យោងតាមការចុះផ្សាយរបស់សារព័ត៌មាន CNBC លោក ស្កុត បេសសេន (Scott Bessent) រដ្ឋមន្ត្រីក្រសួងហិរញ្ញវត្ថុសហរដ្ឋអាម៉េរិក បានលាតត្រដាងផែនការទណ្ឌកម្មសកល ដែលមានឈ្មោះថា Economic D-Day ដើម្បីផ្ដាច់ឫសគល់សេដ្ឋកិច្ចអ៊ីរ៉ង់ ដោយគំរាមកំហែងដាក់ទណ្ឌកម្មលើគ្រប់ប្រទេសទាំងអស់ ដែលមានទំនាក់ទំនងពាណិជ្ជកម្មជាមួយរដ្ឋអ៊ិស្លាមមួយនេះ ដោយមិនលើកលែងសូម្បីតែចិន។
រដ្ឋមន្ត្រីរូបនេះបានបញ្ជាក់ថា ប្រធានាធិបតី ដូណាល់ ត្រាំ កំពុងផ្ញើសារព្រមានទៅកាន់មេដឹកនាំពិភពលោកឱ្យបញ្ឈប់រាល់អន្តរកម្ម និងទំនាក់ទំនងសេដ្ឋកិច្ចជាមួយអ៊ីរ៉ង់ ជាបន្ទាន់។ ទោះបីជាការលម្អិតពីកញ្ចប់ទណ្ឌកម្មនេះមិនទាន់ត្រូវបានប្រកាសជាផ្លូវការក៏ដោយ ប៉ុន្តែអាម៉េរិកនឹងកំណត់ឱសានវាទជាក់លាក់មួយឱ្យប្រទេសនានាបញ្ចប់រាល់សកម្មភាពពាណិជ្ជកម្មជាមួយអ៊ីរ៉ង់។
អាម៉េរិក បានព្រមានថា ក្រុមហ៊ុន ឬស្ថាប័នណា មិនថា ស្ថិតនៅក្នុងប្រទេសណានោះទេ ប្រសិនបើរកឃើញថា មានការជាប់ពាក់ព័ន្ធ ឬជួយសម្រួលដល់សកម្មភាពលាងលុយកខ្វក់ឱ្យអ៊ីរ៉ង់ នឹងត្រូវកាត់ផ្តាច់ចេញពីប្រព័ន្ធទូទាត់ប្រាក់ដុល្លារអាម៉េរិកភ្លាមៗ។
បន្ថែមលើនេះ អាម៉េរិក ក៏កំពុងពង្រីកវិសាលភាពទណ្ឌកម្មឱ្យគ្របដណ្តប់លើទ្រព្យសកម្មឌីជីថល បច្ចេកវិទ្យា មាស អាកាសចរណ៍ និងប្រព័ន្ធដឹកជញ្ជូនរបស់អ៊ីរ៉ង់ ផងដែរ។ លោក បេសសេន បានសង្កត់ធ្ងន់ថា គោលដៅចុងក្រោយនៃយុទ្ធសាស្ត្រ Economic D-Day នេះ គឺការកាត់ផ្តាច់ដង្ហើមសេដ្ឋកិច្ចទាំងស្រុង ដែលកំពុងទ្រទ្រង់របបដឹកនាំនៅទីក្រុងតេអេរ៉ង់៕
ដោយៈ សរ សុជាតិ
