វៀតណាម ជិតសម្រេចកិច្ចព្រមព្រៀងពាណិជ្ជកម្មជាមួយអាម៉េរិក និងបានច្រានចោលការចោទប្រកាន់រឿងបន្លំទំនិញចិន ឆ្លងដែន

ប្រធានាធិបតី និងជាអគ្គលេខាធិការបក្សកុម្មុយនីស្តវៀតណាម លោក តូ ឡឹម ចង់ពន្លឿនការចរចាជាមួយរដ្ឋបាលលោក ដូណាល់ ត្រាំ ដើម្បីឈានទៅសម្រេចបានកិច្ចព្រមព្រៀងពាណិជ្ជកម្មដែលមានតុល្យភាព និងស្មើភាព។ មេដឹកនាំដ៏មានឥទ្ធិពលរបស់វៀតណាម រូបនេះ ក៏បានបង្ហាញពីគម្រោងបង្កើនការទិញផលិតផលបច្ចេកវិទ្យាជាន់ខ្ពស់ពីអាម៉េរិក ផងដែរ រួមមាន យន្តហោះ ឧបករណ៍ថាមពលនុយក្លេអ៊ែ និងហេដ្ឋារចនាសម្ព័ន្ធ ដើម្បីជួយកាត់បន្ថយគម្លាតពាណិជ្ជកម្មរវាងប្រទេសទាំងពីរ។
ទន្ទឹមនេះ អាម៉េរិក បានជំរុញឱ្យវៀតណាម ពង្រឹងការត្រួតពិនិត្យនីតិវិធីគយ និងប្រភពដើមទំនិញដោយសារបារម្ភថា ទំនិញចិន អាចត្រូវបានវេចខ្ចប់ ឬកែច្នៃឡើងវិញនៅវៀតណាម មុននាំចេញទៅអាម៉េរិក ដើម្បីគេចពន្ធគយ។ តែយ៉ាងណាលោក តូ ឡឹម បានបដិសេធថា វៀតណាម មិនទទួលយកការប្រើប្រទេសខ្លួនធ្វើជាផ្លូវឆ្លងសម្រាប់ទំនិញគេចពីពន្ធនោះឡើយ។ លោកសង្កត់ធ្ងន់ថា ទំនិញនាំចេញពីវៀតណាម ត្រូវតែមានប្រភពផលិតកម្មពិតប្រាកដ និងបំពេញតាមស្តង់ដាអន្តរជាតិ។
បច្ចុប្បន្នវៀតណាម ប្រឈមនឹងពន្ធគយអាម៉េរិក ១២,៥% និងការស៊ើបអង្កេតលើបញ្ហាពាណិជ្ជកម្មពលកម្មដោយបង្ខំ សមត្ថភាពផលិតកម្មលើសតម្រូវការ និងកម្មសិទ្ធិបញ្ញា។ យ៉ាងណាមិញ លោក តូ ឡឹម បានអះអាងថា ការចរចា និងការស៊ើបអង្កេតកំពុងដំណើរការយ៉ាងរលូន ខណៈវៀតណាម កំពុងរឹតបន្តឹងការអនុវត្តច្បាប់គយ និងចាត់វិធានការប្រឆាំងការរំលោភបំពានពាណិជ្ជកម្ម។

សូមបញ្ជាក់ថា ពេលនេះលោក តូ ឡឹម កំពុងស្ថិតនៅទីក្រុងញូវយ៉ក ចូលរួមមហាសន្និបាតអង្គការសហប្រជាជាតិ ហើយត្រូវបានរំពឹងថា នឹងជួបនាយករដ្ឋមន្ត្រីកាណាដា លោក Mark Carney ផងដែរ៕

ដោយ: តែម សុខុម