បើទោះបីជា ដំណើរទស្សនកិច្ចរបស់លោក ស៊ី ជីនពីង ទៅកាន់សហរដ្ឋអាមេរិក ជាលើកដំបូងក្នុងរយៈពេលជិត៣ឆ្នាំមកនេះ ត្រូវបានគេរំពឹងថា នឹងមិននាំមកនូវការបោះជំហានធំដុំក្ដី ប៉ុន្តែ គឺជឿជាក់ថា ភាគីអាមេរិក និងចិន អាចព្រមព្រៀងគ្នាលើការបន្ត ពង្រីករយៈពេលបន្ថែមនៃការផ្អាកសង្គ្រាមពាណិជ្ជកម្ម ដែលបានអនុវត្តមកអស់រយៈពេល១១ខែរួចមកហើយនោះ។
មុនជំនួបរបស់មេដឹកនាំទាំងពីរ រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បាននិយាយថា ភាគីអាមេរិក និងចិនបានព្រមព្រៀងគ្នាបន្ត បន្ដការផ្អាកសង្គ្រាមពាណិជ្ជកម្ម រយៈពេល ២ខែបន្ថែមទៀត ពោលគឺរហូតដល់ថ្ងៃទី១០ ខែមករា ឆ្នាំ២០២៧។
ទោះយ៉ាងណាក៏ដោយចុះ ការមកដល់របស់លោក ស៊ី លើទឹកដីសហរដ្ឋអាម៉េរិកលើកនេះ ត្រូវបានទទួលស្វាគមន៍យ៉ាងកក់ក្ដៅ ដោយ លោក ត្រាំ និងភរិយា ចេញបានទៅទទួលលោក ស៊ី និងភរិយា នៅលើផ្លូវយន្តហោះ ដែលមានកម្រាលព្រំក្រហមប្រវែងប្រមាណ ៣០ម៉ែត្រ អមដោយកងតន្ត្រីយោធា ការបាញ់កាំភ្លើងគោរព និងការហោះហើររបស់យន្តហោះយោធាផងដែរ។ នេះក៏ជាការទទួលមេដឹកនាំបរទេសដោយផ្ទាល់នៅមូលដ្ឋានទ័ពអាកាស Joint Base Andrews ជាលើកដំបូងរបស់ប្រធានាធិបតីអាម៉េរិក ក្នុងរយៈពេល ១១ឆ្នាំមកនេះ។
ប៉ុន្តែ នៅពីក្រោយពិធីដ៏អធិកអធមនេះ កិច្ចពិភាក្សារវាងមេដឹកនាំទាំងពីរ ត្រូវបានគេរំពឹងថា នឹងមិនមែនជារឿងងាយស្រួលឡើយ។
សហរដ្ឋអាមេរិក និងចិន នៅតែមានភាពខ្វែងគំនិតគ្នាលើបញ្ហាសំខាន់ៗជាច្រើន រួមមាន ពាណិជ្ជកម្ម និងពន្ធគយ បច្ចេកវិទ្យា បញ្ហាតៃវ៉ាន់ ការនាំចេញបច្ចេកវិទ្យា រ៉ែធាតុកម្រ និងទំនាក់ទំនងរបស់ចិនជាមួយអ៊ីរ៉ង់។
សម្រាប់បញ្ហាតៃវ៉ាន់ ប្រភពដែលដឹងពីផែនការកិច្ចពិភាក្សាបានឱ្យដឹងថា លោក ស៊ី អាចលើកឡើងយ៉ាងខ្លាំងអំពីការទាមទាររបស់ទីក្រុងប៉េកាំងចំពោះតៃវ៉ាន់ ខណៈរដ្ឋាភិបាលទីក្រុងវ៉ាស៊ីនតោនមិនចង់ឱ្យបញ្ហានេះក្លាយជាចំណុចសំខាន់នៃកិច្ចពិភាក្សា។
ជាមួយគ្នានេះ លោក ត្រាំ ត្រូវបានរំពឹងថា នឹងបន្តរក្សាការគ្រប់គ្រងលើការនាំចេញបច្ចេកវិទ្យារបស់អាមេរិក ទោះបីជាចិនជំទាស់នឹងវិធានការទាំងនេះក៏ដោយ។
ទោះជាយ៉ាងណា កិច្ចពិភាក្សាអាចនឹងឈានទៅរកកិច្ចព្រមព្រៀងមួយចំនួន ដូចជា ការកាត់បន្ថយពន្ធគយលើវិស័យជាក់លាក់ កិច្ចសហប្រតិបត្តិការប្រឆាំងការជួញដូរគ្រឿងញៀន និងការពង្រីកកិច្ចសន្ទនារវាងកងទ័ពនៃប្រទេសទាំងពីរ។
ចំណុចមួយទៀតដែលអាចលេចឡើងក្នុងកិច្ចពិភាក្សា គឺបញ្ញាសិប្បនិម្មិត ឬ AI។ អាមេរិក និងចិនកំពុងប្រកួតប្រជែងគ្នាយ៉ាងខ្លាំងក្នុងវិស័យនេះ ប៉ុន្តែប្រទេសទាំងពីរក៏មានការព្រួយបារម្ភអំពីហានិភ័យដែលអាចកើតចេញពីការរីកចម្រើនយ៉ាងលឿននៃ AI ផងដែរ។
