបង្ការផលប៉ះពាល់លើវិស័យកសិកម្ម។ បើតាមអ្នកជំនាញរូបនេះដំណាំស្វាយចន្ទីហាក់ពុំសូវមានការបារម្ភខ្លាំងដូចដាំណាំស្រូវ ដែលត្រូវការប្រើប្រាស់ទឹកច្រើននោះទេ។
ជាមួយគ្នានេះ លោក អិល ឈិញ ប្រធានសមាគមកសិករដំឡូងមីខ្មែរ បានលើកឡើងថា ប្រសិនបើបាតុភូត អែលនីណូ កើតឡើងដូចការព្យាករមែននោះ វានឹងអាចបង្កផលប៉ះពាល់ដល់ដំណាំដំឡូងមីនៅក្នុងតំបន់ដែលរាំងស្ងួត។ បើតាមអ្នកជំនាញរូបនេះ កសិករត្រូវប្រមូលផល កែច្នៃ និងរក្សាពូជដំឡូងឱ្យបានល្អ ដើម្បីត្រៀមស្ដាឡើងវិញ ប្រសិនបើមានការការខូចខាត។
ក្រសួងធនធានទឹក និងឧតុនិយម បានគូសបញ្ជាក់ថា ស្ថានភាពបាតុភូត អែលនីណូ នឹងកើនដល់កម្រិត១០០% ក្នុងខែកក្កដា និងកើនដល់កម្រិតអតិបរមាក្នុងខែវិច្ឆិកា ឆ្នាំ២០២៦។ ក្រៅពីនេះបាតុភូត អាយ អូ ឌី ស្ថិតនៅអព្យាក្រឹត។ បើតាមក្រសួងធនធានទឹក ស្ថានភាពបែបនេះនឹងធ្វើឱ្យស្ថានភាពចាប់ពីពាក់កណ្តាលរដូវវស្សាដល់ចុងរដូវស្សា ឆ្នាំ២០២៦ ពោលគឺចាប់ពីពាក់កណ្តាលខែកក្កដា ដល់ខែសីហា កូនរដូវប្រាំងនឹងចាប់ផ្តើមនៅក្នុងសប្តាហ៍ទី១នៃខែសីហា ដែលអាចមានរយៈពេលពីរសប្តាហ៍។ ជាមួយគ្នានេះ ក្រសួងស្នើឱ្យអាជ្ញាធរតាមបណ្តាខេត្តនានាចាត់វិធានការរក្សាទឹកឱ្យបានច្រើននៅពាក់កណ្តាល និងចុងរដូវវស្សានេះ ដើម្បីត្រៀមបង្ការការខ្វះខាតទឹកនៅរដូវប្រាំងខាងមុខ៕
អត្ថបទ៖ បូ ដូឡា
