ក្រុមអ្នកវិភាគបានលើកឡើងថា ដំណើរទស្សនកិច្ចដ៏តក់ក្រហល់នេះ គឺគ្មានអ្វីក្រៅពីដើម្បីបញ្ជាក់ជាថ្មីអំពីភាពរឹងមាំ នៃទំនាក់ទំនងរវាងទីក្រុងមូស្គូ និងទីក្រុងប៉េកាំង នោះឡើយ ខណៈដែលបច្ចុប្បន្ន ចិន ក៏កំពុងស្វែងរកការសម្របសម្រួលទំនាក់ទំនងឱ្យកាន់តែប្រសើរឡើងជាមួយសហរដ្ឋអាម៉េរិក ដើម្បីកសាងស្ថិរភាពឡើងវិញ។
ប្រធានាធិបតីរុស្ស៊ី លោក ពូទីន បានធ្វើដំណើរទៅកាន់ប្រទេសចិន ដើម្បីជួបពិភាក្សាជាមួយមេដឹកនាំចិន លោក ស៊ី ជីនពីង យ៉ាងតក់ក្រហល់បំផុត ពោលគឺបន្ទាប់ពីលោក ដូណាល់ ត្រាំ បានចាកចេញពីទីក្រុងប៉េកាំងមិនទាន់បានមួយសប្តាហ៍ស្រួលបួលផង។ នេះបើតាមទីភ្នាក់ងារព័ត៌មាន AP។
អ្នកតាមដានស្ថានការណ៍អន្តរជាតិបានវាយតម្លៃថា ដំណើរទស្សនកិច្ចរបស់លោក ពូទីន ទៅកាន់ទីក្រុងប៉េកាំង ចន្លោះពីថ្ងៃទី១៩-២០ ខែឧសភា នេះ គឺធ្វើឡើងក្នុងគោលបំណងរក្សាស្ថិរភាព នៃទំនាក់ទំនងទ្វេភាគីជាមួយចិន ស្របពេលដែលសង្គ្រាមនៅអ៊ុយក្រែន នៅតែបន្តអូសបន្លាយ និងមិនទាន់ឃើញមានពន្លឺ នៃការបញ្ចប់នៅឡើយ។
ជុំវិញបញ្ហានេះ លោក វ៉ាង ស៊ីចិន (Wang Zichen) អគ្គលេខាធិការរងនៃមជ្ឈមណ្ឌលស្រាវជ្រាវចិន បានលើកឡើងថា កាលពីសប្តាហ៍មុនវត្តមានរបស់លោក ត្រាំ នៅទីក្រុងប៉េកាំង គឺផ្តោតលើការកសាងស្ថិរភាព នៃទំនាក់ទំនងទ្វេភាគី ដែលជាទំនាក់ទំនងដ៏សំខាន់សម្រាប់ពិភពលោក។ ប៉ុន្តែការមកដល់របស់លោក ពូទីន នៅពេលនេះ គឺដើម្បីធានាអះអាង និងពង្រឹងជំនឿចិត្តឡើងវិញលើភាពជាដៃគូយុទ្ធសាស្ត្រយូរអង្វែងរវាងរុស្ស៊ី និងចិន។
លោក វ៉ាង បានបន្ថែមថា ទីក្រុងប៉េកាំង ចង់បានទំនាក់ទំនង ដែលមានស្ថិរភាពជាមួយលោកខាងលិច ប៉ុន្តែទន្ទឹមនឹងនោះ ក៏នៅតែបន្តរក្សាទំនុកចិត្តជាយុទ្ធសាស្ត្រដ៏រឹងមាំជាមួយទីក្រុងមូស្គូផងដែរ។ នេះអាចជាយុទ្ធសាស្ត្រការទូតមួយ ដើម្បីបង្ហាញពិភពលោកថា ចិន ជាមហាអំណាចកណ្ដាល ដែលមិនលម្អៀង និងមានសមត្ថភាពអាចជជែកពិភាក្សាជាមួយគ្រប់ភាគីជម្លោះទាំងអស់បាន។
ដោយឡែកពាក់ព័ន្ធនឹងដំណើរទស្សនកិច្ចបន្ទាន់នាពេលនេះ អ្នកនាំពាក្យវិមានក្រឹមឡាំងលោក ឌីមីទ្រី ប៉េស្កូវ (Dmitry Peskov) បានថ្លែងថា ដំណើរទស្សនកិច្ចរបស់លោក ពូទីន គឺដើម្បីផ្តល់ឱកាសឱ្យរុស្ស៊ីទទួលបានព័ត៌មានថ្មីៗ និងការវិវត្តចុងក្រោយដោយផ្ទាល់ពីភាគីចិន ទាក់ទងនឹងលទ្ធផល នៃការចរចារវាងចិន និងសហរដ្ឋអាម៉េរិក៕
ដោយៈ សរ សុជាតិ
