អ៊ីរ៉ង់ ប្រកាសនឹងយកថ្លៃសេវាឆ្លងកាត់ច្រកហ័រម៉ូស ដោយផ្តល់ការអនុគ្រោះពិសេសសម្រាប់នាវាចិន និងប្រទេសជាមិត្ត ទោះបីអាម៉េរិក ជំទាស់យ៉ាងណាក្តី

ទីភ្នាក់ងារព័ត៌មាន Al Jazeera បានរាយការណ៍ថា ឯកអគ្គរដ្ឋទូតអ៊ីរ៉ង់ ប្រចាំប្រទេសចិនថា នាវាដែលធ្វើដំណើរឆ្លងកាត់ច្រកសមុទ្រ ហ័រម៉ូស នឹងត្រូវតម្រូវឱ្យបង់ថ្លៃសេវាស្របតាមច្បាប់ថ្មីរបស់អ៊ីរ៉ង់។ ប៉ុន្តែសម្រាប់ប្រទេសចិន និងបណ្តាប្រទេសជាមិត្តនឹងទទួលបានការពិនិត្យ និងសម្រាលលក្ខខណ្ឌអនុគ្រោះជាពិសេស។ ការប្រកាសនេះវាហាក់ផ្ទុយពីកិច្ចព្រមព្រៀងបឋមដែលអ៊ីរ៉ង់ និងអាម៉េរិក បានចុះហត្ថលេខាកាលពីមិថុនា កន្លងទៅ ដែលបានចែងថា រាល់នាវាពាណិជ្ជកម្មទាំងអស់នឹងអាចធ្វើដំណើរឆ្លងកាត់ផ្លូវទឹកដ៏សំខាន់មួយនេះដោយមិនតម្រូវឱ្យបង់ថ្លៃសេវាអ្វីឡើយក្នុងរយៈពេល ៦០ថ្ងៃ។
នៅក្នុងវេទិកាសន្តិភាពពិភពលោកនៅទីក្រុងប៉េកាំង កាលពីថ្ងៃទី៤ ខែកក្កដា ឯកអគ្គរដ្ឋទូតអ៊ីរ៉ង់ ប្រចាំប្រទេសចិន លោក អាប់ដូលរេហ្សា រ៉ាម៉ានី ហ្វាស្លី (Abdolreza Rahmani Fazli) បានអះអាងថា អ៊ីរ៉ង់ កំពុងធ្វើកិច្ចសហប្រតិបត្តិការជាមួយប្រទេសអូម៉ង់ ដើម្បីរៀបចំសណ្ដាប់ធ្នាប់នៅច្រកសមុទ្រហ័រម៉ូស ឡើងវិញ។ លោកបានសង្កត់ធ្ងន់ថា ក្នុងនាមជាប្រទេសជាម្ចាស់ដែនទឹកនៃច្រកសមុទ្រ ហ័រម៉ូស ខ្លួននឹងយកថ្លៃសេវាកម្មលើកប៉ាល់ដែលឆ្លងកាត់ច្រកនេះ។ ប៉ុន្តែកម្រៃនោះមិនមែនជាការបង់ពន្ធផ្លូវទឹក ឬពន្ធគយនោះទេ គឺធ្វើឡើងដើម្បីធានាសុវត្ថិភាពក្នុងការឆ្លងកាត់ និងដើម្បីដោះស្រាយផលប៉ះពាល់បរិស្ថាន ដែលបង្កឡើងដោយការធ្វើចរាចរណ៍ដ៏ណែនណាន់តាប់របស់នាវាទាំងនោះ។ ប៉ុន្តែលោកបានបញ្ជាក់ថា នឹងមានការលើកលែង និងសម្រួលថ្លៃសេវាសម្រាប់នាវារបស់ប្រទេសចិន ក៏ដូចជាប្រទេសជាមិត្តផ្សេងទៀត។
អ្នកជំនាញភូមិសាស្ត្រនយោបាយមជ្ឈិមបូព៌ា លោក បឺណាដ អាវ (Bernard Aw) បានលើកឡើងថា ការបើកឱ្យដំណើរការឡើងវិញ នៃនាវាពាណិជ្ជកម្មតាមច្រកសមុទ្រ ហ័រម៉ូស បានជួយសម្រាលសម្ពាធលើទីផ្សារថាមពលសកលយ៉ាងច្រើន ដោយបានធ្វើឱ្យតម្លៃប្រេងធ្លាក់ចុះមកនៅត្រឹមកម្រិតធម្មតាវិញ ដូចកាលពីមុនពេលកើតមានជម្លោះ។ ប៉ុន្តែលោកសង្កេតឃើញថា ការបើកផ្លូវទឹកដ៏សំខាន់មួយនេះនៅតែបន្សល់ទុកនូវសំណួរសំខាន់ៗជាច្រើន ដែលមិនទាន់មានចម្លើយ ជាពិសេសថាតើ ច្រកសមុទ្រ Hormuz នឹងត្រូវគ្រប់គ្រង និងចាត់ចែងបែបណា បន្ទាប់ពីរយៈពេល៦០ថ្ងៃត្រូវផុតកំណត់? ព្រោះបច្ចុប្បន្នមាននាវាប្រមាណ១,២០០គ្រឿងផ្ទុកទំនិញតម្លៃរហូតដល់ទៅ១២៥ពាន់លានដុល្លារកំពុងជាប់គាំងនៅឡើយ៕

អត្ថបទៈ សួន ឡង់ទី