តើមានចំណុចសំខាន់អ្វីខ្លះដែលកម្ពុជា គួរសិក្សាពីវៀតណាម ដើម្បីពង្រឹងភាពធន់ និងជំរុញកំណើនសេដ្ឋកិច្ច?
អ្នកជំនាញសេដ្ឋកិច្ច បានគូសបញ្ជាក់ថា សន្ទុះកំណើនសេដ្ឋកិច្ចដ៏លេចធ្លោរបស់វៀតណាម នៅក្នុងតំបន់អាស៊ាន គឺជាផ្លែផ្កានៃការកែទម្រង់រដ្ឋបាលស៊ីជម្រៅ ក…
ឧកញ៉ា កែវ បូណ៌ភិរក្ស អគ្គនាយកក្រុមហ៊ុន បូទីកា និងបុរី ឡុងនី កត់សម្គាល់ឃើញថា វិបត្តិដែលកើតមានជាបន្តបន្ទាប់នៅតែដាក់សម្ពាធលើវិស័យអចលនទ្រព្យពិភពលោក។ បើតាមអ្នកជំនួញរូបនេះ មកទល់ពេលនេះ វិស័យអចលនទ្រព្យកម្ពុជា ក៏ពុំទាន់មានសញ្ញាប្រសើរឡើងវិញនៅឡើយទេ បើធៀបនឹងប៉ុន្មានឆ្នាំកន្លងទៅ។ ការណ៍នេះត្រូវបានឧកញ៉ា កែវ បូណ៌ភិរក្ស យល់ឃើញថា ភាគីពាក់ព័ន្ធគួរតែជំរុញការវិនិយោគសាធារណៈឱ្យបានច្រើន ផ្ដល់ប្រាក់កម្ចីដោយមិនមានទ្រព្យបញ្ចាំឱ្យបានទូលំទូលាយ បង្កើតគម្រោងលំនៅឋានតម្លៃសមរម្យ ជំរុញការដោះស្រាយលំនៅឋាន និងអគារជាប់គាំង និងការទាញយកទុនពីវិនិយោគិនក្រៅប្រទេសជាដើម។ បើតាមអ្នកជំនាញរូបនេះ ការបែងចែកតំបន់សម្រាប់អភិវឌ្ឍន៍ឱ្យបានច្បាស់លាស់ និងការលើកទឹកចិត្តតាមរយៈពន្ធដារ ក៏អាចរួមចំណែកក្នុងការស្ដារវិស័យអចលនទ្រព្យកម្ពុជាផងដែរ។
ជាមួយគ្នានេះ លោក ប៉ូ អ៊ាវគង់ អគ្គនាយកក្រុមហ៊ុន អ៊ែតវ៉ានស៍ រៀលអ៊ីស្ទេត បានវាយតម្លៃថា ទីផ្សារអចលនទ្រព្យកម្ពុជាត្រូវការពេលវេលាយូរបន្ថែមទៀត ដើម្បីស្តារទំនុកចិត្ត និងតម្រូវការឡើងវិញ ព្រោះសម្ពាធពីវិបត្តិនានានៅតែបន្តរាំងស្ទះដល់លំហូរទុន។ ស្ថិតក្នុងស្ថានភាពនេះ លោកស្នើឱ្យរដ្ឋាភិបាលពិចារណាដាក់ចេញនូវកញ្ចប់លើកទឹកចិត្តបន្ថែមជូនវិស័យឯកជន ដើម្បីដាស់សកម្មភាពទិញ-លក់ និងអភិវឌ្ឍន៍ឱ្យរស់រវើកឡើងវិញ។
ដោយឡែក លោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា សង្កេតឃើញថា ភាពជាប់គាំងក្នុងវិស័យអលចនទ្រព្យមិនមែនកើតមានតែលើកម្ពុជានោះទេ បណ្ដាប្រទេសផ្សេងទៀតក្នុងតំបន់ ក៏ជួបបញ្ហាដូចគ្នាដែរ។ សម្រាប់អ្នកជំនាញរូបនេះ វិបត្តិដែលកើតឡើងជាបន្តបន្ទាប់បានជះឥទ្ធិពលដល់ប្រាក់ចំណូលរបស់ពលរដ្ឋមួយចំនួន ខណៈវិនិយោគិនបរទេស ក៏មានភាពស្ទាក់ស្ទើក្នុងការបណ្ដាក់ទុនវិនិយោគ ជាហេតុធ្វើឱ្យតម្រូវការនៅក្នុងវិស័យដ៏សំខាន់នេះពុំសូវមានសកម្មភាពខ្លាំងដូចមុន។ សម្រាប់លោកបណ្ឌិត ហុង វណ្ណៈ វិស័យអលចនទ្រព្យកម្ពុជានៅតែមានលទ្ធភាពរីកចម្រើនឡើងវិញនាពេលខាងមុខ តាមរយៈគោលនយោបាយទាក់ទាញវិនិយោគិនបរទេស និងអ្នកទេសចរ ព្រមទាំងការរៀបចំកម្លាំងពលកម្មដើម្បីបង្កើនប្រាក់ចំណូលជំរុញសកម្មភាពសេដ្ឋកិច្ចជាដើម។
សូមរំលឹកថា កាលពីពេលកន្លងទៅក្រសួងសេដ្ឋកិច្ច និងហិរញ្ញវត្ថុព្យាករថា វិស័យអចលនទ្រព្យកម្ពុជា នៅឆ្នាំ២០២៦ នឹងមាននិន្នាការថមថយដោយរំពឹងមានកំណើនក្នុងអត្រា០,៦%ប៉ុណ្ណោះ ពោលគឺទាបជាងឆ្នាំ២០២៥ ដែលមានអត្រាកំណើន១,១% ដោយសារកម្មវិបាកជាអវិជ្ជមាន នៃភាពមិនប្រាកដប្រជានៃកត្តាសេដ្ឋកិច្ច និងផលរំខាននៃការបង្ក្រាប និងទប់ស្កាត់សកម្មភាពឆបោកតាមប្រព័ន្ធបច្ចេកវិទ្យាក្នុងរយៈពេលខ្លីមកលើសកម្មភាពទិញ-លក់ជារួម ពិសេសអគារការិយាល័យ និងអគារប្រើប្រាស់ចម្រុះ៕
អត្ថបទ៖ បូ ដូឡា
