ឧកញ៉ា គឹម ហ៊ាង ប្រធានក្រុមប្រឹក្សាភិបាលប្រតិបត្តិ នៃក្រុមហ៊ុន បុរី វិមានភ្នំពេញ យល់ឃើញថា តំបន់បឹងកេងកងទី១ និងទួលគោកព្រមទាំងតំបន់ភ្នំពេញថ្មី បានក្លាយជាតំបន់កំពូល នៃអចលនទ្រព្យ ដែលមានសក្ដានុពលខ្ពស់ ខណៈតំបន់ប៉ែកខាងជើងរាជធានីភ្នំពេញ ក៏កំពុងក្លាយជាតំបន់ទាក់ទាញសម្រាប់ការរស់នៅបែបប្រណីតផងដែរ។ ជាមួយគ្នានេះ អ្នកជំនាញរូបនេះលើកឡើងថា តំបន់ប៉ែកខាងត្បូងរាជធានីភ្នំពេញនឹងក្លាយជាតំបន់មានការទាក់ទាញខ្លាំងនាពេលខាងមុខ ខណៈតំបន់នេះមានអាកាសយានដ្ឋានអន្តរជាតិតេជោ និងមានហេដ្ឋារចនាសម្ព័ន្ធកំពុងកសាងជាច្រើនទៀត។
ដោយឡែកឧកញ៉ា ចេង ខេង ប្រធានសមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា សង្កេតឃើញថា ដីធ្លីនៅតំបន់ប៉ែកខាងកើតទន្លេមេគង្គ នៃរាជធានីភ្នំពេញនឹងក្លាយជាតំបន់មានសក្ដានុពលខ្ពស់នៅពេលខាងមុខ។ បើតាមអ្នកជំនាញរូបនេះ នាពេលបច្ចុប្បន្នដីធ្លីនៅក្នុងតំបន់នេះនៅមានតម្លៃសមរម្យនៅឡើយ ហើយជាឱកាសសម្រាប់អ្នកវិនិយោគ និងការសាងសង់ផ្ទះសម្រាប់រស់នៅ ខណៈមកទល់ពេលនេះរដ្ឋាភិបាលកំពុងមានផែនការសាងសង់ស្ពានដែលនឹងធ្វើឱ្យដីធ្លីនៅតំបន់នេះមានការឡើងថ្លៃនាពេលខាងមុខ។
ជាមួយគ្នានេះ ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា កត់សម្គាល់ឃើញថា មកទល់ពេលនេះតំបន់ប៉ែកខាងត្បូង រាជធានីភ្នំពេញ កំពុងទាក់ទាញអ្នកអភិវឌ្ឍន៍នានាមកធ្វើការវិនិយោគ ខណៈនៅក្នុងតំបន់នេះមានអាកាសយានដ្ឋានលំដាប់អន្តរជាតិ និងកំពុងមានការអភិវឌ្ឍន៍នូវហេដ្ឋារចសម្ព័ន្ធធំៗជាច្រើនសម្រាប់បម្រើដល់វិស័យសាធារណៈ។ អ្នកជំនាញរូបនេះអះអាងថា មកទល់ពេលនេះ តម្លៃអចលនទ្រព្យនៅក្នុងតំបន់នេះមានការកើនឡើងជារៀងរាល់ឆ្នាំ។
បើតាមការបញ្ជាក់របស់លោកឧកញ៉ា សន សៀប បច្ចុប្បន្នតម្លៃអចលនទ្រព្យនៅតំបន់ភាគខាងត្បូង ជាពិសេសតាមបណ្តោយផ្លូវ៦០ម៉ែត្រមានសន្ទុះកើនឡើងជារៀងរាល់ឆ្នាំ ដោយតម្លៃជាមធ្យមហក់ឡើងក្នុងរង្វង់ពី៥០០ដុល្លារដល់២,០០០ដុល្លារក្នុងមួយម៉ែត្រការ៉េរួចទៅហើយ៕
អត្ថបទ៖ បូ ដូឡា
