ហេដ្ឋារចនាសម្ព័ន្ធ

ឡាវ មានមហិច្ឆតាប្រែក្លាយខ្លួនជាមជ្ឈមណ្ឌលផ្លូវដែក និងថាមពលប្រចាំតំបន់អាស៊ាន


ក្នុងនាមជាប្រទេស ដែលសម្បូរវារីអគ្គីសនី និងមានផ្លូវរថភ្លើងតភ្ជាប់ផ្ទាល់ជាមួយចិន ប្រទេសឡាវ កំពុងជំរុញផែនការយុទ្ធសាស្ត្រ ដើម្បីប្រែក្លាយខ្លួនទៅជាមជ្ឈមណ្ឌលភស្តុភាកម្មផ្លូវដែក និងថាមពលដ៏សំខាន់នៅក្នុងតំបន់អាស៊ាន។ សារព័ត៌មាន Laotian Times បានរាយការណ៍ថា គម្រោងអាទិភាពទាំងនេះត្រូវបានថ្នាក់ដឹកនាំកំពូលរបស់ឡាវលើកឡើងទាំងនៅក្នុងកិច្ចប្រជុំកំពូលអាស៊ាន នៅទីក្រុងម៉ានីល និងជំនួបទ្វេភាគីជាមួយមេដឹកនាំវៀតណាម នៅរាជធានីភ្នំពេញថ្មីៗនេះ។
ឡាវ មានមហិច្ឆតាប្រែក្លាយខ្លួនជាមជ្ឈមណ្ឌលផ្លូវដែក និងថាមពលប្រចាំតំបន់អាស៊ាន
ដោយ

រដ្ឋាភិបាលឡាវ បានបង្ហាញជំហរយ៉ាងមុតមាំ ក្នុងការពង្រីកកិច្ចសហប្រតិបត្តិការផ្លូវដែក និងថាមពលក្នុងតំបន់អំឡុងកិច្ចប្រជុំកំពូលអាស៊ាន លើកទី៤៩ និងកិច្ចប្រជុំពាក់ព័ន្ធនៅទីក្រុងម៉ានីល ចាប់ពីថ្ងៃទី១៥ ដល់ថ្ងៃទី១៧ ខែវិច្ឆិកា ខណៈប្រធានាធិបតី ថងលូន ស៊ីសូលីត ក៏បានជជែកពីគម្រោងហេដ្ឋារចនាសម្ព័ន្ធឆ្លងដែនជាមួយវៀតណាម នៅរាជធានីភ្នំពេញ ផងដែរ។

នៅទីក្រុងម៉ានីល នាយករដ្ឋមន្ត្រីឡាវ លោក សាឡឺមសាយ គុំម៉ាសិទ្ធ (Saleumxay Kommasith) បានសង្កត់ធ្ងន់លើការតភ្ជាប់បណ្តាញដឹកជញ្ជូនក្នុងតំបន់ដូចជាផ្លូវដែកឡាវ-ចិន និងការជំរុញថាមពលស្អាត រួមទាំងគម្រោងបណ្តាញថាមពលអាស៊ាន។ លោកបានគូសបញ្ជាក់ថា ការផ្តោតលើគម្រោងទាំងនេះ គឺជាភាពចាំបាច់ ស្របពេលឡាវ កំពុងត្រៀមខ្លួនចាកចេញពីឋានៈជាប្រទេសអភិវឌ្ឍន៍តិចតួចបំផុត (LDC)។

ស្របពេលលោក សាឡឺមសាយ មានវត្តមាននៅម៉ានីល ប្រធានាធិបតី ថងលូន ស៊ីសូលីត បានជួបជាមួយប្រធានាធិបតីវៀតណាម លោក តូ ឡឹម នៅរាជធានីភ្នំពេញ អំឡុងកិច្ចប្រជុំកំពូលហ្វ្រង់កូហ្វូនីលើកទី ២០។ ភាគីទាំងពីរបានឯកភាពផ្តល់អាទិភាពលើគម្រោងតភ្ជាប់ហេដ្ឋារចនាសម្ព័ន្ធឆ្លងកាត់ព្រំដែន រួមមានផ្លូវរថភ្លើងពីទីក្រុងវៀងចន្ទន៍ ទៅកំពង់ផែ វង អាង (Vung Ang) ផ្លូវល្បឿនលឿនពីហាណូយទៅវៀងចន្ទន៍ ព្រមទាំងគម្រោងបំពង់បង្ហូរប្រេង និងឃ្លាំងស្តុកប្រេងរវាងវៀតណាម និងឡាវ។

បច្ចុប្បន្នឡាវ ត្រូវបានចាត់ទុកជាធុងអាគុយផ្នែកវារីអគ្គីសនីរបស់អាស៊ាន ដោយមានគម្រោងអភិវឌ្ឍន៍វារីអគ្គីសនីសរុប៨១កន្លែង។ តាមរយៈសក្តានុពលនេះ ឡាវកំពុងធ្វើពាណិជ្ជកម្មថាមពលអគ្គីសនីជាមួយថៃ វៀតណាម និងកម្ពុជា និងកំពុងពិនិត្យលទ្ធភាពពង្រីកបន្ថែមទៅកាន់សិង្ហបុរី។ ដោយឡែកលើវិស័យផ្លូវដែក ឡាវ កំពុងដើរតួនាទីជាច្រកតភ្ជាប់ដ៏សំខាន់សម្រាប់តំបន់ ខណៈការដឹកជញ្ជូនទំនិញមួយចំនួនរបស់ថៃ និងកម្ពុជា ក៏កំពុងប្រើប្រាស់ខ្សែផ្លូវតភ្ជាប់នេះផងដែរ៕

ដោយៈ សរ សុជាតិ




អត្ថបទបន្ទាប់


មេដឹកនាំមីយ៉ាន់ម៉ា កំពុងពិចារណាឡើងវិញលើទំនាក់ទំនងជាមួយអាស៊ាន

ក្រោយអវត្តមានពីកិច្ចប្រជុំកំពូលអាស៊ានអស់រយៈពេលជាច្រើនឆ្នាំចាប់តាំងពីខែតុលា ឆ្នាំ២០២១ មក ពេលនេះលោក មីន អោងលាំង ប្រធានាធិបតីមីយ៉ាន់ម៉ា…

អឺរ៉ុប សម្រេចចុះកិច្ចព្រមព្រៀងពាណិជ្ជកម្មជាមួយឥណ្ឌូនេស៊ី ដើម្បីទប់ទល់នឹងពន្ធគយរបស់លោក ត្រាំ

ស្របពេលពិភពលោកកំពុងព្រួយបារម្ភពីពន្ធគយរបស់រដ្ឋបាលលោក ដូណាល់ ត្រាំ ពេលនេះរដ្ឋាភិបាលរបស់បណ្តាប្រទេសនៅសហភាពអឺរ៉ុប (EU) បានអនុម័តឱ្យក្រុមប្រ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ